កាលពីរសៀលថ្ងៃទី៤ខែមីនាឆ្នាំ២០២០ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ជាប្រធានក្រុមការងារថ្នាក់ជាតិចុះជួយមូលដ្ឋានខេត្តសៀមរាប បានផ្ដល់យុទ្ធសាស្ត្រគន្លឺះ ៧ចំណុច ដើម្បីជំរុញដល់ការអភិវឌ្ឍ និងពង្រឹងរដ្ឋបាលថ្នាក់ក្រោមជាតិ ក្នុងខេត្តសៀមរាប ក្នុងឱកាស សម្ដេចអញ្ជើញបិទអង្គសន្និបាតបូកសរុបលទ្ធផលការងារឆ្នាំ២០១៩ និងលើកទិសដៅអនុវត្តបន្តឆ្នាំ២០២០ របស់រដ្ឋបាលខេត្តសៀមរាប។
សម្តេចពិជ័យសេនា បង្ហាញថា ជាក់ស្ដែងក្នុងឆ្នាំ២០១៩កន្លងទៅនេះ កម្ពុជានៅតែសម្រេចបានកំណើនសេដ្ឋកិច្ចក្នុងរង្វង់៧ភាគរយ ជាមួយការប្រមូល ចំណូលថវិកាជាតិកើនឡើងលើសគម្រោងផែនការប្រមាណ១៦០០លានដុល្លារអាមេរិក ហើយអត្រានៃភាពក្រីក្របានស្ថិតនៅក្នុងអត្រាទាបជាង១០ភាគរយ។
ជាមួយគ្នានោះ សម្តេចពិជ័យសេនា ក៏បានលើកនូវគោលការណ៍គន្លឺះចំនួន៧ចំណុច សម្រាប់ជាយុទ្ធសាស្ត្រ ដើម្បីសម្រេចបានសមិទ្ធផលថ្មីៗបន្ថែមទៀត និងជាយន្តការចូលរួមថែរក្សាសុខសន្តិភាព ស្ថេរភាព សន្តិសុខ សណ្តាប់ធ្នាប់សាធារណៈ លើកកម្ពស់លទ្ធិប្រជាធិបតេយ្យ សេរីពហុបក្ស និងជំរុញការអភិវឌ្ឍ សំដៅលើកកម្ពស់ជីវភាពរស់នៅ និងបន្តកាត់បន្ថយភាពក្រីក្រ របស់ប្រជាពលរដ្ឋ។ក្នុងនោះ ៖
ទី១/ ពង្រឹងសន្តិភាព និងស្ថេរភាពនយោបាយ ទប់ស្កាត់ សកម្មភាពឬការផ្សព្វផ្សាយព័ត៌មានមិនពិត ដែលនាំឲ្យអសន្តិសុខសង្គម ព្រមទាំងអប់រំណែនាំនិងបកស្រាយបំភ្លឺព័ត៌មានមិនពិតទាំងនោះ ជូនប្រជាពលរដ្ឋ។ ក្នុងនោះ អាជ្ញាធរគ្រប់ថ្នាក់ត្រូវយកចិត្តទុកដាក់គ្រប់គ្រង ដោះស្រាយជម្លោះនិងការទាមទារតវ៉ានានា ដោយសន្តិវិធី និងត្រូវចៀសវាងដាច់ខាតនូវអំពើហិង្សាតាមគ្រប់រូបភាព។
ទី២/ បន្តជំរុញបំផុសចលនាប្រជាជន ចូលរួមអនុវត្តគោលនយោបាយភូមិឃុំមានសុវត្ថិភាព ឱ្យបានជាប់ជាប្រចាំនៅតាមមូលដ្ឋាន ដើម្បីបង្ការទប់ស្កាត់និងបង្ក្រាបបទល្មើសនានាឱ្យបានទាន់ពេលវេលា។
ទី៣/ ការអភិវឌ្ឍសង្គម និងទេសចរណ៍ រដ្ឋបាលក្រុងស្រុក ត្រូវជំរុញការអភិវឌ្ឍហេដ្ឋារចនាសម្ព័ន្ឋរូបវ័ន្ត និងអរូបវ័ន្ត សម្រាប់បម្រើដល់សកម្មភាពសេដ្ឋកិច្ច ការវិនិយោគ ពាណិជ្ជកម្ម ទេសចរណ៍ និងការប្រកបមុខរបររបស់ប្រជាពលរដ្ឋ។
