សមត្ថកិច្ចផែនការងារសន្តិសុខ ខេត្តសៀមរាប ឃាត់ខ្លួនជនសង្ស័យម្នាក់ បន្លំខ្លួនជាមន្ត្រីបរិស្ថានខេត្តសៀមរាប និងគម្រាមទារប្រាក់ ពីម្ចាស់អាជីវកម្មមួយកន្លែង នៅស្រុកក្រឡាញ់ ខេត្តសៀមរាប នេះបើតាមការឲ្យដឹងពីលោក ឧត្តមសេនីយ៍ត្រី ហួត សុធី ស្នងការរង ទទួលផែនការងារសន្តិសុខ នៃស្នងការដ្ឋាននគរបាលខេត្តសៀមរាប តាមទូរស័ព្ទ នៅរសៀលថ្ងៃទី១៤ ខែឧសភា ឆ្នាំ២០២០នេះ។
លោកស្នងការរង បង្ហាញថា សមត្ថកិច្ច បានឃាត់ខ្លួនជនសង្ស័យ កាលពីនៅរសៀលថ្ងៃទី១៣ ខែឧសភា ឆ្នាំ២០២០។ ជនសង្ស័យ មានឈ្មោះដើម ស៊ីម ឈុនលៀង ហៅតាលៀង ភេទប្រុស មានវ័យ៥៦ឆ្នាំ ជាអតីត អ្នកសារព័ត៌មាន និងបុគ្គលិក នៃអង្គការបរិស្ថានមួយ បច្ចុប្បន្នពុំមានមុខរបរពិតប្រាកដឡើយ។
លោកស្នងការរង បន្ថែមថា ជនសង្ស័យបានធ្វើសកម្មភាព ទូរស័ព្ទបន្លំខ្លួនជាមន្ត្រីបរិស្ថានខេត្តសៀមរាប និងគម្រាមទារប្រាក់ ជាថ្នូរនឹងការ មិនចុះត្រួតពិនិត្យអាជីវកម្មមួយកន្លែង នៅក្នុងស្រុកក្រឡាញ់ ខេត្តសៀមរាប កាលពីរសៀល ថ្ងៃទី០៩ ខែឧសភា ឆ្នាំ២០២០។
បន្ទាប់ពីទទួលបានពាក្យបណ្តឹង ពីតំណាងមន្ទីរបរិស្ថានខេត្តសៀមរាប និងមានដីកា សម្រេចបើកការស៊ើបអង្កេតបឋមពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប សមត្ថកិច្ចផែនការងារសន្តិសុខខេត្ត និងសហការពីកម្លាំងប៉ុស្តិ៍នគរបាលរដ្ឋបាលសង្កាត់ស្វាយដង្គុំ របស់អធិការដ្ឋាននគរបាលក្រុងសៀមរាប សមត្ថកិច្ចបានអញ្ជើញជនសង្ស័យខាងលើ មកធ្វើការសាកសួរ នៅស្នងការដ្ឋាននគរបាលខេត្តសៀមរាប។
ក្រោយការសាកសួរ សាមីខ្លួនបានឆ្លើយសារភព ថា ខ្លួនពិតជាបាន ធ្វើសកម្មភាពបន្លំខ្លួន និងគម្រាមទារប្រាក់ពិតប្រាកដមែន ។ បច្ចុប្បន្ន សមត្ថកិច្ច កំពុងកសាងសំណុំរឿងបញ្ជូនទៅតុលាការ ដើម្បីបន្តចាត់ការតាមនីតិវិធី។
អត្ថបទ និង រូបថត ៖ យូ វង្ស
កែសម្រួលអត្ថបទ ៖ សេង ផល្លី
