នៅម៉ោងប្រមាណ ២រសៀល ថ្ងៃទី១៩ ខែមេសា ឆ្នាំ២០២០នេះ មានអ្នកជំងឺកូវីដ១៩ ជាម្ដាយនិងកូន ចំនួន២រូបបន្ថែមទៀតហើយ រស់នៅក្នុងខេត្តសៀមរាប បានជាសះស្បើយ និងត្រូវបានអនុញ្ញាតឲ្យចេញពីមន្ទីរពេទ្យបង្អែកខេត្តសៀមរាប បន្ទាប់ពីការធ្វើតេស្តដំណាក់ចុងក្រោយជាច្រើនលើក។
តាមការឲ្យដឹងពីលោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្ត និងជាប្រធានក្រុមការងារចត្តឡីស័កខេត្តសៀមរាប បង្ហាញថា ស្រ្តីជាម្ដាយ និងកូនប្រុសរបស់គាត់ បានឆ្លងឆ្លងមេរោគកូវីដ១៩ ពីបុរសជាប្ដី ដែលត្រឡប់ពីចូលរួមពិធីសាសនានៅប្រទេសម៉ាឡេស៊ី។ ក្រោយពីធ្វើការតេស្តអ្នកពាក់ព័ន្ធជាច្រើនរូបមក មន្ត្រីសុខាភិបាលខេត្តសៀមរាប រកឃើញថា មានតែស្រ្តីជាប្រពន្ធ និងកូនប្រុសម្នាក់នេះប៉ុណ្ណោះ ដែលមានវិជ្ជមានមេរោគកូវីដ១៩។
លោកវេជ្ជបណ្ឌិត បានណែនាំដល់ស្រ្តីជាម្ដាយ និងកូន ត្រូវនៅដាច់ដោយឡែករយៈពេល១៤ថ្ងៃបន្ថែមទៀត បន្ទាប់ពីត្រឡប់ទៅដល់លំនៅដ្ឋាន ដោយមិនអនុញ្ញាតឲ្យប្រាស្រ័យទាក់ទងជិតស្និតជាមួយសមាជិកគ្រួសារ ឬសហគមន៍ឡើយ។
ព័ត៌មានជាតិ ថ្មីៗ
តាមការបង្ហាញពីអារម្មណ៍របស់ស្ត្រីជាម្ដាយរូបនេះ រូបគាត់មានសេចក្ដីរំភើបជាខ្លាំង បន្ទាប់ពីសមាជិកក្រុមគ្រួសាររបស់ខ្លួនទាំងអស់បានជាសះស្បើយ ក្រោមការខិតខំ ប្រឹងប្រែងព្យាបាលរបស់ក្រុមគ្រូពេទ្យនៃមន្ទីរពេទ្យបង្អែកខេត្តសៀមរាប និងការយកចិត្តទុកដាក់ពីលោកប្រធានមន្ទីរសុខាភិបាលខេត្ត។
((សំឡេងស្ត្រីជាម្ដាយ))
លោកស្រី ក៏បានថ្លែងអំណរគុណដល់ សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលលោកទាំងពីរ តែងតែយកចិត្តទុកដាក់ខ្ពស់ចំពោះសុខទុក្ខប្រជាពលរដ្ឋ ជាពិសេសសង្គ្រោះជីវិតប្រជាពលរដ្ឋពីជំងឺដ៏កាចសាហាវនេះ។
((សំឡេងស្ត្រីជាម្ដាយ))
គួរបញ្ជាក់ថា បច្ចុប្បន្ន ក្នុងខេត្តសៀមរាប មានតែអ្នកជំងឺកូវីដ១៩ តែរូបប៉ុណ្ណោះ ដែលកំពុងបន្តនៅដាក់ដោយឡែក ក្នុងមន្ទីរពេទ្យបង្អែកខេត្តសៀមរាប។
អត្ថបទ និង រូបថត ៖ លោក សេង ផល្លី
