នៅព្រឹកថ្ងៃទី១៤ ខែមេសា ឆ្នាំ២០២០នេះ លោក នាក់ ណេរ៉ុន អភិបាល រងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានដឹកនាំក្រុមការងារខេត្ត ចុះពិនិត្យមើលទីតាំងប្រចាំការរបស់ក្រុមការងារខេត្ត សម្រាប់ទទួលប្រជាពលរដ្ឋខ្មែរដែលបានវិលត្រឡប់មកពីប្រទេសថៃ នៅច្រកអូរស្មាច់ ខេត្តឧត្តរមានជ័យ ដើម្បីត្រៀមដឹកជញ្ជូនពួកគាត់ ត្រឡប់មកខេត្តសៀមរាប ។
លោក នាក់ ណេរ៉ុន មានប្រសាសន៍ថា គោលបំណងសំខាន់នោះគឺ ការដឹកជញ្ជូនពួកគាត់ប្រកបដោយសុវត្ថិភាព និង ការទប់ស្កាត់ការឆ្លងរាលដាលជំងឺកូវីដ១៩ ខណៈដែលបច្ចុប្បន្ននេះ កំពុងកើតមានឡើងនៅលើសកលលោក បណ្ដាលឲ្យស្លាប់មនុស្សរាប់ម៉ឺននាក់ ព្រោះពួកគាត់នឹងត្រូវស្នាក់នៅដាច់ដោយឡែកក្នុងរយៈពេល ១៤ ថ្ងៃ នៅទីកន្លែងដែលរដ្ឋបាលខេត្ត និង រដ្ឋបាលក្រុង ស្រុក បានត្រៀមរៀបចំទុកសម្រាប់ការស្នាក់នៅរបស់ពួកគាត់ ។
សូមបញ្ជាក់ថា បន្ទាប់ពីរដ្ឋបាលខេត្តសៀមរាប បង្កើតក្រុមការងារខេត្តទទួលបងប្អូនប្រជាពលរដ្ឋខ្មែរមកពីប្រទេសថៃរួចមក ក្រុមការងារខេត្ត បានចុះត្រួតពិនិត្យ និង បានបែងចែកមន្ត្រីប្រចាំការនៅតាមច្រកព្រំដែនសំខាន់ៗ រួមមាន ៖ ច្រកអូរស្មាច់ ខេត្តឧត្តរមាន ជ័យ , ច្រកប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ និង ច្រកដូង ខេត្តបាត់ដំបង ព្រមទាំងបានដឹកជញ្ជូនពួកគាត់ត្រឡប់មកខេត្តសៀមរាបវិញ ជាច្រើនរយនាក់ផងដែរ ៕
ព័ត៌មានជាតិ ថ្មីៗ
អត្ថបទ ៖ លោក លីវ សាន្ត
រូបថត ៖ លោក យូ វង្ស
