សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នៅក្នុងពិធីបើកពិធីអបអរសាទរខួប២៥ឆ្នាំ នៃការបង្កើតគណៈកម្មាធិការអន្តរជាតិសម្របសម្រួលកិច្ចការគាំពារ និងអភិរក្សតំបន់រមណីយដ្ឋានប្រវត្តិសាស្រ្តអង្គរ (ICC Angkor) នៅខេត្តសៀមរាបនៅព្រឹកថ្ងៃទី០៤ខែធ្នូឆ្នាំ២០១៨នេះថា បានអំពាវនាវឲ្យគណបក្សនយោបាយទាំងអស់ សុំកុំញុះញង់ឱ្យប្រជាពលរដ្ឋទៅរំលាភយកដីនៅក្នុងតំបន់បេតិកភណ្ឌ ខណៈដែលតំបន់ទាំងនោះកំពុងត្រូវបានការពារនិងអភិរក្សបានយ៉ាងល្អហើយនោះ។
សម្តេចតេជោបានមានប្រសាសន៍ថា កម្ពុជាពិតជាទទួលបាននូវការឈឺចាប់នៅក្នុងពេលកម្ពុជាជួបភ្លើងសង្គ្រាមជាង៣ទសវត្ស។ ពេលនោះមានការប្រយុទ្ធគ្នាដោយអាវុធជាច្រើន និងធ្វើឱ្យប្រាសាទបុរាណរបស់យើងប្រឈម នឹងការប៉ះពាល់ផងដែរ។ ប៉ុន្តែសម្តេចបានខិតខំបញ្ជៀសមិនឱ្យមានការប្រយុទ្ធគ្នាដោយអាវុធនៅក្នុងតំបន់ដែលមានបេតិកភណ្ឌនេះ ដើម្បីជៀសវាងប៉ះពាល់ដល់ប្រាសាទ លើកលែងតែរបបប្រល័យពូជសាសន៍ ប៉ុល ពត ដែលមិនអាចការពារបានដោយពួក ប៉ុល ពត បានរុះប្រាសាទមួយចំនួនទៅធ្វើទំនប់ទឹក។
លោកជំទាវ ភឿង សកុណា រដ្ឋមន្រ្តីក្រសួងវប្បធម៌និងវិចិត្រសិល្ប:បានមានប្រសាសន៍ថា ការរៀបចំពិធីអបអរសាទរខួប២៥ឆ្នាំនៃការបង្កើតICC-Angkorនេះ ក្នុងគោលបំណងដើម្បីអបអរសាទរភាពជោគជ័យ ដែលកើតចេញមកពីយន្តការ អាយ ស៊ី ស៊ី អង្គរ ដែលបច្ចុប្បន្នក្លាយជាគំរូនៃកិច្ចការអភិរក្ស និងអភិវឌ្ឍន៍សម្រាប់បណ្តាប្រទេសនានាលើសាកលលោក។ ជាមួយនេះដើម្បីបង្ហាញមោទនភាពជាតិរបស់ព្រះរាជាណាចក្រកម្ពុជា ដែលជាមហាអំណាចវប្បធម៌ និងមានប្រវត្តិសាស្រ្តយូរលង់មកហើយ ព្រមទាំងលើកគុណតម្លៃសម្បត្តិបេតិកភណ្ឌ ហើយក៏ដើម្បីសម្តែងកតញ្ញូតាធម៌ និងគុណូបការៈ ចំពោះវីរជន ឥស្សរជន និងបុព្វបុរសគ្រប់ជំនាន់ ដែលបានលះបង់កាយចិត្ត ស្មារតីក្នុងការកសាង ថែរក្សា ការពារ និងអភិរក្សមរតកវប្បធម៌ ។
ទន្ទឹមនេះ ការប្រារព្វខួប២៥ឆ្នាំនៃការបង្កើតអាយស៊ីស៊ីអង្គរនេះ គឺដើម្បីបណ្តុះស្មារតីយុវជន និងប្រជាពលរដ្ឋខ្មែរឱ្យចេះស្រលាញ់ ចូលរួមថែរក្សា ការពារ និងលើកតម្កើងបេតិកភណ្ឌ វប្បធម៌ ទំនៀមទម្លាប់ប្រពៃណីផូរផង់របស់កម្ពុជា និង ដើម្បីបង្ហាញសមិទ្ធផលរបស់រាជរដ្ឋាភិបាលកម្ពុជា ក្នុងវិស័យបេតិកភណ្ឌ ក្រោមការដឹកនាំរបស់សម្តេចអគ្គ មហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។ហើយក៏ដើម្បីផ្សព្វ ផ្សាយពីសក្តានុពលវប្បធម៌ និងទេសចរណ៍ទៅកាន់ឆាកអន្តរជាតិ។
