អភិបាលស្រុកប្រាសាទបាគង ដឹកនាំសប្បុរសជន ចុះសួរសុខទុក្ខ និងចែកអំណោយដល់គ្រួសារយោធិនពិការ៣១៧សៀមរាប
កាលពីរសៀលថ្ងៃទី១៨ ខែមេសា ឆ្នាំ២០២០ម្សិលមិញនេះ លោក សូរ ប្លាតុង អភិបាលស្រុកប្រាសាទបាគង បានដឹកនាំសប្បុរសជន ចុះសួរសុខទុក្ខ និង នាំយកអំណោយមានអង្ករ ត្រីខ មី ស្កសរ អំបិល ទឹកត្រី ទឹកស៊ីអ៊ីវ និងសាប៊ូ ចែកជូនគ្រួសារយោធិនពិការ នៅមជ្ឈមណ្ឌល អភិវឌ្ឍន៍យោធិនពិការ សម្តេចតេជោ ហ៊ុន សែន គូលេន ៣១៧សៀមរាប ចំនួន៣០០គ្រួសារ ក្នុងនោះមាន ៖យោធិនពិការ ចំនួន ២៧៣គ្រួសារ , គ្រូបង្រៀនស្ម័គ្រចិត្ត ២៥ គ្រួសារ, ពេទ្យឆ្មប ស្ម័គ្រចិត្ត ០២គ្រួសារ ដែលមានសមាជិកសរុបចំនួន ១.៣០០ នាក់ ស្ថិតក្នុងភូមិស្នារតេជោ ឃុំបាល័ង្គ ស្រុកប្រាសាទបាគង ខេត្តសៀមរាប ។
ព័ត៌មានជាតិ ថ្មីៗ
ឯកឧត្តម ឧត្តមសេនីយឯក ពៅ ស៊ា នាយកមជ្ឈមណ្ឌល អភិវឌ្ឍន៍យោធិនពិការ សម្តេចតេជោហ៊ុនសែន គូលេន ៣១៧ សៀមរាប បានឲ្យដឹងថា៖ ដោយមានការយកចិត្តទុកដាក់ ឧបត្ថម្ភជាបន្តបន្ទាប់ពី សម្តេចអគ្គមហា សេនា បតីតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទាំង ក្រសួងការពារជាតិ ថ្នាក់ដឹកនាំគ្រប់ជាន់ថ្នាក់ និងសប្បុរសជន បានធ្វើអោយបងប្អូនយោធិនពិការ និងគ្រួសារ មានលំនឹងលើផ្នែក ជីវភាពរស់នៅ បានល្អប្រសើរហូតមកដល់សព្វថ្ងៃនេះ ។
មានប្រសាសន៍ក្នុងឱកាសនោះ លោក សូរ ប្លាតុង អភិបាលស្រុកប្រាសាទបាគង បានពាំនាំនូវការសួរសុខទុក្ខពីលោកអភិបាលខេត្តសៀមរាប ដោយលោកមានភារៈកិច្ចត្រូវបំពេញច្រើនមិនបានចូលរួម ព្រមទាំងបានថ្លៃងអំណរគុណនូវការផ្តួចផ្តើមគំនិតឲ្យមានការជួបជុំថ្ងៃនេះសម្រាប់ការចុះសួរសុខទុក្ខ ក្រុមគ្រួសារយោធិនពិការ៣១៧គូលេនសៀមរាប ដោយបានឯកភាពគ្នាជាមួយមជ្ឈមណ្ឌលនិងរដ្ឋបាលស្រុក ហើយក្នុងគំរោងត្រូវរៀបចំធ្វើរមុខថ្ងៃចូលឆ្នាំប្រពៃណីជាតិខ្មែរ ប៉ុន្តែដោយសារសន្ថានភាពមានការប្រែប្រួល ដូចនេះត្រូវបានលើកពេលមកដល់ពេលនេះ ។
