លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានថ្លែងថា មនុស្ស៤នាក់ដែលធ្លាប់មានទំនាក់ទំនងផ្ទាល់ជាមួយជនជាតិជប៉ុន ដែលមានផ្ទុកមេរោគកូវីដ-19 មានសុខភាពល្អជាធម្មតា ដូចមនុស្សទូទៅដែរ។ លោកជំទាវថ្លែងបែបនេះ ក្រោយពេលលោកជំទាវទៅសួរសុខទុក្ខពួកគាត់ នៅមន្ទីរពេទ្យបង្អែកខេត្តសៀមរាប កាលពីព្រឹកថ្ងៃទី០៦ ខែមីនា ឆ្នាំ២០២០នេះ។
លោកជំទាវ ឱ វណ្ណឌីន មានប្រសាសន៍ថា មនុស្ស៤នាក់នោះ មានស្រី២នាក់ ប្រុស២នាក់ ត្រូវបានដាក់នៅក្នុងបន្ទប់ដាក់ដោយឡែក នៅក្នុងមន្ទីរពេទ្យបង្អែកខេត្តសៀមរាប។ ហើយរហូតមកដល់នេះ អ្នកទាំង៤នាក់នោះមានសុខភាពល្អធម្មតា មិនមានចេញរោគសញ្ញាអ្វីគួរឲ្យកត់សម្គាល់ទោះទេ។ លោកជំទាវបានបញ្ជាក់ថា លោកជំទាវទទួលបានពីពួកគាត់ទាំង៤នាក់នោះ គឺជនជាតិជប៉ុនបានចាត់ចែងនិតិវិធីនៃការការពារចម្លងរោគនៅកន្លែងធ្វើការរបស់គាត់បានយ៉ាងល្អ ដោយបានឲ្យបុគ្គលិកគាត់លាងដៃនឹងអាកុល និងពាក់ម៉ាសផងដែរ។ជាពិសេសសម្រាប់ជនជាតិជប៉ុននោះផ្ទាល់ គាត់ក៏បានព្យាយាមឲ្យបុគ្គលិកគាត់នៅឲ្យឆ្ងាយពីគាត់ ចំម្ងាយ១ម៉ែត្រពេលនិយាយគ្នា នៅពេលដែលគាត់ដឹងថា គាត់មិនស្រួលខ្លួន។ បើទោះជាយ៉ាងនេះក្តី កម្ពុជាបានចាត់ការវិធានការបង្កាតាមនីតិវិធីប្រតិបត្តិស្តង់ដារបស់អង្គការសុខភាពពិភពលោក។
បើតាមលិខិតរបស់លោក អ៊ឹង រចនា អគ្គរាជទូតកម្ពុជាប្រចាំនៅប្រទេសជប៉ុន បានធ្វើរបាយការណ៍ទៅកាន់ឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេសកម្ពុជា បានបញ្ជាក់អំពីស្ថានភាពជនជាតិជប៉ុនម្នាក់ ដែលឆ្លងជំងឺ Covid-19 ដែលត្រូវបានពិនិត្យឃើញ ពេលចេញពីកម្ពុជា ទៅកាន់ប្រទេសជប៉ុន ដោយឆ្លងកាត់ប្រទេសវៀតណាម។ លោក អ៊ឹង រចនា អគ្គរាជទូតកម្ពុជាប្រចាំនៅប្រទេសជប៉ុន បានបញ្ជាក់ថា បុរសជនជាតិជប៉ុនម្នាក់នោះ ត្រូវបានរកឃើញមានផ្ទុកជំងឺកូវីត១៩ ពេលទៅដល់អាកាសយានដ្ឋាន Chubu នៃទីក្រុង Nagoya ប្រទេសជប៉ុន នៅពេលគាត់ទៅពិភាក្សាជាមួយក្រុមមន្រ្តីចត្តាឡីស័ក ដោយសារគាត់ពិបាកដកដង្ហើម។ បុរសរូបនេះ បានចាកចេញពីអាកាសយានដ្ឋានសៀមរាប នៅម៉ោង២០ និង៥៧ ថ្ងៃទី០៣ ខែមីនា ឆ្នាំ២០២០ ទៅកាន់អាកាសយានដ្ឋាន Tan Son Nhat ទីក្រុងហូជីមិញ ន្រទេសវៀតណាម រួចប្តូរដើម្បីហោះហើរទៅកាន់ទីក្រុង Nagoya ប្រទេសជប៉ុន ហើយប្រទេសជប៉ុនរកឃើញវិជ្ជមានកូវីដ-19 នៅទីនោះ៕
អត្ថបទ និងរូបភាព ៖ បូ សាវី
