អំឡុងពិធីបុណ្យចូលឆ្នាំថ្មីប្រពៃណីជាតិខ្មែរ ចាប់ពីថ្ងៃទី១៣ ដល់ ទី១៥ ខែមេសា ឆ្នាំ២០២០នេះ រដ្ឋបាលខេត្តសៀមរាប នឹងចុះពិនិត្យវិធានការបង្ការទប់ស្កាត់ជំងឺកូវីដ១៩ នៅតាមក្រុងស្រុកទាំង១២ ក្នុងខេត្តសៀមរាប ដែលមានភូមិចំនួន ៩៥២ ជាមួយនោះ ក៏មានការ ចុះសួរសុខទុក្ខមេភូមិ អនុភូមិ និងសមាជិកភូមិ ផងដែរ។
ការចុះជួបសួរសុខទុក្ខនេះ ដឹកនាំដោយ ឯកឧត្តម ទៀ សីហា អភិបាលខេត្ត លោកអភិបាលរងខេត្ត និងសមាជិកក្រុមប្រឹក្សាខេត្តសៀមរាប នៅតាមគោលដៅនីមួយៗ ព្រមទាំងការចូលរួមពី សហភាពសហព័ន្ធយុវជនខេត្តសៀមរាប រួមនិងយុវជនស្ម័គ្រចិត្តគាំទ្រសកម្មភាពរាជរដ្ឋាភិបាលផងដែរ។
ការចុះជួបសួរសុខទុក្ខនេះដែរ ស្របពេលមានបទបញ្ជា របស់រាជរដ្ឋាភិបាលកម្ពុជា អំពីវិធានការបង្ការទប់ស្កាត់ជំងឺកូវីដ១៩ នៅតាមបណ្ដាខេត្តនាពេលថ្មីៗកន្លងមក ដូចជា ការផ្អាកការប្រាព្ធពិធីបុណ្យចូលឆ្នាំថ្មីប្រពៃណីជាតិខ្មែរ ការរឹតបណ្ដឹងការធ្វើដំណើរពីខេត្តមួយទៅខេត្តមួយក្នុងប្រទេស ដើម្បីបញ្ចាសការជួបជុំ ដែលអាចបង្កឲ្យមានអត្រាអ្នកឆ្លងជំងឺកូវីដ១៩ នៅក្នុងសហគមន៍។
តាមការឲ្យដឹងពីអាជ្ញាធរមូលដ្ឋាន ក្នុងខេត្តសៀមរាប បង្ហាញថា ទោះបីមានបទបញ្ជា ផ្អាកការប្រាព្ធពិធីបុណ្យចូលឆ្នាំថ្មីប្រពៃណីជាតិខ្មែរក៏ដោយ ក៏ប្រជាពលរដ្ឋខ្មែរមួយចំនួនតូច នៅតែបន្តចល័តចូលមកខេត្តសៀមរាប លើសពីនេះប្រជាពលរដ្ឋខ្មែរ មកពីបរទេសក៏បន្តវិលត្រឡប់ចូលមកក្នុងខេត្តសៀមរាបវិញ ក្នុងអំឡុងពិធីបុណ្យចូលឆ្នាំថ្មីនេះផងដែរ។
ការចុះជួបផ្ទាល់ជាមួយ មេភូមិ អនុភូមិ និងសមាជិកភូមិនេះដែរ គឺដើម្បីក្រើនរំលឹក និងបន្តផ្សព្វផ្សាយបន្ថែម ដល់អាជ្ញាធរ និងប្រជាពលរដ្ឋនៅតាមមូលដ្ឋានត្រូវបន្តមានការប្រុងប្រយ័ត្ន ទោះបីនៅក្នុងខេត្តសៀមរាប ពុំទាន់មានករណីឆ្លងថ្មី និងមានអ្នកជំងឺកូវីដ១៩ បានជាសះស្បើយជាបន្តបន្ទាប់ ប៉ុន្តែអាជ្ញាធរខេត្ត នៅតែយកចិត្តទុកខ្ពស់ អំពីបង្ការទប់ស្កាត់ការឆ្លងរីករាលដាលនេះ ខណៈនៅកម្ពុជា នៅតែបន្តមានករណីថ្មីឆ្លងជាបន្តបន្ទាប់។
ឆ្លៀតក្នុងឱកាសចុះសួរសុខទុក្ខ រយៈពេល៣ថ្ងៃ ចាប់ពីថ្ងៃទី១៣ ដល់ ទី១៥ ខែមេសា ឆ្នាំ២០២០ អាជ្ញាធរខេត្ត ក៏បាននាំយកអំណោយ រួមមាន មី សាប៊ូ ម៉ាស អង្ករ ជាមួយនិងថវិកាមួយចំនួន ជូនដល់មេភូមិ អនុភូមិ និងសមាជិកភូមិ ចំនួន ៩៥២ភូមិផងដែរ។
អត្ថបទ ៖ សេង ផល្លី
