ដំណាំកសិ-ឧស្សាហកម្ម ជាប្រភេទដំណាំកែច្នៃនំចំណី ម្សៅភេសជ្ជៈ ជាអាហារផ្សេងៗទៀត ឬជាឱសថអាហារបំប៉នជាដើម ត្រូវបានស្ថិតក្នុងគម្រោងដាំដុះចំនួន ១លានកូន លើផ្ទៃដីប្រមាណជា ១ ៦០០ហិចតា ក្នុងបណ្តាខេត្តចំនួន១២ ( សៀមរាប បាត់ដំបង ពោធិសាត់ កំពង់ធំ កំពង់ចាម ឧត្តរមានជ័យ ប៉ៃលិន កំពង់ស្ពឺ កំពង់ឆ្នាំង មណ្ឌលគិរី កំពត និងខេត្តព្រះវិហារ។ ប្រភេទដំណាំនេះងាយស្រួលក្នុងការថែទាំដាំដុះ ធន់ទ្រាំនឹងបរិស្ថានជុំវិញ មានអាយុកាលប្រមូលផលរហូតដល់៦០ឆ្នាំ ផ្លែកាកាវ មានទីផ្សារធំទូលាយនៅក្នុងតំបន់អាស៊ី និងនៅតំបន់អ៊ឺរ៉ុប ។
លោកស្រី ស៊ុ សុរង្សី នាយិកាក្រុមហ៊ុន ហ្វេមីលី កាកាវ ខេមបូឌា បានចុះហត្ថលេខាលើអនុស្សរណៈនៃការយោគយល់គ្នា ជាមួយក្រុមហ៊ុនហ៊ុន COCOA Network Co.,LTD ( K.U.N ) នៃប្រទេសថៃ ស្តីអំពី កិច្ចសហប្រតិបត្តិការ ដាំដុះដំណាំកាកាវ និងប្រមូលទិញផលផ្លែកាកាវពីកសិករ ដើម្បីនាំចេញទៅក្រៅប្រទេស ដែលការចុះហត្ថលេខានេះ បានធ្វើឡើងនារសៀលថ្ងៃទី០៨ ខែមិនា ឆ្នាំ២០២០ នៅខេត្តសៀមរាប។
បើសិនជាមានការថែទាំល្អ ដំណាំការកាវ នឹងចាប់ផ្តើមចេញផ្លែផ្កាក្នុងអាយុពី១ឆ្នាំកន្លះ ទៅ២ឆ្នាំ។ ឆ្នាំដំបូងអាចផ្តល់ផលតិចតួច គឺក្នុង១ដើមប្រហែលជា២០គីឡូក្រាម ក៏ប៉ុន្តែនៅឆ្នាំបន្ទាប់ កាកាវនឹងផ្តល់ផលទ្វេដង ហើយក្នុង១ឆ្នាំកសិករអាចប្រមូលផលពី ២ ទៅ ៤ដងក្នុង១ឆ្នាំ ដោយសារតែធម្មជាតិដំណាំកាកាវ ផ្តល់ផលផ្លែផ្កាពុំមានរដូវកាលនោះទេ គឺផ្លែផ្កាវិលជុំក្នុង១ឆ្នាំៗ មានន័យថា ប្រមូលផលរួច វានឹងចេញផ្កាផ្លែបន្តទៀត។ នៅក្នុងឆ្នាំទី៣ កាកាវមួយដើមផ្តល់ផលពី ៥០ ទៅ ៦០គីឡូក្រាម ឆ្នាំបន្ទាប់ទៀត ពី ៧០ ទៅ ១០០គីឡូក្រាម និងគ្រប់អាយុពេញវ័យ ៥ឆ្នាំឡើងទៅ កាកាវ១ដើម អាចនឹងផ្តល់ផលពី ១០០ ទៅ ១៥០គីឡូក្រាម។ តម្លៃផ្លែកាកាវស្រស់ ១តោន ស្មើនឹង ៣០០ដុល្លារអាមេរិក ផ្លែកាកាវសម្ងួត មានតម្លៃក្នុង ១តោន ២ ៥០០ដុល្លា។ ក្នុង១តោនផ្លែកាកាវស្រស់ ស្មើនឹង ១៤២គីឡូក្រាម នៃផ្លែកាកាវសម្ងួត។
លោក ភឿន គឹមលី ប្រធានមន្ទីរពាណិជ្ជកម្មខេត្តសៀមរាប ក្នុងនាមជាម្ចាស់ផ្ទះនៃការចុះហត្ថលេខានេះ ចាប់អារម្មណ៍ថា M.O.U លើកិច្ចសហប្រតិបត្តិការដាំ និងប្រមូលទិញផ្លែកាកាវ និងកិច្ចសហប្រតិបត្តិការរួមគ្នា ដើម្បីផ្សព្វផ្សាយបណ្តុះបណ្តាលបច្ចេកទេសកសិកម្ម ដែលផ្តោតទៅលើការដាំដំណាំកាកាវ នៅក្នុងព្រះរាជាណាចក្រកម្ពុជា ជាមួយនិងការនាំចេញផលិតផល-អនុផលផ្លែកាកាវ ទៅកាន់ទីផ្សាអន្តរជាតិ គឺជាឱកាសថ្មីមួយថែមទៀត សម្រាប់កសិករខ្មែរបានលក់នាំចេញផលិតផលកសិ-ឧស្សហកម្ម ក្រៅពីផ្លែស្វាយចន្ទី និងដំឡូងមី ។
អត្ថបទ និងរូបភាព៖ ងិន គីមឡេង
