លោកស្រី លី វណ្ណៈ ប្រធានការិយាល័យឱសថ នៃមន្ទីរសុខាភិបាលខេត្តសៀមរាប បានបញ្ជាក់ថា ទាំងអ្នកចំអិនម្ហូបអាហារ និង ទាំងអ្នកបំរើសេវា នៅគ្រប់ភោជនីយដ្ឋានទាំងអស់ក្នុងខេត្ត ត្រូវប្រកាន់ខ្ជាប់ និងអនុវត្តឱ្យបាននូវវិធានការបីចំណុច ដូចជា ៖ ១. ត្រូវពាក់ម៉ាស់ជាប្រចាំទាំងអ្នកចំអិនម្ហូបអាហារនិងអ្នកបំរើសេវាដល់អតិថិជនដែលមកបរិភោគនៅក្នុងទីកន្លែងរបស់ខ្លួនចៀសវាងតំណក់ទឹកតូចៗខ្ជាត់ចេញពីមាត់យើងទៅលើម្ហូបអាហារ , ២. ត្រូវដាក់អាល់កុលឬជែលលាងដៃ សម្រាប់អតិថិជនសំអាតដៃមុននិងក្រោយបរិភោគ និង ត្រូវរៀបតុកៅអីដោយរក្សាគម្លាតសុវត្ថិភាព មិនត្រូវរៀបតុកៅអីចង្អៀតណែនជាដាច់ខាត បើមិនដូច្នោះទេ ត្រូវប្រឈមទៅនឹងការបិទអាជីវកម្ម ។
លោកស្រី លី វណ្ណៈ មានប្រសាសន៍បែបនេះក្នុងឱកាសចុះពន្យល់ អប់រំ និង ណែនាំដល់អាជីវករលក់ដូរម្ហូបនំចំណីនៅតំបន់អង្គរឃ្យុងយូ កាលពីរសៀលថ្ងៃទី២១ ខែឧសភា ឆ្នាំ២០២០ម្សិលមិញនេះ ។
លោកស្រី លី វណ្ណៈ មានប្រសាសន៍ទៀតថា ក្រោមការណែនាំរបស់រាជរដ្ឋាភិបាលកម្ពុជា ក៍ដូចជាក្រសួងសុខាភិបាល នៅថ្នាក់ខេត្ត បានបង្កើតគណ:កម្មការខេត្តប្រយុទ្ធនឹងជម្ងឺកូវីដ១៩ កាលពីថ្ងៃទី១០ ខែមីនា កន្លងទៅ ដែលមានឯកឧត្តម ទៀ សីហា អភិបាលខេត្ត ជាប្រធានគណ:កម្មការ ហើយការចុះមកផ្សព្វផ្សាយពន្យល់ណែនាំដល់អាជីករលក់ដូរនៅតាមដងផ្លូវសាធារណៈនាពេលនេះ គឺដើម្បីឱ្យបងប្អូនជ្រួតជ្រាបពីវិធានការ បង្ការ ការពារ និងទប់ស្កាត់ ចៀសវាងរលកទី២នៃវីរុសកូវីដ១៩ ឆ្លងចូលទៅក្នុងសហគមន៍ ។
លោកស្រី លី វណ្ណៈ មានប្រសាសន៍បន្ថែមទៀតថា ក្រោយពីផ្សព្វផ្សាយហើយ មន្ត្រីក្រុមការងារនឹងតាមពិនិត្យមើល ថាតើបងប្អូនអ្នកលក់ដូរគាត់អនុវត្តបានឬមិនបានទៅលើវិធានការចំនួនបីចំណុចនោះ ប្រសិនជាគាត់ពុំព្រមអនុវត្តតាមទេ ក្រុមការងារនឹងធ្វើរបាយការណ៍រាយការណ៍ជូនឯកឧត្ដមអភិបាលខេត្ត ដើម្បីមានវិធានការ និងសុំគោលការណ៍បិទអាជីវកម្មជាបណ្តោះអាសន្ន អាចមួយសប្តាហ៍ មួយខែ ឬទាល់តែចប់វិបត្តិដោយកូវីដ១៩ ទៅតាមទំហំនៃការអនុវត្តរបស់គាត់ ៕
មន្ត្រីមន្ទីរសុខាភិបាលខេត្តសៀមរាបបញ្ជាក់ថា ម្ចាស់ភោជនីយដ្ឋានទាំងអស់
មន្ត្រីមន្ទីរសុខាភិបាលខេត្តសៀមរាបបញ្ជាក់ថា ម្ចាស់ភោជនីយដ្ឋានទាំងអស់ ត្រូវអនុវត្តនូវវិធានការ៣ចំនុចជាចាំបាច់ ដើម្បីការ ពារ រលកទី២នៃវីរុសកូវីដ១៩ បើមិនដូច្នោះប្រឈមទៅនឹងការបិទអាជីវកម្ម#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Friday, May 22, 2020
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
