នាព្រឹកថ្ងៃទី២០ ខែមីនា ឆ្នាំ២០២០នេះ រដ្ឋបាលខេត្តសៀមរាបបានរៀបចំកិច្ចប្រជុំគណ:កម្មការប្រយុទ្ធនឹងជំងឺកូវីដ- ១៩ ក្រោមអធិបតីភាព លោក ពិន ប្រាកដ អភិបាលរងខេត្ត និងជាអនុប្រធានគណ:កម្មការប្រយុទ្ធនឹងជម្ងឺកូវីដ- ១៩ ខេត្ត និងវត្តមាន ឯកឧត្តម លោកជំទាវលោក លោកស្រី សមាជិក សមាជិកា រួមមាន នាយករដ្ឋបាលសាលាខេត្ត មេបញ្ជាការ មេបញ្ជាការរងកងកម្លាំងប្រដាប់អាវុធគ្រប់ប្រភេទ, ប្រធាន អនុប្រធានមន្ទីរ អង្គភាពជុំវិញខេត្ត, អភិបាល អភិបាលរងក្រុង ស្រុក នាយក នាយករងទីចាត់ការ និងមន្ត្រីជំនាញទីចាត់ការសាលាខេត្ត និងអ្នកពាក់ព័ន្ធជាច្រើនទៀតបានចូលរួម ។
កិច្ចប្រជុំនាពេលនេះដែរ គឺជាកិច្ចប្រជុំលើកដំបូងរបស់គណ:កម្មការ បន្ទាប់ពីបានបង្កើតឡើងកាលពីថ្ងៃទី១៧ ខែមីនា ឆ្នាំ២០២០កន្លងមក ក្រោមការណែនាំរបស់រាជរដ្ឋាភិបាលកម្ពុជា ហើយនៅថ្នាក់កណ្តាល ក៏មានបង្កើតគណ:កម្មការនេះដែរ មានឈ្មោះថា” គណ:កម្មការជាតិប្រយុទ្ធនឹងជម្ងឺកូវីដ- ១៩ កាលពីថ្ងៃទី១០ ខែមីនា កន្លងទៅ ។
បើតាម លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាបបានឲ្យដឹងថា គិតមកទល់វេលាម៉ោង២១:៣០ ថ្ងៃទី១៩ ខែមីនាឆ្នាំ២០២០ ក្នុងខេត្តសៀមរាបមាន ករណីវិជ្ជមាននៃមេរោគ COVID-19 តែ២ករណីប៉ុណ្ណោះ គឺ ករណីទី១ បុរសជនជាតិខ្មែរ អាយុ៣៨ឆ្នាំ ដែលឆ្លងពីបុរសជនជាតិជប៉ុន, ករណីទី២ គឺបុរសជនជាតិកម្ពុជា អាយុ៤០ឆ្នាំ ដែលបានឆ្លងមេរោគនេះមកពីប្រទេសម៉ាឡេស៊ី ។ ក្នុងនោះដែរពួកគាត់ទាំង២នាក់បាននឹងកំពុងតែដាក់នៅដោយឡែក ក្រោមការមើលថែ និងព្យាបាល ពីក្រុមគ្រូពេទ្យជំនាញ នៃមន្ទីរពេទ្យខេត្តសៀមរាប ហើយបច្ចុប្បន្នសុខភាពពួកគាត់ល្អធម្មតា ដោយក្រុមការងារមន្ទីរសុខាភិបាលខេត្ត បានអនុវត្តការងារយ៉ាងយកចិត្តទុកដាក់ ជាមួយនឹងអ្នកដែលប៉ះពាល់ដោយផ្ទាល់ និងដោយប្រយោលជាមួយបុរសទាំងពីរ យើងបានធ្វើវិភាគទៅលើប្រពន្ឋ និងគ្រួសារបុរសខ្មែរអាយុ៣៨ឆ្នាំ ដែលប៉ះពាល់ផ្ទាល់ជាមួយជនជាតិជប៉ុនជាច្រើលើកក្រោយពិនិត្យសំណាកពួកគាត់ពុំមានឆ្លងទេ ។
ព័ត៌មានជាតិ ថ្មីៗ