លោក សូរ ប្លាតុង បានថ្លែងអំណរគុណដល់គ្រួសារយោធិនដែលរយៈពេលចូលឆ្នាំនេះ ឃើញថាបងប្អូនបានចូលរួមអនុវត្តន៍តាមនូវបទបញ្ជារបស់រាជរដ្ឋាភិបាល និងការណែនាំរបស់ក្រសួងសុខាភិបាល ដើម្បីប្រយុទ្ធប្រឆាំងកុំឲ្យមានការរីករាលដាលការឆ្លងមេរោគកូវីដ ១៩ ដែលបច្ចុប្បន្នមិនមែនមានត្រឹមតែក្នុងប្រទេសកម្ពុជានោះទេ គឺរាតត្បាតទូទាំងពិភពលោក ហើយបច្ចុប្បន្នប្រទេសមួមចំនួនកំពុងតែមានសភាពធ្ងន់ធ្ងរ ដូច្នេះការលើកពេលចូលឆ្នាំមិនបានប្រារព្ធនេះគឺជាព្រឹត្តិការណ៍ប្រវត្តិសាស្ត្រ ដែលកន្លងមកកម្ពុជាមិនដែលលើកថ្ងៃចូលឆ្នាំនោះទេ ហើយមូលហេតុដែលត្រូវលើកពេលនេះគឺដោយសារតែការរាត្បាតនៃជំងឺកូវីដ១៩នេះ ទូទាំងពិភពលោក ។
លោកសូរ ប្លាតុង បញ្ជាក់ទៀតថា បច្ចុប្បន្ននេះយោងតាមរបាយការណ៍របស់ក្រសួងសុខាភិបាល គឺអត់មានអ្នកឆ្លងថ្មីនោះទេ មានតែអ្នកជាសះស្បើយ ប៉ុន្តែពិភពលោកកំពុងតែជួបសោកនាសកម្ម ដោយពុំមានវ៉ាក់សាំងការពារឬថ្នាំព្យាបាលនូវឡើយទេ ហេតុនេះបងប្អូនត្រូវបន្តការប្រុងប្រយ័ត្នឲ្យបានគ្រប់ៗគ្នា ដែលជាសំណាងរបស់កម្ពុជា ដោយមិនមានឆ្លងតាមសហគមន៍ ទាំងនេះជាការយកចិត្តទុកដាក់របស់រដ្ឋាភិបាលដែលមានគតិបណ្ឌិតក្នុងកិច្ចការនេះ បានដាក់ចេញនូវវិធានការទប់ស្កាត់ជាបន្តបន្ទាប់ និងការចូលរួមអនុវត្តន៍ពីប្រជាពលរដ្ឋ ហើយសូមបន្តចូលរួមកិច្ចការងារនេះ រហូតដល់គេប្រកាសថាលែងមានមេរោគកូវីដ១៩នេះ។
លោក ង៉ាយ ម៉េងលី តំណាងគ្រួសារបុរីចំប៉ីសៀមរាបថ្លែងថា៖ អំណោយដែលបានមកពីសប្បុរសជនរួមជាមួយគ្រួសារបុរីចំប៉ីសៀមរាបយកមកផ្តល់ជូនពេលនេះ ជាការតបស្នងនៅស្នាមញញឹមដែលបងៗយុទ្ធជន ដែលបានផ្តល់មកដល់កូនចៅជំនាន់ក្រោយ អំណោយទាំងនេះគឺជាអ្វីដែលពួកគាត់អាចធ្វើរបាន និងសូមឲ្យបងប្អូនបន្តការរក្សាអនាម័យ តាមការណែនាំរបស់រាជរដ្ឋាភិបាលនិងក្រសួងសុខាភិបាល ចូលរួមទប់ស្កាត់ការរីករាលដាលនៃមេរោគកូវីដ១៩ទាំងអស់គ្នា ៕
អត្ថបទ និង រូបថត ៖ លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
