មានប្រសាសន៍នៅថ្ងៃទី១៦ ខែមីនា ឆ្នាំ២០២០នេះ លោក សេង សេរីវុទ្ធ ប្រធានទីផ្សារនៃក្រុមហ៊ុន ម៉េម័រ ហូថែល និងរីស្សត មានឲ្យដឹងថា ក្រុមហ៊ុននេះមានសណ្ឋាគារចំនួន០៣ គឺ ៖ ១. សណ្ឋាគារម៉េម័រ ម៉េម័រ ផាឡេស រីសត និងស្ប៉ា ដែលជាសណ្ឋាគារលំដាប់ផ្កាយ៥ , ២. សណ្ឋាគារ ម៉េម័រ សៀមរាប ហូថែល ជាសណ្ឋាគារលំដាប់ផ្កាយ៤ និង សណ្ឋាគារ ម៉េម័រ ដឺអង្គរ ប៉ូទិច ហូថេល ជាសណ្ឋាគារលំដាប់ផ្កាយ៤ ដែរនោះ បានសម្រេចបញ្ចុះតម្លៃពិសេស៥០ភាគរយជាកញ្ចប់ក្នុងរយៈពេល១០ថ្ងៃ ចំពោះការស្នាក់នៅរបស់ភ្ញៀវទេសចរណ៍ជាតិនិងអន្តរជាតិ ចាប់ពីពេលនេះទៅដល់ខែឧសភា ឆ្នាំ២០២០ ។
លោក សេង សេរីវុទ្ធ បានពន្យល់ថា ការបញ្ចុះតម្លៃពិសេសនេះ គឺសម្រាប់តែភ្ញៀវណាដែលមកស្នាក់នៅក្នុងសណ្ឋាគារក្នុងរយៈពេល១០ថ្ងៃ ក្នុងនោះសណ្ឋាគារម៉េម័រ ម៉េម័រ ផាឡេស រីសត និងស្ប៉ា បញ្ចុះតម្លៃនៅសល់តែ ៧៥០ដុល្លារអាមេរិក , សណ្ឋាគារ ម៉េម័រសៀមរាប ហូថែល បញ្ចុះតម្លៃនៅសល់តែ ២៨០ដុល្លារអាមេរិក និង សណ្ឋាគារ ម៉េម័រ ដឺអង្គរ ប៉ូទិច ហូថេល បញ្ចុះតម្លៃនៅសល់តែ ៣៥០ដុល្លារអាមេរិក ហើយអតិថិជនដែលជាវយកកញ្ចប់ពិសេសនេះ នឹងទទួលបាននាមប័ណ្ណពីសណ្ឋាគារ ដែលមានសុពលភាពរហូតដល់ខែកញ្ញាឆ្នាំ២០២០ និងអាចយកនាមប័ណ្ណនោះ ទៅឱ្យអ្នកផ្សេងមកស្នាក់នៅជំនួស ហើយខាងសណ្ឋាគារនឹងដកចំនួនថ្ងៃចេញទៅតាមនោះ លុះត្រាតែអស់ចំនួនថ្ងៃដែលបានកក់ ។
លោក សេង សេរីវុទ្ធ បានឲ្យដឹងទៀតថា ការបញ្ចុះតម្លៃនេះ គឺស្របតាមការអំពាវនាវរបស់រាជរដ្ឋាភិបាល និងជាពិសេសតបតាមការសំណូមពររបស់អាជ្ញាធរខេត្ដសៀមរាប ក៏ដូចជាក្រសួងទេសចរណ៍ ធ្វើយ៉ាងណារៀបចំកញ្ចប់តម្លៃនិងផ្តល់សេវាឱ្យបានសមរម្យ ដើម្បីទាក់ទាញអ្នកទេសចរមកកំសាន្ដស្នាក់នៅក្នុងខេត្ដសៀមរាបឱ្យបានយូរ។
ព័ត៌មានជាតិ ថ្មីៗ
គួររំលឹកថា កាលពីថ្ងៃទី១២ ខែមីនា ឆ្នាំ២០២០កន្លងទៅថ្មីៗនេះ សណ្ឋាគារវិចតូរីយ៉ាអង្គរ រីស៊ត និង ស្ប៉ា ស្ថិតក្នុងក្រុងសៀមរាប ជាសណ្ឋាគារលំដាប់ផ្កាយ៥ដែរនោះ បានសម្រេចបញ្ចុះតម្លៃ៥៤ភាគរយនៃតម្លៃមុនសរុប១៧៥ដុល្លាក្នុងមួយយប់ សម្រាប់ភ្ញៀវទេសចរជាតិ ក្នុងរយៈពេល៣ខែ ដោយចាប់ពីខែមីនា ដល់ដំណាច់ខែឧសភាឆ្នាំ២០២០ខាងមុខនេះ ក្នុងគោលបំណងដើម្បីចូលរួមចំណែកទាក់ទាញអ្នកទេសចរណ៍មកទស្សនានៅខេត្ដសៀមរាប តាមការអំពាវរបស់ប្រមុខរាជរដ្ឋាភិបាលកម្ពុជា នៅក្នុងពិធីចូលឆ្នាំថ្មីប្រពៃណីខ្មែរខាងមុខនេះ ជាពិសេសជុំវិញបញ្ហាសកលដែលបណ្ដាលមកពីបញ្ហាវីរុសខូវីដ-១៩នេះ ។
សូមបញ្ជាក់ថា ក្នុងខេត្តសៀមរាប មានសេវាកម្មស្នាក់នៅជាសណ្ឋាគារចំនួន២២៨កន្លែង ស្មើនឹង១៤.៥៩៩បន្ទប់ ក្នុងនោះ សណ្ឋាគារផ្កាយ៥ចំនួន២០កន្លែង ស្មើនឹង៤០៤៦បន្ទប់ , សណ្ឋាគារផ្កាយ៤ ចំនួន២២កន្លែង ស្មើនឹង២៧២៥បន្ទប់ , សណ្ឋាគារផ្កាយ៣ ចំនួន៨កន្លែង ស្មើនឹង៤៩២បន្ទប់ , សណ្ឋាគារផ្កាយ២មួយកន្លែង និង ផ្ទះសំណាក់មានចំនួន២៤៨កន្លែង ស្មើនឹង៤.២៩៣បន្ទប់ នេះបើតាមរបាយការណ៍របស់មន្ទីរទេសចរណ៍ខេត្ត ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