លោកវេជ្ជបណ្ឌិត បន្ថែមថា ចំពោះប្រពន្ឋកូន និងឱពុកក្មេកដែលបានប៉ះពាល់ដោយផ្ទាល់ជាមួយ បុរសខ្មែរឥស្លាមអាយុ ៤០ឆ្នាំ លទ្ឋផលវិភាគក៍អវិជ្ជមានដែរ។កិច្ចប្រជុំបានជជែកពិភាក្សាផ្លាស់ប្តូរយោបល់គ្នាដើម្បីរួមគ្នាបង្ការនិងទប់ស្កាត់ ការឆ្លងនៃជំងឺផ្លូវដង្ហើមប្រភេទថ្មី កូវីដ១៩ និរិះរកវិធីសាស្ត្រដើម្បីផ្សព្វផ្សាយដល់ប្រជាពលរដ្ឋនៅតាមមូលដ្ឋាន ឱ្យសំអាតអនាម័យជាប្រចាំ និងអប់រំគាត់កុំឱ្យភ័យស្លន់ស្លោទៅតាមអ្នកប្រើប្រាស់បណ្ដាញសង្គមមួយចំនួន បានប្រើប្រាស់ពាក្យសំដីមិនសមរម្យ និងបង្កការរើសអើងជាដើម ។ ជាមួយគ្នានោះ កិច្ចប្រជុំក៍បានផ្សព្វផ្សាយពីសេចក្តីណែនាំ ស្តីអំពីការផ្សព្វផ្សាយ អំពីវិធានការបង្ការ ទប់ស្កាត់ការរាត្បាតនៃជំងឺកូវីដ១៩នៅរដ្ឋបាលថ្នាក់ក្រោមជាតិ និងសេចក្តីណែនាំរបស់រដ្ឋបាលខេត្តស្តីអំពីវិធានការបង្ការ ទប់ស្កាត់ការរាត្បាតនៃជំងឺកូវីដ១៩ផងដែរ ។
មានប្រសាសន៍ក្នុងឱកាសនោះ លោក ពិន ប្រាកដ អភិបាលរងខេត្តសៀមរាប បានស្នើដល់បងប្អូនសាធារណជននូវចំនុចមួយចំនួន រួមមាន ៖១. សូមកុំធ្វើការផ្សព្វផ្សាយព័ត៌មាន ដែលធ្វើឱ្យប៉ះពាល់ដល់អត្តសញ្ញាណបុគ្គល និងការរើសអើង ព្រោះថា គ្មានអ្នកណាចង់ឱ្យកើតជំងឺនេះទេ ហើយជំងឺនេះមិនប្រកាន់ ពូជសាសន៍ សាសនា និងនិន្នាការនយោបាយឡើយ ព្រោះនេះជាពេលវេលាដែលយើងត្រូវរួមគ្នា ទប់ស្កាត់ និងកម្ចាត់ជំងឺនេះ មិនមែនជាការបន្ទោសគ្នានោះទេ ។ ២. សូមរួមគ្នាប្រយុទ្ធប្រឆាំងជំងឺកូវីដ១៩ និងបង្កើនស្មារតីការពារតាមវិធាននានា ដែលក្រសួង សុខាភិបាលបានណែនាំ និង ចូលរួមក្នុងកិច្ចសហការប្រយុទ្ធប្រឆាំងជាមួយព័ត៌មានក្លែងក្លាយ ពិសេសប្រយុទ្ធប្រឆាំងវីរុស COVID-19 ដែលកំពុងរីករាយដាលជាសកលនៅក្នុងដំណាក់កាលនេះ ដើម្បីជៀសវាងកុំឱ្យភាពច្របូកច្របល់ ការបាត់បង់សណ្ដាប់ធ្នាប់សង្គម និងកុំឱ្យមានការរើសអើង ។
លោក ពិន ប្រាកដ បន្ថែមទៀតថា ក្នុងនោះដែរសូមបងប្អូនប្រជាពលរដ្ឋទាំងអស់ដែលបានអញ្ជើញទៅទស្សនកិច្ចផ្លូវការ ទស្សនកិច្ចឯកជន ឬបំពេញការងារនៅបរទេស (បណ្តាប្រទេសនៅអ៊ឺរ៉ុប និងអាស៊ី) និងទើបត្រឡប់មកខេត្តសៀមរាបវិញ សូមមេត្តាជួយពិនិត្យសុខភាព ឬនៅដាច់ដោយឡែករយៈពេល ១៤ថ្ងៃ ។ ក្នុងករណីមានរោគសញ្ញា ឬចំណុចសង្ស័យណាមួយ សូមមេត្តាធ្វើការទំនាក់ទំនងមករដ្ឋបាលខេត្ត ឬមន្ទីរសុខាភិបាលខេត្ត ជាបន្ទាន់ និងការសហការ និងការផ្តល់ព័ត៌មានរបស់បងប្អូនប្រជាពលរដ្ឋ មករដ្ឋបាលខេត្ត និងមន្ទីរសុខាភិបាល គឺជាការចូលរួមយ៉ាងសំខាន់ ក្នុងការទប់ស្កាត់រីករាលដាលនៃវីរុសនេះ ៕
អត្ថបទ និង រូបភាព៖ យូ វង្ស
