រយៈពេល ៥ថ្ងៃ នៃការរឹតបន្តឹងការអនុវត្តអនុក្រឹត្យថ្មី ស្តីពីច្បាប់ចរាចរណ៍ផ្លូវគោក នៅទូទាំងខេត្តសៀមរាប ឃាត់បាន យានយន្តល្មើសច្បាប់ចរាចរណ៍សរុបជាង៥ពាន់ករណី និងធ្វើការផាកពិន័យ៥៩៥ករណី នេះបើតាមការបញ្ជាក់របស់លោកវរសេនីយ៍ឯក ជឹម សុវណ្ណ ប្រធានការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប នៅព្រឹកថ្ងៃទី០៥ ខែឧសភា ឆ្នាំ២០២០នេះ។
លោកវរសេនីយ៍ឯក ជឹម សុវណ្ណ បញ្ជាក់បន្ថែមថា ភាគច្រើននៃការផាកពិន័យ គឺបណ្ដាលមកពី ការជិះម៉ូតូមិនពាក់មួកសុវត្ថិភាព។ ដោយឡែក ចំពោះ រ៉ឺម៉កសណ្ដោងដោយម៉ូតូ គ្មានស្លាកលេខ និងអ្នកបើកបរម៉ូតូគ្មានបណ្ណបើកបរ សមត្ថកិច្ច បានឃាត់ធ្វើការអប់រំ និងណែនាំឲ្យទៅប្រឡងយកបណ្ណបើកបរ ដោយពុំមានការផាកពិន័យឡើយ។
តាមការបង្ហាញរបស់លោកឧត្តមសេនីយ៍ត្រី តេង ច័ន្ទណាត ស្នងការរង នៃស្នងការដ្ឋានគរបាលខេត្តសៀមរាប ទទួលផ្នែកចរាចរណ៍ អ្នកបើកបរម៉ូតូមានកម្លាំង ១២៥សេសេ ត្រូវមានអាយុ១៨ឆ្នាំយ៉ាងតិច និងមិនតម្រូវឲ្យមានបណ្ណបើកបរឡើយ។ រីឯអ្នកបើកម៉ូតូ មានកម្លាំងលើសពី១២៥សេសេ អ្នកបើកបរត្រីចក្រយានយន្ត ឬម៉ូតូកង់បី និងអ្នកបើកបរម៉ូតូ សណ្ដោងរ៉ឺម៉ក ត្រូវមានបណ្ណបើកបរប្រភេទ <ក>។ ផ្ទុយទៅវិញ បណ្ណបើកបររថយន្ត ពុំអាចយកមកប្រើសម្រាប់បើកបរម៉ូតូគ្រប់ប្រភេទបានឡើយ។
ព័ត៌មានជាតិ ថ្មីៗ
លោក ប៉ែន សូនី ប្រធានការិយាល័យដឹកជញ្ជូនផ្លូវគោក និងជាប្រធានគណៈកម្មការប្រលងបណ្ណបើកបរយានយន្ដ នៃមន្ទីរសាធារណៈការនិងដឹកជញ្ជូនខេត្ដសៀមរាប បញ្ជាក់ថា ចាប់ពីចុងខែមេសា ដល់ថ្ងៃទី០៤ ខែឧសភា ឆ្នាំ២០២០ មានអ្នកមកដាក់ពាក្យធ្វើបណ្ណបើកបរយានយន្ដជិត៣០០នាក់ក្នុងមួយថ្ងៃ ដែលចំនួននេះ មានការកើនឡើងមុនការរឹតបន្តឹងការអនុវត្តអនុក្រឹត្យថ្មី ស្តីពីច្បាប់ចរាចរណ៍ផ្លូវគោកនៅទូទាំងប្រទេសកម្ពុជា។ ក្នុងនោះ ប្រភេទបណ្ណបើកបរ ដែលប្រជាពលរដ្ឋសម្រុកធ្វើរាល់ថ្ងៃនេះ មាន៥ប្រភេទ មានប្រភេទ ក សម្រាប់ប័ណ្ណបើកបរម៉ូតូ និងប្រភេទ ខ, គ, ឃ, ង, ជាប្រភេទបណ្ណបើកបររថយន្ដដឹកអ្នកដំណើរ និងរថយន្ដដឹកទំនិញ។
អត្ថបទ និង រូបថត ៖ សាវី និង សៅ
កែសម្រួលអត្ថបទ ៖ ផល្លី
