នៅថ្ងៃទី០៥ ខែកុម្ភៈ ឆ្នាំ២០២០ អាជ្ញាធរឃុំព្រះដាក់ និង អង្គការអមរា បានរួមគ្នាប្រារព្ធទិវាអន្តរជាតិនារី ៨មីនាក្រោមប្រធានបទ “សកម្មភាពស្ត្រីដើម្បីមានសម្លេង និងមានភាពអង់អាច” ក្នុងគោលបំណងលើកកម្ពស់នូវសមភាព សមធម៌យេនឌ័រ។
ពិធីនេះបានធ្វើឡើងនៅសាលាឃុំព្រះដាក់ ស្ថិតក្នុង ស្រុកបន្ទាយស្រី ខេត្តសៀមរាប ដោយមានការអញ្ជើញចូលរួមពីលោកយឿន យឿម ជំទប់ទី២ ឃុំព្រះដាក់ និងលោកស្រីហង់ ចន្ធី តំណាងអង្គការអមរា និងមានប្រជាពលរដ្ឋ សិស្សានុសិស្សចូលរួមជាង៩០រូប។
លោកស្រី តំណាងអង្គការអមរា បានមានប្រសាសន៍ថា កន្លងមកដោយសារចំណេះដឹង គំនាបប្រពៃណី និងផ្នត់គំនិត បានធ្វើឲ្យស្ត្រីនៅក្នុងប្រទេសកម្ពុជាក៏ដូចជានៅលើពិភពលោក ពុំត្រូវបានគេផ្តល់តម្លៃពីសំណាក់បុរសទាំងក្នុងគ្រួសារ និងទាំងក្នុងសង្គម ។ នៅចុងសតវត្សរ៍ទី១៩ បច្ចេកវិទ្យាបានរីកចំរើនយ៉ាង ជាពិសេសនៅ អាមេរិក និងបណ្តាប្រទេសដែលមានខឿនឧស្សាហកម្មជឿនលឿន នារី និងកុមារក្រីក្ររាប់លាននាក់ ត្រូវបានទាក់ទាញឲ្យចូលធ្វើការនៅក្នុងរោងចក្រ ។ ដោយមានការកេងប្រវ័ញកម្លាំងពលកម្មស្រ្តី និងកុមារជាទម្ងន់ ឆ្នាំ ១៩១០ សន្និបាតអន្តរជាតិនារីដែលមានប្រទេស ១៧ ចូលរួមបានធ្វើឡើងនៅទីក្រុងកូប៉ែនហាក រដ្ឋធានីនៃប្រទេសដាណឺម៉ាក បានសម្រេចយកថ្ងៃ ៨ មីនា “ទិវានារីអន្តរជាតិ” ថ្ងៃមហាសាមគ្គីតស៊ូរបស់នារីពលករទូទាំងសាកលលោក ដើម្បីសិទ្ធិសេរីភាពប្រជាធិបតេយ្យដោយភ្ជាប់ជាមួយនឹងពាក្យស្លោកថា «មួយថ្ងៃធ្វើការប្រាំបីម៉ោង», «ធ្វើការស្មើគ្នា បៀវត្សស្មើគ្នា», «ការពារសុខភាពមាតា និងទារក» ។
លោកយឿន យឿម បានលើកឡើងថា ការចូលរួមរបស់ស្ត្រី បានធ្វើឲ្យឃុំព្រះដាក់ កាន់តែមានការអភិវឌ្ឍ និងចូលរួមកាត់បន្ថយភាពក្រីក្រ ជាបន្តបន្ទាប់។ ជាមួយគ្នានេះ ការខិតខំជំរុញឲ្យក្មេងស្រីបានទទួលការអប់រំ ក៏មានការផុសផុល ដោយកន្លងមកកុមារី មិនសូវជាមានការលើកទឹកចិត្ត ឲ្យបានចូលរៀនសូត្រនោះទេ៕
អត្ថបទ និង រូបថត ៖ លោក ខេង ឧត្តម
កែសម្រួលអត្ថបទ ៖ លោក សេង ផល្លី
