បន្ទាប់ពីពិធីបុណ្យចូលឆ្នាំថ្មីប្រពៃណីជាតិខ្មែរ បានបញ្ចប់ នាព្រឹកថ្ងៃទី១៩ ខែមេសា ឆ្នាំ២០២០នេះ ឯកឧត្ដម ស៊ាន បូរ៉ាត រដ្ឋលេខាធិការក្រសួងអប់រំ យុវជន និង កីឡា និងជាប្រធានក្រុមងាររបស់រាជរដ្ឋាភិបាលចុះមូលដ្ឋានស្រុកស្រីស្នំ និង ឯកឧត្ដម ស៊ិន រុន អនុប្រធានក្រុមងារថ្នាក់ខេត្តចុះមូលដ្ឋានស្រុកស្រីស្នំ បានបើកកិច្ចប្រជុំបូកសរុបសកម្មភាពការងារចុះអប់រំ និង ផ្សព្វផ្សាយដល់ប្រជាពលរដ្ឋ ស្ដីពីការការពារនិងទប់ស្កាត់ការឆ្លងរាលដាលជំងឺកូវីដ១៩ នៅក្នុងស្រុកស្រី ស្នំ ខេត្តសៀមរាប ដែលមានការចូលរួមពី ឯកឧត្តម លោកជំទាវ លោក លោកស្រី ជាសមាជិកក្រុមងាររបស់រាជរដ្ឋាភិបាលចុះមូលដ្ឋានស្រុកស្រីស្នំ សមាជិកក្រុមងារថ្នាក់ខេត្តចុះមូលដ្ឋានស្រុកស្រីស្នំ អភិបាល និងអភិបាលរងស្រុកស្រីស្នំ មេឃុំទាំងអស់ក្នុងស្រុក និង មន្ត្រីជាក្រុមការងារក្នុងស្រុកស្រីស្នំជាច្រើនរូបទៀត ។
តាមរបាយការណ៍របស់លោក ហ៊ន់ ឫទ្ធិ អភិបាលស្រុកស្រីស្នំ គិតចាប់ពីថ្ងៃទី១៩ ខែមីនា មកដល់ថ្ងៃទី១៨ ខែមេសា ឆ្នាំ២០២០នេះ ក្នុងស្រុកស្រីស្នំ មានប្រជាពលរដ្ឋ ដែលទើបត្រឡប់មកពីបរទេសចំនួន ១,៤៩២នាក់ ក្នុងនោះស្រីចំនួន ៤៧១នាក់។ ទន្ទឹមនោះ រដ្ឋបាលស្រុក បានណែនាំដល់ អាជ្ញាធរមូលដ្ឋាន មានវិធានការ អប់រំ និង ណែនាំពួកគាត់ឲ្យទៅពិនិត្យសុខភាពនៅមណ្ឌលសុខភាពបានគ្រប់ៗគ្នា ព្រមទាំងណែនាំពួកគាត់ ឲ្យស្នាក់នៅដាច់ឡែករយៈពេល១៤ថ្ងៃ នៅតាមលំនៅដ្ឋានរៀងៗខ្លួន និង នៅតាមទីតាំង ដែលរដ្ឋបាលស្រុកបានរៀបចំទុកជាមុនមក។
លោកអភិបាលស្រុក បានបញ្ជាក់ថា ដោយសារស្រុកស្រីស្នំជាស្រុកមានព្រំប្រទល់ជាប់នឹងខេត្តឧត្តរមានជ័យ រដ្ឋបាលស្រុក បានយកចិត្តទុកដាក់ខ្ពស់ក្នុងការអនុវត្តន៍ការងារទប់ស្កាត់ បង្ការ និង ការពារជំងឺកូវីដ១៩ ដោយបានបែងចែកក្រុមការងារជាច្រើនក្រុម ចុះផ្សព្វផ្សាយ និងអប់រំ នៅតាមឃុំ និង ភូមិទូទាំងស្រុក រួមមាន ការចាក់មេក្រូចល័តតាមទីប្រជុំជននានា ការចុះបិទខិតបណ្ណតាមទីសាធារណៈ ការចុះចែកខិតបណ្ណ និង អប់រំណែនាំដោយផ្ទាល់ដល់ប្រជាពលរដ្ឋនៅតាមខ្នងផ្ទះ ។ល។ គិតមកដល់ពេលនេះ ក្នុងស្រុកស្រីស្នំ នៅមិនទាន់មានប្រជាពលរដ្ឋណាម្នាក់ មានផ្ទុកមេរោគកូវីដ១៩នេះឡើយ ។
