ព្រឹត្តិការណ៍សមរាត្រី ឬព្រះអាទិត្យរះចំពីលើកំពូលប្រាង្គកណ្តាលប្រាសាទអង្គរវត្ត តែងលេចឡើង២ដង ក្នុងមួយឆ្នាំ ដែលត្រូវគេមើលឃើញថា បានទាក់ទាញភ្ញៀវទេសចរជាតិនិងអន្តរជាតិយ៉ាងច្រើនកុះករ មកទស្សនា និងផ្ដិតយករូបភាពដ៏អស្ចារ្យនេះ។ ថ្ងៃទី២៣ ខែមីនា ឆ្នាំ២០២០នេះ គឺជាថ្ងៃចុងក្រោយ ព្រឹត្តិការណ៍នេះ ដែលគេមើលឃើញថា មានការធ្លាក់ចុះចំនួនទេសចរដែលមកទស្សនា ដោយសារការភ័យខ្លាចនៃជំងឺកូវីត១៩។
អ្នកសិក្សាស្រាវជ្រាវនៃអាជ្ញាធរជាតិអប្សរា ធ្លាប់បានបង្ហាញថា ជារៀងរាល់ឆ្នាំសមរាត្រី(Equinox)តែងតែកើតមានពីរដងក្នុង១ឆ្នាំ ដោយនៅរដូវប្រាំង(VernalEquinox)កើតទ្បើងនៅក្នុងខែមីនា និងសមរាត្រីនៅរដូវវស្សា(Autumnal Equinox) កើតទ្បើងនៅក្នុងខែកញ្ញា។ សមរាត្រីជាវេលាដែលថ្ងៃ និងយប់មានរយៈពេលស្ទើរតែស្មើគ្នា។ ក្រៅពីនេះខែខ្លះ ពេលថ្ងៃមានរយៈពេលយូរជាងពេលយប់ ហើយខ្លះទៀតពេលយប់មានរយៈពេលយូរជាងពេលថ្ងៃវិញ។
ជាទូទៅ គេអាចមើលព្រះអាទិត្យរះចំពីលើកំពូលប្រាង្គកណ្តាលប្រាសាទអង្គរវត្ត នាព្រឹកព្រលឹមស្រាងៗ ចាប់ម៉ោង៥និង៥០នាទី ដល់ម៉ោងប្រហែល៧ព្រឹក ពីក្លោងទ្វារកណ្តាលនៃគុកតារាជ ឬក្លោងទ្វារធំខាងលិច។
លោក អ៊ឹម សុខរិទ្ធី អ្នកស្រាវជ្រាវរបស់មជ្ឈមណ្ឌលស្រាវជ្រាវ និងតម្កល់ឯកសារអង្គរ នៃអាជ្ញាធរជាតិអប្សរា ធ្លាប់បានពន្យល់ថា សម្រាប់ព្រឹត្តិការណ៍ថ្ងៃរះកំពូលកណ្តាលនៃប្រាសាទអង្គរវត្តនេះ គឺមិនមែនរះចំតាំងពីក្រោមរហូតដល់លើនោះទេ គឺថ្ងៃរះដំបូងនៅឈៀងខាងត្បូង ឬខាងស្តាំកំពូលកណ្តាលបន្តិច រហូតដល់អំឡុងម៉ោង៦:៣០នាទីព្រឹក ទើបថ្ងៃនេះបានរំកិលទៅចំពីលើកំពូលកណ្តាលនៃប្រាសាទអង្គរវត្ត ហើយការរះចំកណ្តាល និងកិបកំពូលប្រាង្គនៃប្រាសាទអង្គរវត្តនេះ គឺមានរយៈពេលតែប្រមាណ៥០វិនាទីប៉ុណ្ណោះ។ ព្រោះថា ព្រះអាទិត្យនេះ វាវិលរហូត វាមិនអាចនៅឱ្យហ្នឹងពីលើកំពូលប្រាសាទបានយូរនោះទេ។
អត្ថបទ និងរូបភាព៖ ឃុត សៅ និង ងិន គឹមឡេង
សម្រួលអត្ថបទ៖ សេង ផល្លី
