ក្នុងឱកាស អញ្ជើញពិនិត្យទីតាំងការដ្ឋានជួសជុល និងកំណាយ នៅប្រាសាទកណ្តាលស្រះស្រង់ ខេត្តសៀមរាប នាព្រឹកថ្ងៃទី១៤ ខែឧសភា ឆ្នាំ២០២០ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីទទួលបន្ទុកក្រសួងទំនាក់ទំនងព្រឹទ្ធសភានិងរដ្ឋសភា ក៏បានរៀបចំប្រារព្ធពិធីបួងសួង ដល់វត្ថុស័ក្តិសិទ្ធិដែលបានរកឃើញនៅក្នុងប្រាសាទនេះ ដើម្បីសុំសេចក្តីសុខចម្រើន ដល់ប្រជាពលរដ្ឋកម្ពុជាទូទាំងប្រទេស ខណៈវិបត្តិជំងឺកូវីដ១៩ កំពុងតែបន្តរីករាលដាលនៅលើសកលលោក។
ក្នុងឱកាសនោះដែរ ក៏មានការអញ្ជើញចូលរួមពី លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្ប: និងជាប្រធានអាជ្ញាធរជាតិអប្សរា ឯកឧត្តមបណ្ឌិត ថោង ខុន រដ្ឋមន្រ្តីក្រសួងទេសចរណ៍ ឯកឧត្តម ទៀ សីហា អភិបាលខេត្ត និងលោកជំទាវ ព្រមទាំងថ្នាក់ដឹកនាំអាជ្ញាធរជាតិអប្សរា មន្ទីរ អង្គភាពជុំវិញខេត្តជាច្រើនផងដែរ។
លោកជំទាវឧបនាយករដ្ឋមន្ត្រី បានថ្លែងកោតសរសើរ ចំពោះការប្រឹងប្រែង របស់ក្រុមការងារអាជ្ញាធរជាតិអប្សរា ដែលបានចំណាយកម្លាំងកាយ ប្រាជ្ញា ស្មារតី លើកស្ទួយអភិរក្សប្រាង្គប្រាសាទខ្មែរ និងស្នាដៃជាច្រើន ដែលបានបន្សល់ទុកដោយបុព្វបុរសខ្មែរ សម្រាប់ឲ្យកូនខ្មែរជំនាន់ក្រោយ បានយល់ដឹង និងស្គាល់។
ព័ត៌មានជាតិ ថ្មីៗ
តាមការបកស្រាយរបស់ ឯកឧត្ដម គឹម សុធិន អគ្គនាយករងអាជ្ញាធរជាតិអប្សរា វត្ថុបុរាណ នៅក្នុងការដ្ឋាននេះ ក្រុមកំណាយបានរកឃើញជាបន្តបន្ទាប់ ដូចជា វត្ថុបុរាណចំនួន៣ប្រភេទ គឺចម្លាក់នាគ គ្រាប់ខ្វាតពណ៌ស មានសណ្ឋានប្រហាក់ប្រហែលគ្រីស្តាល់ និងត្រីសូល៍ បានរកឃើញកាលពីថ្ងៃទី០៤ ខែឧសភា ឆ្នាំ២០២០។ ចម្លាក់អណ្តើកចំនួន១ រកឃើញនៅថ្ងៃទី៦ ខែឧសភា ឆ្នាំ២០២០។ និងចម្លាក់អណ្តើកចំនួន ១បន្ថែមទៀត ដែលមានទំហំតូចជាងមុនបន្តិច រួមនឹងត្រីសូល៍ចំនួន២ ដែលក្នុងនោះ ត្រីសូល៍មួយ មានត្រឹមតែមួយបំណែកបំណែកប៉ុណ្ណោះ។
ឯកឧត្ដមអគ្គនាយករង លើកឡើងថា ទោះជាយ៉ាងណាក៏ដោយ អ្នកជំនាញ នៅពុំទាន់អាចសន្និដ្ឋានពី សម័យកាល និងអត្ថន័យនៃវត្ថុបុរាណ ដែលបានរកឃើញនេះនៅឡើយទេ។ ប៉ុន្តែ ឯកឧត្ដម បញ្ជាក់ថា ក្រុមបុរាណវិទូ នឹងបង្ហាញលទ្ធផល នៃការស្រាវជ្រាវឲ្យបានច្បាស់លាស់ នៅក្រោយបញ្ចប់ការងារស្រាវជ្រាវ ក្នុងការដ្ឋានប្រាសាទកណ្តាលស្រះស្រង់នេះ។
អត្ថបទ និង រូបថត ៖ បូ សាវី និង យូ វង្ស
កែសម្រួលអត្ថបទ ៖ សេង ផល្លី