ទី៤/ ការអភិវឌ្ឍទីក្រុង រួមមាន បញ្ហាសំណង់ បញ្ហាសំរាម បញ្ហាបរិស្ថាន សណ្តាប់ធ្នាប់ទីក្រុង កិច្ចសហការជាមួយដៃគូអភិវឌ្ឍជាដើម គឺជាបញ្ហាអាទិភាព ដែលរដ្ឋបាលថ្នាក់ក្រោមជាតិគ្រប់ជាន់ថ្នាក់ត្រូវ យកចិត្តទុកដាក់ដោះស្រាយ តាមរយៈការលើកកម្ពស់វិធានការគ្រប់គ្រង និងសិក្សាឡើងវិញ។
ទី៥/ ការកំណែទម្រង់វិមជ្ឈការ និងវិសហមជ្ឈការ ដោយផ្តោតសំខាន់ទៅលើការផ្ទេរមុខងារ ធនធាននិងការទទួលខុសត្រូវទៅឱ្យរដ្ឋបាលថ្នាក់ក្រោមជាតិ រដ្ឋបាលឃុំសង្កាត់ត្រូវពង្រឹងការគ្រប់គ្រង ចាត់ចែងការប្រើប្រាស់ថវិកាឃុំសង្កាត់ដោយតម្លាភាព គណនេយ្យភាព ប្រសិទ្ឋភាពដែលនៅក្នុងឆ្នាំ២០២០នេះរាជរដ្ឋាភិបាលបានសម្រេចបង្កើនមូលនិធិឃុំសង្កាត់ទ្វេរដងបើប្រៀបធៀបទៅនឹងឆ្នាំ២០១៩ ហើយនឹងបន្តកើនឡើងរៀងរាល់ឆ្នាំរហូតដល់ឆ្នាំ២០២៣ ឃុំសង្កាត់នឹងទទួលបានថវិកាសរុបជាមធ្យមប្រមាណ២២៧.០០០ដុល្លារ។
ទី៥/ ការកំណែទម្រង់វិមជ្ឈការ និងវិសហមជ្ឈការ ត្រូវផ្តោតសំខាន់ទៅលើការផ្ទេរមុខងារ ធនធាន និងការទទួលខុសត្រូវ ទៅឱ្យរដ្ឋបាលថ្នាក់ក្រោមជាតិ រដ្ឋបាលឃុំ-សង្កាត់។ ជាមួយនោះ រដ្ឋបាលឃុំ-សង្កាត់ ត្រូវពង្រឹងការគ្រប់គ្រង ចាត់ចែងការប្រើប្រាស់ថវិកាប្រកបដោយតម្លាភាព គណនេយ្យភាព ប្រសិទ្ឋភាពដែលនៅក្នុងឆ្នាំ២០២០នេះ រាជរដ្ឋាភិបាលបានសម្រេចបង្កើនមូលនិធិឃុំ-សង្កាត់ទ្វេរដង បើប្រៀបធៀបទៅនឹងឆ្នាំ២០១៩ ហើយនឹងបន្តកើនឡើងរៀងរាល់ឆ្នាំរហូតដល់ឆ្នាំ២០២៣ ឃុំ-សង្កាត់នឹងទទួលបានថវិកាសរុបជាមធ្យមប្រមាណ២២៧.០០០ដុល្លារ។
ទី៦/ ការផ្តល់សេវាសាធារណៈ និងការដោះស្រាយបញ្ហាប្រឈមនៅមូលដ្ឋាន ដែលទាមទារឱ្យរដ្ឋបាលថ្នាក់ក្រោមជាតិ ត្រូវបន្តលើកកម្ពស់ស្មារតីទទួលខុសត្រូវ និងមានគណនេយ្យភាពក្នុងការគ្រប់គ្រងចាត់ចែង និងផ្តល់សេវានានានៅតាមច្រកចេញចូលតែមួយ ដើម្បីធានាឱ្យប្រជាពលរដ្ឋទទួលបានសេវារដ្ឋបាលកាន់តែងាយស្រួល ឆាប់រហ័ស តម្លាភាពនិងគណនេយ្យភាព។
និងទី៧ ការពង្រឹងរបៀបរៀបរយការងារ ដែលចំណុចនេះសម្តេចពិជ័យសេនា បានស្នើ ដល់ ក្រុមការងាររាជរដ្ឋាភិបាលចុះមូលដ្ឋាន អាជ្ញាធរខេត្ត-ក្រុង-ស្រុក គ្រប់លំដាប់ថ្នាក់ ត្រូវយកចិត្តទុកដាក់អនុវត្តន៍ឲ្យមានប្រសិទ្ឋភាពនូវអនុសាសន៍ណែនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជាពិសេសវិធានការជួយសង្គ្រោះវិស័យទេសចរណ៍ក្នុងខេត្តសៀមរាបកាលពីពេលថ្មីៗនេះ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
