នៅព្រឹកថ្ងៃទី០៨ ខែមេសា ឆ្នាំ២០២០ រដ្ឋបាលខេត្តសៀមរាប បានរៀបចំកិច្ចប្រជុំសាមញ្ញលើកទី១១ របស់ក្រុមប្រឹក្សាខេត្តសៀមរាប អាណត្តិទី៣ ក្រោមអធិបតីភាពឯកឧត្តម អ៊ឹង ហឿន ប្រធានក្រុមប្រឹក្សាខេត្ត និងឯកឧត្តម ទៀ សីហា អភិបាល នៃគណៈអភិបាលខេត្ត និង មានការចូលរួមពីឯកឧត្តម លោកជំទាវ សមាជិកក្រុមប្រឹក្សាខេត្ត និង លោក លោកស្រី អភិបាលរងខេត្ត និងមន្ទីរពាក់ព័ន្ធផងដែរ ។
ក្នុងកិច្ចប្រជុំសាមញ្ញលើកទី១១នេះ មានរបៀបវារៈចំនួន ៥ ដែលត្រូវដាក់ជូនក្រុមប្រឹក្សាពិនិត្យ ពិភាក្សា និង អនុម័ត ជា មួយនឹងរបៀបវារៈទាំងនេះ ឯកឧត្តម លោកជំទាវសមាជិកក្រុមប្រឹក្សាខេត្តក៏បានលើកឡើង នូវអំពីហេដ្ឋារចនាសម្ព័ន្ធដែលបានស្ថាបនារួចហើយ តែមិនទាន់បានសម្អាតឲ្យបានល្អដែលធ្វើឲ្យប៉ះពាល់ដល់បរិស្ថាននៅតាមដងផ្លូវ៣០ម៉ែត្រ ។
ក្នុងនោះឯកឧត្តម ទៀ សីហា ក៏បានរាយការណ៍បន្ថែមអំពីបញ្ហាជម្ងឺកូវីដ១៩ ដែលកើតមាននៅពេលបច្ចុប្បន្នកម្ពុជា ព្រមទាំងការរៀបចំកន្លែងសម្រាប់ដាក់ដោយឡែក ហើយក្រុមការងារប្រយុទ្ធប្រឆាំងនឹងជម្ងឺកូវីដ១៩ ក៏បានត្រៀមអគាររួចរាល់ដែរ មួយវិញទៀត យើងក៏ត្រូវត្រៀមកម្លាំង ដើម្បីចុះអប់រំផ្សព្វផ្សាយអំពីការឆ្លងជម្ងឺកូវីដ១៩ តាមការណែនាំរបស់រាជរដ្ឋាភិបាល និងក្រសួង សុខាភិបាលដល់ប្រជាពលរដ្ឋ ជាពិសេសបងប្អូនដែលទើបត្រឡប់មកពីក្រៅប្រទេស ព្រមទាំងមេភូមិទាំងអស់ ដែលជាជួរមុខ បន្ទាប់ពីក្រុមគ្រូពេទ្យ ដើម្បីពួកគាត់មានមូលដ្ឋានសម្រាប់ណែនាំបន្តទៀតផង ។ ម៉្យាងទៀតអាជ្ញាធរខេត្តបានរៀបចំ ក្រុមការងារ ចុះសួរសុខទុក្ខដល់បងប្អូនមេឃុំ មេភូមិ និង ប្រជាពលរដ្ឋផងដែរ ។
