ឯកឧត្តម សេរី ជំនះ អនុរដ្ឋលេខាធិការក្រសួងអប់រំ យុវជន និងកីឡា និងជាអនុប្រធានកាយរឹទិ្ធជាតិកម្ពុជា មានប្រសាសន៍ថា កាយរឹទ្ធិជាតិកម្ពុជា បានដើរតួនាទី និងរួមចំណែកក្នុងកម្មវិធីអប់រំក្រៅប្រព័ន្ធយ៉ាងសកម្ម ដោយបានការគាំទ្រយ៉ាងខ្លាំងដល់ប្រព័ន្ធអប់រំរបស់ក្រសួងអប់រំ យុវជន និងកីឡា ព្រោះថា ចលនាកាយរឹទិ្ធ បានដើរតួនាទីកាន់តែសំខាន់ក្នុងការចូលរួមតាមរយៈសកម្មភាពអ្នកស្ម័គ្រចិត្ត និងអនុវត្តគម្រោងតាមសហគមន៍នានា ដែលបានភ្ជាប់ការចូលរួមរបស់កុមារ-យុវជនជាមួយសហគមន៍ ជាពិសេសកម្មវិធីកាយរឹទិ្ធកម្ម បានអភិវឌ្ឍន៍ធនធានកុមារ យុវជនឱ្យមានសក្តានុពលពេញលេញខាងផ្លូវកាយ ផ្លូវបញ្ញា ផ្លូវសង្គម ផ្លូវចិត្ត និងការគ្រប់គ្រងលើផ្លូវអារម្មណ៍ ដើម្បីឱ្យពួកគេក្លាយទៅជាពលរដ្ឋមានទំនួលខុសត្រូវក្នុងសង្គម និងជាសមាជិកសកម្មក្នុងសហគមន៍នៅតាមមូលដ្ឋានរស់នៅរបស់ពួកគេ។
ឯកឧត្តម សេរី ជំនះ មានប្រសាសន៍យ៉ាងដូច្នេះ ក្នុងពិធីបើកវគ្គបណ្តុះបណ្តាលមេដឹកនាំកាយរឹទិ្ធជាន់ខ្ពស់ជំនាន់ទី៣ លើកទី២ នៅសាលាពលទាហានទី៤ ខេត្តសៀមរាប នាព្រឹកថ្ងៃទី០៣ ខែមីនាឆ្នាំ២០២០នេះ ។
ឯកឧត្តម អនុរដ្ឋលេខាធិការក្រសួងអប់រំ យុវជន និងកីឡា បានបញ្ជាក់បន្ថែមថា តាមរយៈសកម្មភាពកាយរឹទិ្ធកម្ពុជា បានបង្កើតជាផលដែលជះឥទ្ឋិពលយ៉ាងធំធេងដល់សង្គម និងធើ្វឱ្យរូបភាពចលនាកាយរឹទិ្ធពិភពលោក ក៏ដូចជាចលនាកាយរឹទិ្ធកម្ពុជា ទទួលបានការគាំទ្រ និងការចូលរួមពីសហគមន៍ជាតិ និងអន្តរជាតិ ជាពិសេស អង្គការសហប្រជាជាតិបានទទួលស្គាល់ថា “ចលនាកាយរឹទ្ធិ” គឺជាចលនាអប់រំបំណិនជីវិត និងបណ្តុះស្មារតីស្ម័គ្រចិត្តក្នុង សហគមន៍ យ៉ាងសកម្ម និងបានកំណត់យកសំឡេងកាយរឹទិ្ធ គឺជាធាតុចូលនៅក្នុងសន្និសីទប្រចាំឆ្នាំរបស់អង្គការសហប្រជាជាតិ ខណៈ បច្ចុប្បន្ននេះ អង្គការពិភពលោកនៃចលនាកាយរឹទិ្ធ មានសមាជិកចំនួន១៧១ប្រទេស និងសមាជិកជាកុមារ-យុវជនចំនួន៥៤លាននាក់នៅជុំវិញពិភពលោក ហើយការអនុវត្តកម្មវិធី និងគម្រោងសកម្មភាពនៅក្នុងចលនាកាយរឹទិ្ធ ត្រូវចូលរួមគាំទ្រពីមនុស្សពេញវ័យ ដែលមានជំនាញកាយរឹទិ្ធកម្មពិប្រាកដ។
ព័ត៌មានជាតិ ថ្មីៗ
លោក គង់ សុវណ្ណារ៉ា ប្រធាននាយកដ្ឋានសហប្រតិបត្តិការ កាយរឹទ្ឋិកម្ពុជា បានឱ្យដឹងថា ក្រោយពីបញ្ចប់វគ្គបណ្តុះបណ្តាល សិក្ខាកាមទាំងអស់ត្រូវសរសេរនិក្ខេបបទ និង របាយការណ៍កម្មសិក្សារយៈ ពេល ១២ខែ ដើម្បីបង្កើត និងគ្រប់គ្រងដំណើរការកងឯកភាពនៅមូលដ្ឋានរបស់ខ្លួន ដើម្បីទទួលបាន “ប័ណ្ណសញ្ញាឈើពីរកំណាត់” Woodbead ដែលទទួលស្គាល់ជាគ្រូឧទ្ទេសកាយរឹទិ្ធ ស្របតាមគោលនយោបាយបណ្តុះបណ្តាលរបស់អង្គការពិភពលោក នៃចលនាកាយរឹទិ្ធ និងកាយរឹទិ្ធជាតិកម្ពុជា ។
សូមបញ្ជាក់ថា នេះជាវគ្គទីពីរក្នុងប្រវត្តិចលនាកាយរឹទ្ធិជាតិកម្ពុជា ដែលមន្ត្រីជំនាញរបស់នាយកដ្ឋានសហប្រតិបតិ្តការកាយរឹទិ្ធ បានរៀបចំដោយប្រើប្រាស់ធនធានមនុស្ស សម្ភារ និងបច្ចេកទេសដោយខ្លួនឯង និងត្រូវបានទទួលស្គាល់លើវិញ្ញបនបត្របញ្ចប់វគ្គ ដោយអង្គការពិភពលោក នៃចលនាកាយរឹទិ្ធប្រចាំតំបន់អាស៊ី-ប៉ាស៊ីហ្វិក៕
អត្ថបទ និង រូបថត ៖ លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
