មកដល់នឹងពេលនេះ ករណីកូវីត-១៩ ពុំបានរកឃើញនៅតាមបណ្តាស្រុកទាំង១១ជុំវិញខេត្តសៀមរាបនៅឡើយនោះទេ បើទោះជាមានការព្រួយបារម្ភពីសំណាក់អាជ្ញាធរមូលដ្ឋាន ក្នុងពេលដែលពលករខ្មែរ បានវិលត្រឡប់មកកាន់មូលដ្ឋានដើមរបស់ខ្លួនវិញនោះ។ ជាក់ស្តែងស្រុកស្វាយលើនៃខេត្តសៀមរាប ដែលមានចម្ងាយប្រហែលជាង៧០គីឡូម៉ែត្រ នៅភាគខាងជើងឈាងខាងកើតនៃក្រុងសៀមរាប មានប្រជាពលរដ្ឋធ្វើចំណាកស្រុកចេញទៅធ្វើការក្រៅប្រទេសប្រមាណជាជាង៥០០នាក់ និងបានវិលត្រឡប់មកវិញជាង១០០នាក់ហើយនោះ ពុំបានរកឃើញករណីកូវីត-១៩នោះឡើយ បន្ទាប់ពីបងប្អូនពលករចំណាកស្រុកទាំងអស់នោះ ត្រូវបានដាក់ការរស់នៅដាច់ដោយឡែក និងតាមដានសុខភាពអស់រយៈពេល១៤ថ្ងៃហើយនោះ។
លោក ឡុង ហំ អភិបាលរងស្រុកស្វាយលើ បានអះអាងជាថ្មីម្តងទៀតនាព្រឹកថ្ងៃទី០៨មេសានេះ ក្នុងពេលដែលលោកដឹកនាំក្រុមការងារ ចុះធ្វើសកម្មភាពបាញ់ថ្នាំសម្លាប់មេរោគនៅផ្សារថ្មី និងផ្សព្វផ្សាយវិធានការទប់ស្កាត់ការរីករាលដាលកូវីត-១៩ នៅតាមខ្នងផ្ទះ និងទីតាំងលក់ទំនិញផ្សេងៗក្នុងទីរួមស្រុក។
លោកបន្តឲ្យដឹងថា ក្រុមការងាររបស់អនុគណកម្មការប្រយុទ្ធប្រឆាំងជម្ងឺកូវីត-១៩ របស់រដ្ឋបាលស្រុកស្វាយលើ ដែលឆ្ពោះទៅកាន់គោលដៅសហគមន៍ទាំង៥ឃុំ បានធ្វើកិច្ចការនេះជាប់ជាប្រចាំ ជាមួយនឹងការតាមដានវត្តមានមកដល់ថ្មី នៃបងប្អូនប្រជាពលករចំណាកស្រុក និងធ្វើសេចក្តីរាយការណ៍ប្រចាំថ្ងៃរៀងរាល់ល្ងាច ស្តីពីស្ថានភាពកូវីត១៩ ក្រោមការរៀបចំរួចជាស្រេចក្រុមការងារជំនាញ ដែលមានសមាសភាពសហការរវាងមន្រ្តីប្រចាំការនៅតាមបណ្តាមណ្ឌលសុខភាព អាជ្ញាធរមូលដ្ឋាន និងកម្លាំងសមត្ថកិច្ចអន្តរាគមន៍ ក្នុងនោះក៏មានកម្លាំងប្រជាការពារផងដែរ ដើម្បីចៀសវាងការឆ្លងពីខាងក្រៅ ៕
ព័ត៌មានជាតិ ថ្មីៗ
អត្ថបទ និង រូបភាព ងឹន គឹមឡេង
