បច្ចុប្បន្ននេះ ព្រៃឈើក្នុងតំបន់រមណីយដ្ឋានអង្គរ មានត្រឹមតែ១៤ភាគរយប៉ុណ្ណោះ លើផ្ទៃដីសរុប ៤០១គីឡូម៉ែត្រក្រឡា ដែលចំនួននៅមិនទាន់គ្រប់គ្រាន់ដើម្បីទាក់ទាញទឹកភ្លៀង សម្រាប់ទ្រទ្រង់បរិស្ថាននៅក្នុងតំបន់ការពារបេតិកភណ្ឌពិភពលោកនេះ នេះបើតាមការលើកឡើងពី លោក ឡុង កុសល ប្រធាននាយកដ្ឋានផ្សព្វផ្សាយ និងជាអ្នកនាំពាក្យអាជ្ញាធរជាតិអប្សរា កាលពីថ្ងៃទី១៦ ខែមីនា ឆ្នាំ២០២០។
ក្រៅពីលើកកម្ពស់ទេសភាពបៃតង ព្រៃឈើក្នុងតំបន់អង្គរមានតួនាទីសំខាន់ ក្នុងការរក្សាទឹកនៅក្នុងស្រទាប់ដី និងទាក់ទាញទឹកភ្លៀង យកមករក្សាទុកក្នុងប្រភពទឹកសំខាន់ៗ ក្នុងតំបន់នេះ ដូចជា បារាយណ៍រាជដាក ឬបារាយណ៍ខាងជើង បារាយណ៍ខាងលិចឬបារាយណ៍ទឹកថ្លា កសិន្ធុអង្គរធំ កសិណអង្គរវត្ត។ ប្រភពទឹកសំខាន់ៗទាំងនេះ រួមនិងប្រព័ន្ធធារាសាស្ត្រខ្វាត់ខ្វែង ដែលបានបន្សល់ទុក តាំងពីសម័យបុរាណក្នុងតំបន់នេះ អាចរក្សាទឹក បានរហូតដល់ជាង១០០លានម៉ែត្រត្រីគុណ ក្នុងមួយឆ្នាំៗ សម្រាប់ប្រើប្រាស់ប្រើក្នុងវិស័យកសិកម្ម ជីវភាពប្រចាំថ្ងៃ ទប់លំនឹងប្រាសាទជាដើម។
លោក ឡុង កុសល អំពាវនាវ អប់រំដល់ប្រជាពលរដ្ឋ ចៀសវាងការកាប់ព្រៃឈើក្នុងតំបន់អភិរក្ស ទន្ទឹមនោះ អាជ្ញាធរជាតិអប្សរា បានខិតខំដាំកូនឈើបន្ថែម ដើម្បីពង្រីកគម្របព្រៃឈើ ព្រមទាំងលើកទឹកចិត្តដល់សាធារណៈ ចូលរួមដាំកូនឈើ លើផ្ទៃដីដែលអាជ្ញាធរបានត្រៀមទុកជាលក្ខណៈឯកជន និងជាក្រុម ផងដែរ។
ព័ត៌មានជាតិ ថ្មីៗ
អត្ថបទ និង រូបថត ៖ សេង ផល្លី
