ការធ្វេសប្រហែស និងការមើលស្រាលលើឥទ្ធិលពលរីករាលដាលនៃវារុសកូវីត-១៩ បាននាំឲ្យពិភពលោកធ្លាក់ចូលក្នុងគ្រោះថ្នាក់ដែលមិនអាចគ្រប់គ្រងបាន ក្នុងនោះបណ្តាប្រទេសមួយចំនួននៅអ៊ឺរ៉ុបនិងសហរដ្ឋអាមេរិក បានទទួលរងដោយសោកនាដកម្មយ៉ាងធ្ងន់ធ្ងរ ក្រោមការសម្លាប់មនុស្សយ៉ាងរង្គាលគួរឲ្យរន្ធត់ ដែលស្ថានភាពនោះ វាជាមេរៀនដ៏ជាក់ស្តែង ដែលរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃនៃសម្តេចតេជោ ហ៊ុន សែន កំពុងព្យាយាមពុះពារបញ្ជៀសស្ថានភាពដ៏អាក្រក់ទាំងនោះ មិនឲ្យកើតមាននៅកម្ពុជានោះឡើយ អំពាវនាវឲ្យបងប្អូនប្រជាពលរដ្ឋគ្រប់មជ្ឈដ្ឋាន មន្រ្តីរាជការ រួមគ្នាអនុវត្តវិធានការនានាឲ្យមានប្រសិទ្ធភាពដែលដាក់ចេញដោយក្រសួងសុខាភិបាល។
ឯកឧត្តម សៅ សុភាព រដ្ឋលេខាធិការក្រសួងបរិស្ថាន ប្រធានក្រុមការងាររាជរដ្ឋាភិបាលចុះមូលដ្ឋានស្រុកស្វាយលើនៃខេត្តសៀមរាប បានលើកឡើងយ៉ាងដូច្នេះ នៅនារសៀលថ្ងៃទី០៧ ខែមេសា ឆ្នាំ២០២០ ក្នុងឱកាសជួបសំណេះសំណាលជាមួយបងប្អូនប្រជាពលករចំណាកស្រុកប្រមាណជាង១០០នាក់ ដែលបានវិលត្រឡប់មកពីប្រទេសថៃ ចូលទៅកាន់មូលដ្ឋានសហគមន៍របស់ខ្លួនវិញ។
ឯកឧត្តម បានបង្ហាញនូវក្តីអំណរសាទរផងដែរ ចំពោះសុវត្ថភាពនៃបងប្អូនពលករទាំងនោះ ដែលបានឆ្លងផុតការតាមដានត្រួតពិនិត្យសុខភាពយ៉ាងយកចិត្តទុកដាក់ ពីសំណាក់ក្រុមការងារថ្នាក់ស្រុកប្រយុទ្ធប្រឆាំងវារុសកូវីត-១៩ និងដាក់ខ្លួនឲ្យនៅដាច់ដោយឡែកពីគ្រួសារលើសពី១៤ថ្ងៃកន្លងមក។ យ៉ាងណាក៏ដោយ ការជួបសំណេះសំណាលដោយភ្ជាប់ជាមួយនឹងការផ្តាំផ្ញើមួយចំនួននោះ បានសង្កត់ធ្ងន់បន្ថែមទៅលើវិធានការនៃការជួបជុំ នឹងត្រូវបានកាត់បន្ថយឲ្យបានជាអតិបរិមា ពិសេសក្នុងពិធីបុណ្យចូលឆ្នាំថ្មី ប្រពៃណីជាតិខាងមុខ។
បើតាមសេចក្តីរាយការណ៍របស់លោក អៀង ពិសិដ្ឋ អភិបាលស្រុកស្វាយលើ បានឲ្យដឹងថា នៅក្នុងសម្រង់ស្ថិតិលើ៥ឃុំទូទាំងស្រុក មានប្រជាពលករចេញទៅធ្វើការនៅក្រៅប្រទេសចំនួន ៥៥៩នាក់ ( ស្រី២៧១នាក់ ) ក្នុងនេះ ៩៥ភាគរយចេញទៅធ្វើការនៅប្រទេសថៃ។ គិតត្រឹមថ្ងៃទី៦ ខែមេសានេះ មានប្រជាពលករត្រឡប់ចូលមកសហគម៍វិញចំនួន១១៣នាក់ ដែលអ្នកទាំងនោះបានឆ្លងកាត់ការដាក់ឲ្យនៅដាច់ដោយឡែកចំនួន១៤ថ្ងៃ តាមដានពិនិត្យសុខភាពយ៉ាងហ្មត់ចត់ ថាពុំមានករណីកូវីត-១៩នោះឡើយ។ លោកបញ្ជាក់ថា ក្រុមការងារនៃអនុគណកម្មការប្រយុទ្ធប្រឆាំងជម្ងឺកូវីត-១៩ថ្នាក់ស្រុក បានយកចិត្តទុកដាក់អនុវត្តកិច្ចការនេះជាប់ជាប្រចាំ។
លោក ស្រឿន ឈឿ ពលករចំណាកស្រុក រស់នៅភូមិ-ឃុំតាសៀម ស្រុកស្វាយលើ ដែលបានវិលចូលមកភូមិកំណើតវិញតាមច្រកព្រំដែនឡែម (ថៃ-កម្ពុជា) និយាយថា ខ្លួនត្រូវបានសមត្ថកិច្ចកម្ពុជា ធ្វើចត្តាឡីស័ក តាំងពីច្រកព្រំដែនរហូតដល់មូលដ្ឋានកំណើត ហើយខ្លួនលោកផ្ទាល់ ក៏មានការប្រុងប្រយ័ត្នដោយខ្លួនឯងផងដែរ ស្តាប់តាមការណែនាំរបស់ក្រុមការងារនិងអាជ្ញាធរដែនដី ដើម្បីសេចក្តីស្រឡាញ់ចំពោះគ្រួសារ បងប្អូន ញាតិមិត្ត នៅក្នុងសហគមន៍របស់ខ្លួន។
អត្ថបទ និង រូបភាព ងឹន គឹមឡេង
