នៅថ្ងៃទី០៥ ខែធ្នូ ស្អែកនេះ អដ្ឋិធាតុ ឯកឧត្តមសាស្រ្តាចារ្យវេជ្ជបណ្ឌិត ប៊ីត រីចណើ (Beat Richner) អតីតស្ថាបនិក និងជាអ្នកគ្រប់គ្រងមន្ទីរពេទ្យគន្ធបុប្ផា នឹងត្រូវបញ្ចុះក្នុងចេតិយនៅខាងមុខមន្ទីរពេទ្យគន្ធបុប្ផាជ័យវរ្ម័នទី៧ ខេត្តសៀមរាប ដែលជាបណ្ដាំរបស់ឯកឧត្តម ហើយនេះក៏ជាការដឹងគុណ និងចងចាំនូវគុណូបការរបស់ឯកឧត្តម បានជួយសង្គ្រោះជីវិតកុមារ និងម្ដាយកុមារកម្ពុជានៅគ្រប់កាលៈទេសៈ។
យោងតាមសេចក្ដីជូនដំណឹង របស់រដ្ឋបាលខេត្តសៀមរាប អដ្ឋិធាតុ ឯកឧត្តមសាស្រ្តាចារ្យវេជ្ជបណ្ឌិត នឹងត្រូវបញ្ជូនមកដល់ព្រលានយន្តហោះអន្តរជាតិខេត្តសៀមរាប នៅវេលម៉ោង៨:០០នាទី ព្រឹក ថ្ងៃទី០៥ ខែធ្នូ ឆ្នាំ២០១៨ស្អែកនេះ ដោយដង្ហែឆ្លងកាត់តាមផ្លូវជាតិលេខ០៦ បន្តមកដល់ស្តុបសណ្ឋាគារសុខាអង្គរ បត់តាមផ្លូវស៊ីវុត្ថា ឆ្ពោះទៅកាន់ផ្សារចាស់ តាមរង្វង់មូលនាគបាញ់ទឹក បន្តឆ្លងកាត់ស្ពានវត្តដំណាក់ បត់ស្របតាមផ្លូវបណ្ដោយស្ទឹងសៀមរាប មកកាន់ស្ពានព្រះរាជដំណាក់ និងឆ្ពោះទៅមន្ទីរពេទ្យគន្ធបុប្ផាជ័យវរ្ម័យទី៧។ សេចក្ដីជូនដំណឹង បានអំពាវនាវដល់ប្រជាពលរដ្ឋទូទាំងខេត្ត និងអមសងខាងផ្លូវ អញ្ជើញចូលរួមឲ្យបានច្រើនកុះករ ដើម្បីចូលរួមសម្ដែងនូកតញ្ញូតាធម៌ ចំពោះការលះបង់កម្លាំងកាយចិត្ត ក្នុងការជួយសង្គ្រោះកុមារ និងមាតាកម្ពុជានាពេលកន្លងមក និងសមិទ្ធផលមន្ទីរពេទ្យកុមារគន្ធបុប្ផានៅទូទាំងប្រទេសចំនួនចំនួនប្រាំកន្លែង។
សូមរំលឹកថា បន្ទាប់ពីលោកធ្លាក់ខ្លួនឈឺអស់ជាច្រើនឆ្នាំមក ឯកឧត្តមសាស្រ្តាចារ្យវេជ្ជបណ្ឌិត ប៊ីត រីចណើ បានទទួលមរណភាពនៅថ្ងៃទី៩ ខែកញ្ញា ឆ្នាំ២០១៨ នាវេលាម៉ោង ២និង៤៥នាទីព្រឹក នៅប្រទេសស្វីស ក្នុងជន្មាយុ៧១ឆ្នាំ។ មុនពេលលោកទទួលមរណភាព លោកមានបំណងចុងក្រោយមួយគឺ សូមឲ្យបញ្ជូនអដ្ឋិធាតុរបស់លោក មកបញ្ចុះនៅខាងមុខមន្ទីរពេទ្យគន្ធបុប្ផាជ័យវរ្ម័នទី៧ ខេត្តសៀមរាប។
ព័ត៌មានជាតិ ថ្មីៗ
រូបភាព: សហការី
អត្ថបទ: លោក សេង ផល្លី