ដើម្បីឲ្យកាន់តែច្បាស់ លោកប្រធានមន្ទីរសុខាភិបាលក៏បានលើកពីបច្ចុប្បន្នភាពនៃស្ថានភាពជម្ងឺកូវីដ១៩ ដែលកើតមានឡើងក្នុងខេត្តសៀមរាប បានបញ្ជាក់ថា បងប្អូនដែលត្រឡប់មកពីក្រៅប្រទេសត្រូវដាក់ដោយឡែក១៤ថ្ងៃ ហើយត្រូវធ្វើចត្តាឡីស័កដោយខ្លួនឯង។ ម្យ៉ាងទៀត ចំពោះការពិនិត្យរកជម្ងឺកូវីដ១៩នេះ មន្ត្រីជំនាញបានពិនិត្យល្អិតល្អន់ណាស់ ដោយត្រូវយកសំណាកទៅពិនិត្យ ហើយសំណាកទាំងនោះមានកំហាក(ក្នុងច្រមុះនិងបំពង់ក) ឈាម និងលាមក ទឹកនោមទៀតផង ។ មួយវិញទៀត ប្រជាពលរដ្ឋដែលប៉ះពាល់ដោយប្រយោលជាមួយជនជាតិបារាំងនោះ គឺអវិជ្ជមានទាំងអស់ ដោយឡែកចំពោះបងប្អូនដែលត្រឡប់មកពីក្រៅប្រទេស ក៏មន្ត្រីជំនាញក៏បានយកចិត្តទុកដាក់ខ្ពស់ក្នុងការពិនិត្យ ក្នុងករណីសង្ស័យនោះ មន្ត្រីជំនាញនឹងពិនិត្យបន្ថែមចំនួនពីរដងទើបឲ្យគាត់នៅធម្មតាវិញ ។ ពាក់ព័ន្ធនឹងការព្យាបាលយើងមានបីក្រុមដោយមានពេទ្យជំនាញៗ ដោយប្រើប្រាស់បទពិសោធន៍មកពីប្រទេសចិន ហើយលទ្ធផលយើងទទួលបានគឺល្អ ដោយព្យាបាលជាសះស្បើយក្នុងខេត្តចំនួន៣នាក់ ក្នុងចំណោម ៧នាក់នោះ ។ ទន្ទឹមនឹងនេះ ឯកឧត្តម អភិបាលខេត្តក៏បានត្រៀមនូវអគារចំនួនបួនកន្លែងដើម្បីរៀបចំនៅពេលណាដែលមានជំងឺនេះកើនឡើងផងដែរ ហើយអគារទាំងនោះត្រូវបានបែងចែកទៅតាមសណ្ឋានរបស់អ្នកជម្ងឺ ។
ឯកឧត្តម អ៊ឹង ហឿន ក៏បានថ្លែងនូវអំណរគុណយ៉ាងជ្រាលជ្រៅចំពោះឯកឧត្តម អភិបាលខេត្ត ក៏ដូចជាមន្ទីរ អង្គភាពទាំងអស់ដែលបានយកចិត្តទុកដាក់ខ្ពស់ ក្នុងការដោះស្រាយរាល់បញ្ហាដែលបានលើកឡើងនេះ ពិសេសការទប់ស្កាត់ និងបង្កា ព្យាបាលជម្ងឺកូវីដ១៩ ។ ឯកឧត្តមប្រធានក្រុមប្រឹក្សាខេត្តក៏បានកោតសរសើរចំពោះមន្ត្រីយើងដែលមានការយកចិត្តទុកដាក់ដោយរក្សាអនាម័យស្របទៅតាមការណែនាំរបស់ក្រួងសុខាភិបាល ។ ជាមួយគ្នានេះ ឯកឧត្តម ក៏បានឲ្យថ្នាក់ដឹកនាំបន្តការផ្សព្វផ្សាយដល់ប្រជាពលរដ្ឋបានយល់ដឹងបន្ថែមទៀត ជាពិសេសតំបន់ទីប្រជុំជន យើងត្រូវអប់រំណែនាំ កាត់បន្ថយកុំឲ្យមានការជួបជុំគ្នា ជៀសវាងការចម្លងជម្ងឺ សំខាន់ក្នុងឱកាសបុណ្យចូលឆ្នាំខ្មែរខាងមុខនេះ ៕
អត្ថបទ និង រូបភាព ៖ ម៉ី សុខារិទ្ធ
