ក្នុងឱកាសអញ្ជើញជាអធិបតីក្នុងពិធីដាក់ឱ្យដំណើរការជាផ្លូវការផ្លូវជាតិលេខ៥៥ និងបើកការដ្ឋានសាងសង់ផ្លូវជាតិលេខ១០ កាលពីព្រឹកថ្ងៃទី០៩ ខែមីនា ឆ្នាំ២០២០នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសជាសាធារណៈថា សម្តេចនឹងអញ្ជើញទៅខេត្តសៀមរាប ដើម្បីទប់ស្កាត់ការភ័យខ្លាចហួសហេតុ នៃការឆ្លងជំងឺកូវីត១៩។
ក្នុងឱកាសនោះដែរ សម្តេចតេជោ ហ៊ុន សែន បានថ្លែងកោតសរសើរដល់គ្រូពេទ្យទាំងអស់ ដែលបានប្រឹងប្រែងយកសំណាករបស់អ្នកពាក់ព័ន្ធ និងក្រុមគ្រួសាររបស់បុរសកើតជំងឺកូវីត១៩ក្នុងខេត្តសៀមរាប ទៅពិនិត្យដោយហ្មត់ចត់។ ទន្ទឹមនោះសម្តេចតេជោ ហ៊ុន សែន បានចាត់ទុកភរិយា និងសាច់ញាតិរបស់បុរសកើតជំងឺកូវីត១៩ មានភាពក្លាហាន ដែលបានចេញមកបកស្រាយលើបញ្ហាឆ្លងជំងឺនេះ ដើម្បីបន្សាបព័ត៌មានមិនពិតនៅបណ្ដាញសង្គមនានា។
សម្តេចតេជោ ហ៊ុន សែន បានអំពាវនាវឱ្យប្រជាពលរដ្ឋរើសយកវិធានការការពារជំងឺកូវីត១៩ តែមិនត្រូវខ្លាចហួសហេតុនោះទេ ជាពិសេសអំពាវនាវប្រជាពលរដ្ឋឱ្យនាំគ្នាប្រើក្រមាជំនួសម៉ាស់ ដើម្បីបង្ការជំងឺកូវីត១៩ ៕
អត្តបទ៖មន្ទីរព័ត៌មានខេត្តសៀមរាប
