គិតត្រឹមម៉ោង ១២ អាធ្រាត្រឈានចូលថ្ងៃទី១១ ខែមេសា ២០២០ អាជ្ញាធរខេត្តសៀមរាប បានទៅទទួលប្រជាពលរដ្ឋរបស់ខ្លួន ទើបត្រឡប់មកពីប្រទេសថៃ ចូលមកខេត្តសៀមរាប នៅតាមច្រកព្រំដែនកម្ពុជា-ថៃ សរុបចំនួន ១២៣នាក់។
តាមការឲ្យដឹងពីលោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្ត និងជាប្រធានក្រុមការងារចត្តឡីស័កខេត្តសៀមរាប នៅវេលាម៉ោងជិត ៤ទាបភ្លឺថ្ងៃដដែលនេះ បង្ហាញថា ប្រជាពលរដ្ឋ មកពីប្រទេសថៃ ៩៣នាក់ ក្នុងចំណោម ១២៣នាក់ បានរៀបចំឲ្យស្នាក់នៅដាច់ដោយឡែក រយៈពេល ១៤ថ្ងៃ នៅសាលាគរុកុសល្យ និងវិក្រឹត្យការខេត្ត ក្នុងក្រុងសៀមរាប ចំដោយរដ្ឋបាលខេត្តសៀមរាប។ ដោយឡែក ប្រជាពលរដ្ឋមកពីប្រទេសថៃចំនួន ៣០ នាក់ទៀត ត្រូវបានអាជ្ញាធរស្រុកចំនួន២ គឺស្រុកពួក និងស្រុកក្រឡាញ់ បាននាំយកទៅមូលដ្ឋានវិញ នឹងដាក់ឲ្យនៅដោយឡែករយ:ពេល១៤ថ្ងផងដែរ។
គួរជម្រាបថា ដើម្បីបង្ការ និងទប់ស្កាត់ ការរីករាលដាលនៃជំងឺកូវីដ១៩ ក្នុងឱកាសពិធីបុណ្យចូលឆ្នាំប្រពៃណីជាតិខ្មែរ ជាពិសេសការវិលត្រឡប់របស់ប្រជាពលរដ្ឋពីបរទេស ចូលមកខេត្តសៀមរាប រដ្ឋបាលខេត្ត បានរៀបចំទីតាំងអគារ ០៤កន្លែង ដែលបំពាក់ដោយគ្រឿងបរិក្ខារសមរម្យ សម្រាប់ទទួលប្រជាពលរដ្ឋទាំងនោះស្នាក់នៅដាច់ដោយឡែករយៈពេល ១៤ថ្ងៃ។
អត្ថបទ: សេង ផល្លី
