ដើម្បីជួយដល់ប្រជាពលរដ្ឋក្រីក្រ ជនចាស់ជរា និងជនពិការ ក្នុងវិបត្តិនៃជំងឺកូវីដ១៩នេះ រដ្ឋបាលស្រុកបន្ទាយស្រី បាននិងកំពុងអនុវត្ត “គម្រោងស្រែសង្គម” ដែលមានផ្ទៃដីជិត៤០ហិកតា សម្រាប់ធ្វើការដាំដុះស្រូវស្រាល ដែលសកម្មភាពសប្បុរសធម៌នេះ គឺទទួលបានការគាំទ្រ និងចូលរួមពីប្រជាពលរដ្ឋ យុវជន និងអាជ្ញាធរ ក្នុងស្រុកបន្ទាយស្រី ខេត្តសៀមរាប។
ថ្ងៃទី២៣ ខែមេសា ឆ្នាំ២០២០ លោក ឃឹម ហ្វីណង់ អភិបាលស្រុកបន្ទាយស្រី បង្ហាញថា នៅដើមខែឧសភានេះ រដ្ឋបាលស្រុក នឹងចាប់ផ្តើមស្ទូងសំណាប ក្នុងវាលស្រែ។ បើមិនមានអ្វីប្រែប្រួលទេ ៣ខែខាងមុខទៀតនេះ គម្រោងនេះ នឹងអាចទទួលផល ស្រូវស្រាលដើមរដូវ ជុំទី១។
លោកអភិបាលស្រុក បន្ថែមថា នៅថ្ងៃនេះ យុវជន ប្រជាការពារភូមិ មន្រ្តីនគរបាលប៉ុស្តិ៍ និងអាជ្ញាធរឃុំជាច្រើននាក់ បានចូលរួមជាមួយប្រជាពលរដ្ឋ នៅក្នុងគម្រោងនេះ ដើម្បីបាចជីអាចម៍មាន់នៅក្នុងវាលស្រែ ដែលការងារនេះ ត្រូវប្រើពេល៣ថ្ងៃ លើផ្ទៃដីជិត៤០ហិកតានេះ។
លោកអភិបាលស្រុក ក៏បានបញ្ជាក់ផងដែរថា ផ្ទៃដីជិត៤០ហិកតានេះ គឺជាការផ្ដល់ជូនប្រើប្រាស់បណ្ដោះអាសន្នរហូតដល់ដំណាច់ឆ្នាំ២០២០ ពីប្រជាពលរដ្ឋចំនួន៣៩គ្រួសារ មកពីភូមិអូរទទឹង និងភូមិថ្នល់ទទឹង និងមានការសម្របសម្រួលពីរដ្ឋបាលស្រុក ។ បន្ទាប់ពីទទួលបានផល ម្ចាស់ដីស្រីនីមួយៗ នឹងទទួលបានស្រូវចំនួន ៤០០គីឡូក្រាម ក្នុងមួយហិកតា។ ចំពោះស្រូវ ដែលនៅសល់ពីចែកម្ចាស់ស្រែ នឹងត្រូវចែកជូន ប្រជាពលរដ្ឋក្រីក្រ ជនពិការ និងចាស់ជរា ជាពិសេសប្រជាពលរដ្ឋ ដែលរងផលប៉ះពាល់ ដោយសារវិបត្តិនៃមេរោគកូវីដ-១៩។
ជាមួយនោះដែរ លោកអភិបាលស្រុក រំពឹងថា រដ្ឋបាលស្រុកបន្ទាយស្រី នឹងមានគម្រោងធ្វើស្រែរួមគ្នា រឺសហគមន៍កសិកម្ម (Agricultural Cooperative រឺ Farmers’ Co-op) នាពេលអនាគត ប្រសិនបើគម្រោងស្រែសង្គមនេះ ជោគជ័យ។ លោកបន្ថែមថា គម្រោងប្រភេទនេះ ប្រទេសជឿនលឿន គេបានអនុវត្តន៍រួចមកហើយ ដោយសារតែវាផ្តល់គុណប្រយោជន៍ទៅដល់ប្រជាកសិករ ច្រើនជាងការធ្វើលើដីស្រែទំហំតូចៗដាច់ដោយឡែក។ ផ្ទុយទៅវិញ ការច្របាច់បញ្ចូលគ្នាលើផ្ទៃដីធំល្វើងល្វើយ នឹងធ្វើឱ្យមានផលចំនេញពីសេដ្ឋកិច្ចមាត្រដ្ឋាន(economy of scale) ផ្តល់លទ្ធភាពឱ្យប្រើបច្ចេកទេសខ្ពស់និងគ្រឿងចក្រទំនើប ប្រើប្រាស់ពូជថ្មី ដែលធន់នឹងបំរែបំរួលអាកាសធាតុ និងមានភាពងាយស្រួលក្នុងការសម្របសម្រួលហេដ្ឋារចនាសម្ព័ន្ធ ប្រព័ន្ធស្រោចស្រពធារាសាស្ត្រ ក៏ដូចជាការស្វែងរកទីផ្សារជូនផងដែរ៕
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក សេង ផល្លី