លោកជំទាវ អូដ្រេ អាហ្សូឡាយ(Audrey Azouly)អគ្គនាយិការអង្គការយូណេស្កូ បានមានប្រសាសន៍ថា នៅក្នុងរយៈពេល២៥ឆ្នាំនេះក្រុមអ្នកជំនាញនៃICC-Angkorបានធ្វើតំបន់រមណីយដ្ឋានប្រវត្តិសាស្រ្តអង្គរកាន់តែមានល្អប្រសើរទាំងការអភិរក្ស និងការអភិវឌ្ឍន៍។
លោកជំទាវបានឱ្យកោតសសើដល់មន្រ្តីជំនាញកម្ពុជាដែលទទួលបានការបណ្តុះបណ្តាលកន្លងមក ឥឡូវនេះមានសមត្ថភាពគ្រប់គ្រាន់ក្នុងជួសជុលប្រាសាទ និងថែទាំដោយខ្លួនឯងបាន និងត្រូវបានប្រទេសមួយចំនួនមកដកស្រង់បទពី និងគំរូតាមផងដែរ។
សូមបញ្ជាក់ដែរថា គណៈកម្មាធិការអន្តរជាតិ សម្របសម្រួលកិច្ចគាំពារ និងអភិវឌ្ឍន៍តំបន់អង្គរ (International Coordination Committee for the Safeguarding and Development of Historic Site of Angkor) បានបង្កើតឡើងនៅឆ្នាំ១៩៩៣ ក្រោយសនិ្នសីទអន្តរជាតិលើកទី១ស្តីពីអង្គរ នៅទីក្រុងតូក្យូ ប្រទេសជប៉ុន តាមសំណូមពររបស់គណៈកម្មធិការ បេតិកភណ្ឌពិភពលោកពេលទទួលចុះអង្គរទៅក្នុងបញ្ជីបេតិកភណ្ឌពិភពលោក។អាយស៊ីស៊ី(ICC Angkor) មានមានសមាជិកចំនួន៣៧ប្រទេស មកពីទ្វីប៥ និងមានអង្គការអន្តរជាតិចំនួន១៣ ទៀត ចូលរួមជាសមាជិកដែរ។
អាយស៊ីស៊ី (ICC Angkor) គឺជាយន្តការអន្តរជាតិសម្របសម្រួលជំនួយផ្ដល់ជូនដោយបណ្តាប្រទេស និងអង្គការផ្សេងៗសម្រាប់ការអភិរក្ស និងអភិវឌ្ឍរមណីយដ្ឋានប្រវត្តិអង្គរ។ អាយស៊ីស៊ី (ICC) ជាវេទិកាមួយដែលស្ថាបត្យករ វិស្វករ បុរាណវិទូ អ្នកស្រាវជ្រាវ និងអ្នកបច្ចេកទេសជំនាញផ្សេងៗគ្នាអាចផ្លាស់ប្តូរបទពិសោធន៍ និងទស្សនៈរបស់ពួកគេសម្រាប់ការ អភិរក្ស និងការអភិវឌ្ឍនៃឧទ្យានអង្គរ។ ភារកិច្ចសំខាន់របស់អាយស៊ីស៊ី (ICC) គឺ ស្រោចស្រង់ អភិរក្ស និងអភិវឌ្ឍប្រកបដោយចីរភាពនៅតំបន់រមណីយដ្ឋានសៀមរាប-អង្គរ។
ICC បានបញ្ចប់ដំណាក់ កាលស្រោចស្រង់អង្គរ ហើយក្នុងរយៈពេល១០ឆ្នាំ(១៩៩៣-២០០៤)។ ដំណាក់កាលនេះគឺការអភិរក្ស និងអភិវឌ្ឍន៍ ប្រកបដោយចីរភាព(២០០៤-បច្ចុប្បន្ន)។ អាយស៊ីស៊ី (ICC Angkor) រៀបចំកិច្ចប្រជុំរបស់ខ្លួនពីរដង ក្នុង១ឆ្នាំម្តងជាមួយសមាជិក គឺកិច្ចប្រជុំពេញអង្គ និងម្តងទៀតគឺកិច្ចប្រជុំបច្ចេកទេស ។ កិច្ចប្រជុំពេញអង្គផ្តោត ទៅលើគោលនយោបាយគ្រប់គ្រង អំពាវនាវសុំជំនួយថវិកា សុពលភាព នៃគម្រោងថ្មី និងការប្រកាសពីគម្រោងថ្មីនៅអង្គរ៕
