តាមការប៉ាន់ស្មាន សម្ភារៈបរិក្ខារសុខាភិបាល ជាជំនួយរបស់ប្រទេសចិន ជូនចំពោះប្រទេសកម្ពុជា ដើម្បីប្រើប្រាស់ក្នុងការប្រយុទ្ធប្រឆាំង និងទប់ស្កាត់ការចម្លងវីរុសកូរ៉ូណានៅកម្ពុជា នឹងមកដល់រាជធានីភ្នំពេញតាមយន្តហោះ នារាត្រីថ្ងៃទី១៧ ខែមីនា ឆ្នាំ២០២០នេះ នេះបើតាមការផ្សាយតាមរយ: page Facebook ផ្លូវការរបស់ស្ថានទូតចិនប្រចាំនៅកម្ពុជា។
ជំនួយ ដែលភាគីចិននឹងប្រគល់ជូនជូនក្រសួងសុខាភិបាល នៃប្រទេសកម្ពុជា រួមមាន សារធាតុ Detection Reagent រួមមានក្លរីន សាប៊ូ អូសាវែលជាដើម សម្រាប់មនុស្ស ២០០០នាក់ ព្រមទាំងសម្លៀកបំពាក់ការពារ ម៉ាសវេជ្ជសាស្រ្ត និងសម្ភារៈផ្សេងទៀតជាបន្តបន្ទាប់។
ជំនួយរបស់ប្រទេសចិននាពេលនេះ ស្របពេលដែលប្រទេសកម្ពុជា កំពុងមានការកើនឡើងនៃអ្នកឆ្លងជំងឺកូវីត១៩ ជាបន្តបន្ទាប់។
តាមរបាយការណ៍របស់ក្រសួងសុខាភិបាលកម្ពុជា គិតត្រឹមព្រឹកថ្ងៃទី១៧ ខែមីនា ឆ្នាំ២០២០នេះ កម្ពុជាបានរកឃើញអ្នកមានផ្ទុកវីរុសកូរ៉ូណាសរុបចំនួន២៤ករណីហើយ ក្នុងនោះ រាជធានីភ្នំពេញ ៧ករណី, ខេត្តបាត់ដំបង ៤ករណី, ខេត្តកំពង់ចាម ៣ករណី, ខេត្តព្រះវិហារ ២ករណី, ខេត្តបន្ទាយមានជ័យ ២ករណី, កំពង់ឆ្នាំ ២ករណី, កំពត ១ករណី, ព្រះវិហារ ១ករណី, ខេត្តត្បូងឃ្មុំ ១ករណី និងខេត្តសៀមរាប ១ករណី។
ជាមួយគ្នានោះដែរ នៅថ្ងៃទី១៧ ខែមីនាដដែលនេះ សម្ដេចតេជោ បានបញ្ជាឲ្យបិទកន្លែងកំសាន្តខារ៉ាអូខេ និងរោងភាពយន្តទាំងអស់ នៅទូទាំងប្រទេសជាបណ្ដោះអាសន្ន ដើម្បីទប់ស្កាត់ការរីករាលដាលនៃ ការឆ្លងជំងឺកូវីត១៩នេះ។
គួររំលឹកថា នាពេលថ្មីកន្លងមកនេះ ប្រមុខរាជរដ្ឋាភិបាលកម្ពុជា ក៏បានណែនាំដល់សាលារៀនគ្រប់កម្រិតនៅទូទាំងប្រទេស អនុវត្តន៍វិស្សមកាលតូចមុនកាលកំណត់ រហូតដល់មានការជូនដំណឹងជាថ្មី ទន្ទឹមនោះគ្រឹះស្ថានឧត្តមសិក្សា ក៏ត្រូវផ្អាកការសិក្សាជាបណ្ដោះអាសន្នផងដែរ ។ បន្ថែមពីនោះ រាជរដ្ឋាភិបាលកម្ពុជា ក៏បានបិទជើងហោះពីសហរដ្ឋអាមេរិច ប្រទេសអ៊ឺរ៉ង់ បណ្ដាប្រទេសអឺរ៉ុបមួយចំនួន ដែលបាននិងកំពុងផ្ទុះការរាតត្បាតនៃជំងឺកូវីត១៩។
អត្ថបទ និង រូបថត ៖ សេង ផល្លី
