នាព្រឹកថ្ងៃទី១៤ ខែមេសា ឆ្នាំ២០២០នេះ ឯកឧត្ដម ទៀ សីហា អភិបាល នៃគណៈអភិបាលខេត្តសៀមរាប អមដំណើរដោយលោក លោកស្រី ជាអភិបាលរងខេត្ត ថ្នាក់ដឹកនាំមន្ទីរ អង្គភាពនានាក្នុងខេត្ត ក្រុមយុវជននៃសហភាពសហព័ន្ធយុវជនកម្ពុជាខេត្តសៀមរាប និង ក្រុមយុវជនស្ម័គ្រចិត្តគាំទ្ររាជរដ្ឋាភិបាល ចុះត្រួតពិនិត្យកម្លាំងចម្រុះដែលកំពុងនៅប្រចាំការលើគោលដៅព្រំប្រទល់ខេត្តសៀមរាបនិងខេត្តឧត្ដរមានជ័យ ក្នុងភូមិសាស្រ្តស្រុកស្រីស្នំ និង ជួបសំណេះ សំណាលជាមួយប្រជាពលរដ្ឋដែលទើបត្រឡប់មកពីប្រទេសថៃ នៅស្រុកស្រីស្នំ ដែលកំពុងស្នាក់នៅដាច់ដោយឡែកក្នុងរយៈពេល ១៤ ថ្ងៃ ដើម្បីត្រួតពិនិត្យចំពោះជំងឺកូវីដ១៩ ។
ក្នុងឱកាសចុះត្រួតពិនិត្យកម្លាំងចម្រុះប្រចាំការគោលដៅព្រំប្រទល់ខេត្តសៀមរាបនិងខេត្តឧត្ដរមានជ័យ ឯកឧត្ដម ទៀ សីហា អភិបាល ខេត្តសៀមរាប បានសម្ដែងនូវការកោតសរសើរចំពោះកងកម្លាំងចម្រុះដែលកំពុងប្រចាំការនៅគោលដៅនេះ ដែលបានយកអស់កម្លាំងកាយចិត្តបំពេញភារកិច្ច តាមតួនាទីរបស់ខ្លួនដោយស្មារតីទទួលខុសត្រូវខ្ពស់ ជាពិសេសការអនុវត្តនូវបទបញ្ជាលេខ០២ របស់រាជរដ្ឋភិបាលកម្ពុជា បានយ៉ាងខ្ជាប់ខ្ជួន ប្រកបដោយប្រសិទ្ធ ភាព សំដៅរួមចំណែកក្នុងការទប់ស្កាត់ការឆ្លងរាលដាលជំងឺកូវីដ១៩ ខណៈដែលបច្ចុប្បន្ននេះ កំពុងកើតមានឡើងនៅលើសកលលោក បណ្ដាលឲ្យស្លាប់មនុស្សរាប់ម៉ឺននាក់ ។
ឯកឧត្ដម ទៀ សីហា បានណែនាំ និង ផ្ដាំផ្ញើដល់កងកម្លាំងចម្រុះដែលកំពុងប្រចាំការគោលដៅព្រំប្រទល់ខេត្តសៀមរាប និង អាជ្ញាធរស្រុកស្រីស្នំ ត្រូវបង្កើនស្មារតីការយកចិត្តទុកដាក់បន្តទៀត តាមបទបញ្ជាលេខ០២ របស់រាជរដ្ឋភិបាលកម្ពុជា ឲ្យបានម៉ឺងម៉ាត់បំផុត ហើយដើម្បីជាការលើកទឹកចិត្ត ឯកឧត្ដម ទៀ សីហា បានជូនថវិកាមួយចំនួនដល់កងកម្លាំងចម្រុះប្រចាំការគោលដៅព្រំប្រទល់ខេត្តសៀមរាបនិងខេត្តឧត្ដរមានជ័យ ក្នុងភូមិសាស្រ្តស្រុកស្រីស្នំ សម្រាប់ដោះស្រាយជីវភាពប្រចាំថ្ងៃ ។
បន្ទាប់មកឯកឧត្ដម ទៀ សីហា អភិបាលខេត្តសៀមរាប និង ប្រតិភូអមដំណើរ បានចុះជួបសំណេះសំណាលជាមួយប្រជាពលរដ្ឋដែលទើបត្រឡប់មកពីប្រទេសថៃ នៅស្រុកស្រីស្នំ ចំនួន១៧នាក់ ដែលកំពុងស្នាក់នៅដាច់ដោយឡែកក្នុងរយៈពេល ១៤ ថ្ងៃ នៅសាលាអនុវិទ្យាល័យប្រីយ៍ ក្នុងឃុំប្រីយ៍ ព្រមទាំងបានសម្ដែងនូវការអរគុណចំពោះបងប្អូនប្រជាពលរដ្ឋដែលទើបត្រឡប់មកពីប្រទេសថៃ ដែលមានទីលំនៅក្នុងស្រុកស្រីស្នំនេះ ដែលបានស្ម័គ្រចិត្តស្នាក់នៅដាច់ដោយឡែកក្នុងរយៈពេល ១៤ ថ្ងៃ ដើម្បីតាមដាន និងត្រួតពិនិត្យករណីជំងឺកូវីដ១៩ តាមការអំពាវនាវរបស់រាជរដ្ឋាភិបាល ដែលទង្វើនេះជាសក្ខីភាពមួយរបស់បងប្អូន ដែលបញ្ជាក់ថាបានចូលរួមចំណែកមួយយ៉ាងសំខាន់បំផុតជាមួយរាជរដ្ឋាភិបាលកម្ពុជា ក្នុងការទប់ស្កាត់ការឆ្លងរាលដាលនៃជំងឺកូវីដ១៩ ។
