កាលពីថ្ងៃទី៤ ខែឧសភា ឆ្នាំ២០២០ ក្រុមបុរាណវិទូ នៃអាជ្ញាធរជាតិអប្សរា បានប្រទះឃើញវត្ថុបុរាណ ចំនួន៣ប្រភេទ គឺចម្លាក់នាគ ខ្វាតពណ៌ស ដែលមានសណ្ឋានប្រហាក់ប្រហែលដុំគ្រីស្តាល់ និងត្រីសូល៍ នៅក្នុងបរិវេណនៃការដ្ឋានជួសជុលប្រាសាទកណ្ដាលស្រះស្រង់ ខេត្តសៀមរាប។
លោក ម៉ៅ សុខនី ប្រធានការដ្ឋាន បង្ហាញថា ចាប់តាំងពីកំណាយរហូតមកដល់ពេលនេះ ក្រុមកំណាយ បានរកឃើញ វត្ថុបុរាណជាច្រើន នៅរាយប៉ាយលើដីជុំវិញទួលប្រាសាទ។ ក្នុងនោះ ក្រុមកំណាយបានកត់សម្គាល់លើ ការរកឃើញខ្វាតពណ៌ស ដែលមានសណ្ឋានប្រហាក់ប្រហែលដុំគ្រីស្តាល់ ជាច្រើនគ្រាប់ និងហាក់ធ្លាប់បានរកឃើញនៅក្នុងរណ្តៅកំណាយទីតាំងផ្សេងៗពីមុន ការរកឃើញបំណែកធំមួយ នៃចម្លាក់ក្បាលនាគ និងសន្និដ្ឋានថា មួយផ្នែកធំទៀតកប់នៅក្នុងដីនៅឡើយ។ ដោយឡែក ត្រីសូល៍ធ្វើពីលោហៈចំនួន២ គ្រឿង ក្រុមកំណាយ ពុំដែលប្រទះឃើញឡើយ ដែល១នៅមានរូបរាងពេញលេញ និង១ទៀតនៅសល់តែបំណែកចុងស្រួចមួយចំហៀង។
ការរកឃើញសំណល់បុរាណវិទ្យាទាំងនេះ ក្រុមបុរាណវិទូ នៅមិនទាន់អាចសន្និដ្ឋាន បានថាស្ថិតនៅក្នុងសម័យកាលណា ឬគេដាក់ដើម្បីអ្វី និងមានអ្វីបន្ថែមទៀតនោះទេ ព្រោះនេះជាដំណាក់កាលដំបូង នៃការធ្វើកំណាយស្រាវជ្រាវ។ តែទោះជាយ៉ាងណាក៏ដោយ លទ្ធផលនឹងបង្ហាញច្បាស់លាស់ជាងនេះ នៅក្រោយបញ្ចប់ការងារស្រាវជ្រាវ។
ព័ត៌មានជាតិ ថ្មីៗ
បើសិនជាមិនមាន បញ្ហាឬឧបសគ្គណាមួយ អំឡុងពេលកំណាយនេះទេ កិច្ចការស្រាវជ្រាវនេះ នឹងបញ្ចប់នៅក្នុងរយៈពេល៦សប្តាហ៍ ដោយគិតចាប់ពីថ្ងៃទី២៧ ខែមីនា ឆ្នាំ២០២០មក។
ក្នុងការរក្សាទុកដាក់វត្ថុបុរាណ ដែលបានរកឃើញនេះ ឯកឧត្ដម គឹម សុធិន អគ្គនាយករងអាជ្ញាធរជាតិអប្សរា បញ្ជាក់ថា បច្ចុប្បន្នក្រុមការងារ បាននាំយកវត្ថុទាំងនោះ ប្រគល់ជូនសារមន្ទីរព្រះនរោត្តមសីហនុ-អង្គររួចរាល់ហើយ ដើម្បីធ្វើការជួសជុល សម្អាត និងរក្សាទុក៕
អត្ថបទ និង រូបថត ៖ សាវី
កែសម្រួលអត្ថបទ ៖ ផល្លី
