តំណាងរាស្រ្តមណ្ឌលសៀមរាប ប្រគល់អណ្តូងទឹកស្អាតខ្នាតធំ២គ្រឿង ជូនប្រជាពលរដ្ឋចំនួន២ភូមិ នៃឃុំសែនសុខ ស្រុកក្រឡាញ់ បានប្រើប្រាស់ជាសាធារណៈ ក្នុងពេលដែលសហគមន៍ទាំងនោះ ជួបបញ្ហាគ្រោះរាំងស្ងួត !
ឯកឧត្តម សៀង ណាំ តំណាងរាស្រ្តមណ្ឌលសៀមរាប និងសហការីជាក្រុមការងារចុះជួយមូលដ្ឋានស្រុកក្រឡាញ់ បានប្រគល់អណ្តូងទឹកស្អាតចំនួន២គ្រឿង ដែលជាប្រភេទអណ្តូងស្នប់ខ្នាតធំ ជូនអាជ្ញាធរមូលដ្ឋានឃុំសែនសុខ ដើម្បីគ្រប់គ្រងចាត់ចែងឲ្យប្រជាពលរដ្ឋបានប្រើប្រាស់ជាលក្ខណៈសហគមន៍ កាលពីចុងសប្តាហ៍កន្លងមកនេះ ។ អណ្តូងទឹកស្អាតទាំង២គ្រឿងនេះ ជាអំណោយរបស់លោក ចាន់ ឃុង សប្បុរសជននៅក្រុងសៀមរាប ផ្តល់ជូនតាមរយៈក្រុមការងារ ដែលក្នុងនោះ ១គ្រឿងត្រូវបានកសាងដាក់នៅក្នុងបរិវេណអនុវិទ្យាល័យសែនសុខ សម្រាប់ផ្តល់ការប្រើប្រាស់ជូនប្រជាសហគមន៍ភូមិច្រនៀង និងមួយគ្រឿងទៀត កសាងដាក់នៅក្នុងភូមិស្វាយ។
លោកស្រី ឈីន ឡា សមាជិកភូមិស្វាយ បាននិយាយឲ្យដឹងដោយក្តីកង្វល់ថា នៅភូមិដទៃទៀតក៏មិនខុសគ្នាដែរ អំពីការខ្វះខាតទឹកប្រើប្រាស់ប្រចាំថ្ងៃ ដោយសារតែគ្មានភ្លៀងធ្លាក់ បណ្តាលឲ្យអណ្តូង-ស្រះ រីងខះអស់។
តំណាងរាស្រ្តមណ្ឌលសៀមរាប ( ឯកឧត្តម សៀង ណាំ ) អបអរសាទរជាមួយបងប្អូនប្រជាពលរដ្ឋ ក្នុងការទទួលយកអំណោយអណ្តូងទឹកស្អាតនេះ បើទោះជាវាមិនបានដោះស្រាយទាំងស្រុងនៅចំពោះមុខក៏ដោយ ក៏ប៉ុន្តែវាបានជួយសម្រាលទុក្ខលំបាករបស់ប្រជាពលរដ្ឋបានមួយកំរឹត សម្រាប់ការឆ្លងកាត់ពេលវេលា នៃការអូសបន្លាយនៃការផ្តល់របបទឹកភ្លៀងនាដើមរដូវវស្សាឆ្នាំនេះ ។ យ៉ាងណាក៏ដោយ ឯកឧត្តមបានអំពាវនាវបន្ថែមចំពោះក្រុមការងារចុះជួយមូលដ្ឋាន ត្រូវបន្តការយកចិត្តទុកដាក់ មិនឲ្យឃ្លាតឆ្ងាយពីសុខទុក្ខប្រជាពលរដ្ឋនោះឡើយ ទាំងការស្វែងរកដំណោះស្រាយលើបញ្ហាទឹកប្រើប្រាស់ដែលកំពុងជួបការខ្វះខាត និងចូលរួមអប់រំអនុវត្តវិធានការគ្រប់គ្រងវិបត្តិកូវីត-១៩ នៅក្នុងសហគមន៍ ផងដែរ៕
អត្ថបទ និង រូបថត ៖ ងិន គឹមឡេង
