នាព្រឹកថ្ងៃទី១៥ ខែមេសា ឆ្នាំ២០២០នេះ លោក ពៅ ពិសិដ្ឋ អភិបាល រងខេត្ត តំណាងឯកឧត្ដម ទៀ សីហា អភិបាល នៃគណៈអភិបាលខេត្តសៀមរាប អមដំណើរដោយលោក លោកស្រី ជាថ្នាក់ដឹកនាំមន្ទីរ អង្គភាពនានាក្នុងខេត្ត ក្រុមយុវជននៃសហភាពសហព័ន្ធយុវជនកម្ពុជាខេត្តសៀមរាប ក្រុមយុវជនស្ម័គ្រចិត្តគាំទ្ររាជរដ្ឋាភិបាល អាជ្ញាធរស្រុក និង ឃុំ បាន ជួបសំណេះសំណាលជាមួយមេភូមិ អនុភូមិ និង សមាជិកភូមិចំនួន៤ភូមិ ក្នុងឃុំស្រែណូយ ស្រុកវ៉ារិន ។
មានប្រសាសន៍ក្នុងឱកាសនោះ លោក ពៅ ពិសិដ្ឋ អភិបាលរងខេត្តសៀមរាប បានសម្ដែងនូវការអរគុណចំពោះលោកមេភូមិ អនុភូមិ និង សមាជិកភូមិ ទាំងអស់ក្នុងស្រុកវ៉ារិន ដែលកន្លងមកបានខិតខំប្រឹងប្រែងអស់ពីកម្លាំងកាយចិត្ត ប្រាជ្ញានិងស្មារតី ក្នុងការចុះអប់រំ ផ្សព្វផ្សាយ និង ណែនាំដល់បងប្អូនប្រជាពលរដ្ឋក្នុងភូមិ អំពីវិធានការការពារ និង ទប់ស្កាត់ការឆ្លងរីករាលដាលនៃជំងឺកូវីដ-១៩ គ្រប់ពេលវេលាបានយ៉ាងទៀងទាត់ ប្រកបដោយស្មារតីទទួលខុសត្រូវខ្ពស់ ស្របតាមគោលការណ៍ណែនាំរបស់រាជរដ្ឋាភិបាល ក្រសួងសុខាភិបាល អាជ្ញាធរខេត្ត និង អាជ្ញាធរគ្រប់លំដាប់ថ្នាក់ ។
លោក ពៅ ពិសិដ្ឋ មានប្រសាសន៍ទៀតថា រាជរដ្ឋាភិបាលកម្ពុជា បានចេញបទបញ្ជាមួយ ស្ដីអំពីវិធានការបង្ការទប់ស្កាត់ជំងឺកូវីដ១៩ នៅតាមបណ្ដាខេត្តនាពេលថ្មីៗកន្លងមក ដូចជាការផ្អាកការប្រាព្ធពិធីបុណ្យចូលឆ្នាំថ្មីប្រពៃណីជាតិខ្មែរ ដើម្បីបញ្ចៀសការជួបជុំ និង ការរឹតបណ្ដឹងការធ្វើដំណើរពីខេត្តមួយទៅខេត្តមួយក្នុងប្រទេស ដែលអាចបង្កឲ្យមានអត្រាអ្នកឆ្លងជំងឺកូវីដ១៩ នៅក្នុងសហគមន៍ ដូច្នេះក្នុងឱកាសនេះ សូមលោកមេភូមិ អនុភូមិ និងសមាជិកភូមិទាំងអស់ បន្តផ្សព្វផ្សាយបន្ថែមដល់ប្រជាពលរដ្ឋនៅតាមមូលដ្ឋានបន្ថែមទៀត ត្រូវឲ្យពួកគាត់មានការប្រុងប្រយ័ត្នចំពោះករណីឆ្លងថ្មីនៃជំងឺកូវីដ១៩ បើទោះបីនៅក្នុងខេត្តសៀមរាប ពុំទាន់មានករណីឆ្លងថ្មី និងមានអ្នកជំងឺកូវីដ១៩ បានជាសះស្បើយជាបន្តបន្ទាប់ក៏ដោយ ក៏ត្រូវតែយកចិត្តទុកខ្ពស់ អំពីបង្ការទប់ស្កាត់ការឆ្លងរីករាលដាលនៃជំងឺនេះ ។
ព័ត៌មានជាតិ ថ្មីៗ
លោកអភិបាលរងខេត្តសៀមរាប មានប្រសាសន៍បន្ថែមទៀតថា បញ្ហាសំខាន់មួយទៀតនោះ គឺត្រូវពន្យល់ដល់បងប្អូនប្រជាពលរដ្ឋទាំងអស់នៅក្នុងភូមិ ត្រូវជឿជាក់លើការព្យាបាលជំងឺកូវីដ១៩ របស់ក្រុមគ្រូពេទ្យកម្ពុជាយើង ដែលមកទល់ព្រឹកថ្ងៃទី១៥ ខែមេសានេះ ក្រុមគ្រូពេទ្យកម្ពុជា បានព្យាបាលអ្នកជំងឺកូវីដ១៩ ជាសះស្បើយសរុបចំនួន៩៦នាក់ហើយ ក្នុងចំណោមអ្នកឆ្លងជំងឺកូវីដ១៩ ចំនួន១២២ នាក់ ដូច្នេះត្រូវពន្យល់គាត់ ដោយមិនត្រូវឲ្យពួកគាត់ជឿលើអបិយជំនឿនោះទេ ខណៈកន្លងមកធ្លាប់មានព័ត៌មានបំផុសបំផុល បំភ្លៃការពិត ដូចជាការហូបពងមាន់ ការធ្វើយ័ន្ត ឬការនិមន្តព្រះសង្ឃស្រោចទឹក ជាដើម ដែលគេបានអះអាងថា អាចការពារការឆ្លងនូវជំងឺកូវីដ១៩នេះ ។
ដើម្បីជាការលើកទឹកចិត្ត លោក ពៅ ពិសិដ្ឋ បានជូនជាគ្រឿងឧបភោគបរិភោគ និងថវិកាមួយចំនួនដល់មេភូមិ អនុភូមិ និង សមាជិកភូមិ សម្រាប់ដោះស្រាយជីវភាពប្រចាំថ្ងៃ ៕
អត្ថបទ ៖ លោក លីវ សាន្ត
រូបថត ៖ ធន់ ពូថេ