មានប្រសាសន៍ក្នុងឱកាសនេះ ឯកឧត្ដម ស៊ាន បូរ៉ាត បានថ្លែងនូវការកោតសរសើរដល់រដ្ឋបាលស្រុក និង មន្ត្រីក្រុមការងារទាំងអស់ ដែលបានខិតខំប្រឹងប្រែង អនុវត្តន៍តាមបទបញ្ជា និងសេចក្ដីណែនាំរបស់រាជរដ្ឋាភិបាលកម្ពុជា ក្រសួងសុខាភិបាល និង រដ្ឋបាលខេត្តសៀមរាប ជុំវិញការបង្ការ និង ទប់ស្កាត់ការឆ្លងរាលដាលនៃជំងឺកូវីដ១៩នេះ ។
បច្ចុប្បន្ននេះ នៅកម្ពុជាមានភាពធូរស្រាលចំពោះការឆ្លងជំងឺកូវីដ១៩ ដោយសារតែប៉ុន្មានថ្ងៃចុងក្រោយនេះ មិនមានករណីឆ្លងថ្មី និងមានចំនួនអ្នកជាសះស្បើយជារៀងរាល់ថ្ងៃ។ ទោះជាយ៉ាងណាក៏ដោយ ឯកឧត្ដមរដ្ឋលេខាធិការ បានណែនាំដល់ រដ្ឋបាលស្រុក ត្រូវបន្តអនុវត្តន៍តាមបទបញ្ជា និងសេចក្ដីណែនាំរបស់ណែនាំរបស់រាជរដ្ឋាភិបាលឲ្យបានម៉ត់ចត់ ព្រោះករណីជំងឺកូវីដ១៩ នៅលើសកលលោក នៅមិនទាន់ធូរស្រាលដូចនៅប្រទេសកម្ពុជានោះឡើយ។ ជាក់ស្ដែង គិតត្រឹមព្រឹកថ្ងៃទី១៩ ខែមេសា ឆ្នាំ២០២០នេះ មានអ្នកស្លាប់សរុបទូទាំងសកល ដោយសារជំងឺនេះ បានកើនដល់ ជាង១៦ម៉ឺននាក់ និងឆ្លងជា ២លាននាក់។
ឆ្លៀតក្នុងឱកាសនោះ ឯកឧត្ដម ស៊ាន បូរ៉ាត រដ្ឋលេខាធិការក្រសួងអប់រំ យុវជន និង កីឡា ជាប្រធានក្រុមងាររបស់រាជរដ្ឋាភិបាលចុះមូលដ្ឋានស្រុកស្រីស្នំ បានណែនាំដល់រដ្ឋបាលស្រុកស្រីស្នំ ត្រូវជំរុញ និងលើកទឹកចិត្តដល់បងប្អូនប្រជាពលរដ្ឋទាំងអស់ក្នុងស្រុក ស្វែងយល់ពីបច្ចេកទេសថ្មីៗ ក្នុងបង្កបង្កើនផលស្រូវ និង ដាំដំណាំរួមផ្សំគ្រប់ប្រភេទ ព្រោះនាពេលថ្មីៗកន្លងមកនេះ មានភ្លៀងធ្លាក់មកជាបណ្ដើរៗហើយ ហើយរដូវវស្សាក៏ជិតឈានមកដល់ផងដែរ ដូច្នេះត្រូវណែនាំឲ្យពួកគាត់ត្រៀមឧបករណ៍ សម្ភារ និង ពូជស្រូវ ពូជដំណាំផ្សេងៗ ដើម្បីដោះស្រាយជីវភាពប្រចាំថ្ងៃ កុំឲ្យមានការខ្វះខាត ព្រោះថា ស្ថានភាពការឆ្លរាលដាលជំងឺកូវីដ១៩នេះ មិនរំពឹងថា នឹងបញ្ចប់ក្នុងពេលឆាប់ៗនោះទេ ៕
អត្ថបទ និង រូបថត ៖ លោក លីវ សាន្ត
កែសម្រួលអត្ថបទ ៖ លោក សេង ផល្លី