ឯកឧត្ដម ទៀ សីហា បានផ្ដាំផ្ញើដល់បងប្អូនទាំងអស់ សូមស្ដាប់តាមការណែនាំរបស់មន្ត្រីសុខាភិបាល ព្រោះថាប្រសិនបើយើងគ្មានជំងឺ ក្រុមគ្រួសារយើង និង សហគមន៍យើង ក៏មិនមានជំងឺដែរ ដូច្នេះស្ថិតក្នុងដំណាក់កាលនៃសកលលោកកំពុងកើតមានជំងឺកូវីដ ១៩ នេះ សូមបងប្អូនទាំងអស់ត្រូវចេះអំពីវិធីការពារការឆ្លងជំងឺកូវីដ១៩ ដូចជា ៖ លាងដៃឱ្យបានញឹកញាប់ជាមួយសាប៊ូ នឹងទឹកស្អាត ឬទឹក អាល់កុលលាងដៃ , ខ្ទប់មាត់ និងច្រមុះ នៅពេលក្អក ឬកណ្ដាស់ ដោយកន្សែង ក្រមា ក្រដាស ឬដោយកែងដៃ , ចៀសវាងប៉ះពាល់ជិតស្និទ្ធជាមួយអ្នកដែលមានគ្រុនក្ដៅ និងក្អក ឬផ្ដាសាយ , ចៀស វាង ប៉ះពាល់ភ្នែក ច្រមុះ ឬមាត់ , ត្រូវចម្អិនសាច់ ឬស៊ុតឱ្យបានឆ្អិនល្អ និង ចៀសវាងប៉ះពាល់ជាមួយសត្វព្រៃរស់ ឬកន្លែងចិញ្ចឹមសត្វ ដោយគ្មានពាក់សម្ភារការពារខ្លួន ។
បន្ទាប់មកទៀតឯកឧត្ដម ទៀ សីហា អភិបាលខេត្តសៀមរាប និង ប្រតិភូអមដំណើរ បានជួបសំណេះសំណាលជាមួយអាជ្ញាធរ ឃុំ មេភូមិ អនុភូមិ និង សមាជិកភូមិទាំងអស់ក្នុងស្រុកស្រីស្នំ ព្រមទាំងបានបញ្ជាក់ថា ការចុះជួបសួរសុខទុក្ខនាពេលនេះ គឺស្របពេលមានបទបញ្ជារបស់រាជរដ្ឋាភិបាលកម្ពុជា អំពីវិធានការបង្ការទប់ស្កាត់ជំងឺកូវីដ១៩ នៅតាមបណ្ដាខេត្តនាពេលថ្មីៗកន្លងមក ដូចជាការផ្អាកការប្រាព្ធពិធីបុណ្យចូលឆ្នាំថ្មីប្រពៃណីជាតិខ្មែរ ដើម្បីបញ្ចៀសការជួបជុំ និង ការរឹតបណ្ដឹងការធ្វើដំណើរពីខេត្តមួយទៅខេត្តមួយក្នុងប្រទេស ដែលអាចបង្កឲ្យមានអត្រាអ្នកឆ្លងជំងឺកូវីដ១៩ នៅក្នុងសហគមន៍ ដូច្នេះក្នុងឱកាសនេះ សូមលោកមេភូមិ អនុភូមិ និងសមាជិកភូមិទាំងអស់ បន្តផ្សព្វផ្សាយបន្ថែមដល់ប្រជាពលរដ្ឋនៅតាមមូលដ្ឋាន ត្រូវឲ្យមានការប្រុងប្រយ័ត្នចំពោះករណីឆ្លងថ្មីនៃជំងឺកូវីដ១៩ ទោះបីនៅក្នុងខេត្តសៀមរាប ពុំទាន់មានករណីឆ្លងថ្មី និងមានអ្នកជំងឺកូវីដ១៩ បានជាសះស្បើយជាបន្តបន្ទាប់ក៏ដោយ ក៏ត្រូវតែយកចិត្តទុកខ្ពស់ អំពីបង្ការទប់ស្កាត់ការឆ្លងរីករាលដាលនៃជំងឺនេះ ។
ដើម្បីជាការលើកទឹកចិត្ត ឯកឧត្ដម ទៀ សីហា បានជូនអំណោយ ជាគ្រឿងឧបភោគបរិភោគ និងថវិកាមួយចំនួនដល់មេភូមិ អនុភូមិ និង សមាជិកភូមិទាំងអស់ក្នុងស្រុកស្រីស្នំ សម្រាប់ដោះស្រាយជីវភាពប្រចាំថ្ងៃ ៕
អត្ថបទ ៖ លោក លីវ សាន្ត
រូបថត ៖ សហការី
