នៅក្នុងព្រះរាជសារ សម្តេចម៉ែ សម្តេចយាយ សម្តេចយាយទួត អបអរសាទរខួបលើកទី១០៩ នៃទិវាអន្តរជាតិ នារី ៨មីនា ឆ្នាំ២០២០ បានប្រទាននូវការកោតសរសើរ និងគាំទ្រចំពោះប្រធានបទ ( មានសន្តិភាព មានការលើកកម្ពស់សមភាពយេនឌ័រ ) ដែលប្រធានបទនេះ ស្របតាមបរិការណ៍នៃប្រទេសកម្ពុជា និងឆ្លើយតបផងដែរទៅនឹងក្របខណ្ឌថ្មីជាសាកល នៃគោលដៅអភិវឌ្ឍប្រកបដោយចីរភាព ដោយមិនទុកឲ្យនរណាម្នាក់នៅឯកកោ នោះឡើយ។
ព្រះរាជសារដ៏ឧត្តុងឧត្តមនេះ បានលើកយកមកអានទាំងស្រុងដោយ លោកស្រី ឡិញ រ៉ាមី មន្រ្តីការិយាល័យសង្គមកិច្ច និងសុខុមាលភាពសង្គមនៃស្រុកពួក ខេត្តសៀមរាប នៅមូលដ្ឋានសហគមន៍ជនបទឃុំដូនកែវ នាព្រឹកថ្ងៃទី០៦ ខែមីនា ឆ្នាំ២០២០នេះ ក្នុងពិធីអបអរសាទរ ទិវាអន្តរជាតិនារី ខួបទី១០៩ ដែលគាំទ្រសហការរៀបចំឡើង ដោយអង្គការបន្ទាយស្រី និងអាជ្ញាធរមូលដ្ឋានឃុំ-ស្រុក។ ប្រជាពលរដ្ឋប្រមាណជាង២០០នាក់ ដែលភាគច្រើនជាស្រ្តី បានចូលរួមក្នុងពិធីនោះ ។ នេះគឺជាឆ្នាំទី១០ហើយ ដែលអង្គការបន្ទាយស្រីបានរៀបចំទិវាអន្តរជាតិនារី នៅឃុំដូនកែវ ដែលជាសហគមន៍គោលដៅ របស់ខ្លួន។
លោកស្រី ប៊ុន គីមលី សមាជិកក្រុមប្រឹក្សាស្រុកពួក ប្រធានគណកម្មាធិការពិគ្រោះយោបល់កិច្ចការស្រ្តីនិងកុមារថ្នាក់ស្រុក បានលើកឡើងថា បុគ្គលគ្រប់រូប មានសិទ្ធិស្មើគ្នាតាំងពីកំណើតមកម្លេះ ដូច្នេះមិនមានការបែងចែក អ្នកនេះសិទ្ធិច្រើន ឬតិចនោះឡើយ។ ធម្មជាតិបុរសដែលមានកម្លាំងខ្លាំង ក៏មិនមែនសម្រាប់ប្រើទៅលើអំពើហិង្សានោះដែរ តែសម្រាប់គាំទ្រ ការពារស្ត្រី និងកុមារ ហើយវប្បធម៌នៃការពិភាក្សាគ្នារវាងបុរស និងស្ត្រី គឺជាជម្រើសដ៏ប្រពៃបំផុត ដើម្បីសុភមង្គល និងភាពរុងរឿងនៃគ្រួសារ។ សមភាពយេនឌ័រនាំឲ្យមានភាពថ្លៃថ្នូរក្នុងការរស់នៅជាមួយគ្រួសារនិងសង្គមជាតិ។ មិនចំពោះតែស្រ្តីនោះទេ ក្នុងនោះក៏មានបុរសផងដែរ ត្រូវនាំគ្នានិយាយ និងក្រោកឈរឡើង ដើម្បីទទួលយកចំណេះដឹងសង្គម អំពីសិទ្ធិស្រ្តី៕
រូបភាព និងអត្ថបទ៖ ងិន គឹមឡេង
