នៅថ្ងៃទី០៥ ខែឧសភា ឆ្នាំ២០២០ ប្រតិភូសាខាកាកបាទក្រហមកម្ពុជា ខេត្តសៀមរាប តំណាងឯកឧត្តម ទៀ សីហា ប្រធានគណៈកម្មាធិការសាខា រួមទាំងអនុសាខាកាកបាទក្រហមកម្ពុជា ស្រុកបន្ទាយស្រី បានជួបសួរសុខទុក្ខ និងនាំយកអំណោយជូនដល់ លោកយាយ អ៊ឹម ចេង អាយុ៨៨ឆ្នាំ ពិការជើងឆ្វេង និង លោក បូ ណាក់ អាយុ ៣៣ ឆ្នាំ ពិការដៃទាំងសងខាង ។
តាមរបាយការណ៍ បង្ហាញថា លោកយាយ អ៊ឹម ចេង រស់នៅភូមិន្ទាយស្រី ឃុំខ្នាសណ្ដាយ ស្រុកបន្ទាយស្រី ខេត្តសៀមរាប បានរងគ្រោះដោយសារគ្រាប់មីន តាំងពីយូរមកហើយ ជាមួយនោះរទេះចាស់របស់លោកយាយ មានសភាពចាស់ មិនអាចប្រើប្រាស់បានឡើយ។ ដោយឡែក មានទីលំនៅ នៅភូមិស្ពានជ្រាវ សង្កាត់សៀមរាប ក្រុងសៀមរាប ត្រូវកាត់ដៃចោលទាំងសងខាង ដោយសារឆក់ចរន្តអគ្គិសនី និងបច្ចុប្បន្នកំពុងសម្រាកព្យាបាលនៅមន្ទីរពេទ្យបង្អែក ខេត្ត ក្នុងក្រុងសៀមរាប។
ក្នុងនាមឯកឧត្តម ទៀ សីហា លោកជំទាវ សុខ ណារ៉ូ ពៅហេង អនុប្រធានគណៈកម្មាធិការសាខា បាននាំយកនូវការសួរសុខទុក្ខ សំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងសម្ដែងការសោកស្ដាយចំពោះជនរងគ្រោះទាំងពីររូប ដែលបានជួបគ្រោះថ្នាក់ជាយថាហេតុនេះ។
ព័ត៌មានជាតិ ថ្មីៗ
អំណោយមនុស្សធម៌ លោកយាយពិការជើង មាន រទេះជនពិការ ១គ្រឿង អង្ករ៣០គីឡូក្រាម មី១កេស ត្រីខ១យួរ មុង១ ភួយ១ សារុង២ ក្រមា១ កន្ទេល១ អាវយឺត២ និងថវិកា២សែនរៀល ។
ចំពោះបុរសពិការដៃទាំងសងខាង ទទួលបាន អង្ករ៣០គីឡូក្រាម មី១កេស ត្រីខ១យួរ ទឹកដោះគោខាប់២កំប៉ុង ស្ករស១គីឡូក្រាម មុង១ ភួយ១ សារុង១ ក្រមា១ កន្ទេល១ អាវយឺត២ និងថវិកា១លានរៀល ។
អត្ថបទ និង រូបថត ៖ គឿន វេត
កែសម្រួលអត្ថបទ ៖ សេង ផល្លី
