នៅព្រឹកថ្ងៃទី២២ ខែឧសភា ឆ្នាំ២០២០ ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន បានទទួលជួប និង ទទួលសៀវភៅស្តីពីប្រវត្តិសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទ ក្រហមកម្ពុជា និងជាភរិយា សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ជាភាសាអង់គ្លេស និងភាសាខ្មែរ ចំនួន១០០ក្បាល ពីឯកឧត្តម ឆាយ សុផល អនុរដ្ឋលេខាធិការ ក្រសួងព័ត៌មាន និងជាអ្នកនិពន្ធសៀវភៅនេះ។
ឯកឧត្តម ឆាយ សុផល បានជម្រាបជូនថា សៀវភៅដែលមានចំណងជើងថា “BUN RANY – THE WIFE OF CAMBODIA’S STRONG MAN” បានបកប្រែដោយក្រុមជំនាញ និងមានការកែសម្រួល ពីជនជាតិអាម៉េរិក ចេញពីសៀវភៅ “ប៊ុន រ៉ានី-ភរិយាបុរសខ្លាំងនៃកម្ពុជា” ជាភាសាខ្មែរ និងទើបចេញផ្សាយនៅ ពាក់កណ្តាល ខែឧសភានេះ។ ដោយឡែក សៀវភៅជាភាសាខ្មែរនេះដែរ បានចេញ ផ្សាយតាំងពី ថ្ងៃទី១០ ខែធ្នូ ឆ្នាំ២០១៩មកម្ល៉េះ។
ឯកឧត្តម ឆាយ សុផល បញ្ជាក់ថា ឯកឧត្តម ឃួង ស្រេង អភិបាលរាជធានីភ្នំពេញ ក៏បានជួយ បោះពុម្ពសៀវភៅនេះចំនួន មួយម៉ឺនក្បាលផងដែរ។ បន្ទាប់ពីសៀវភៅនេះទៅ ឯកឧត្តម ក៏គ្រោងនឹងចេញផ្សាយសៀវភៅ “បងប្អូន ប្រុសទាំង៣” ដែលរៀបរាប់ពីសាវតារកូនប្រុសរបស់សម្តេចតេជោ និងសម្តេចកិត្តិព្រឹទ្ធបណ្ឌិត ជាភាសាអង់គ្លេស និងភាសាចិនដែរនៅខែក្រោយនេះ ខណៈសៀវភៅសម្តេចតេជោ ដែលមានចំណងជើងថា “ហ៊ុន សែន – នយោបាយ និងអំណាច ក្នុងប្រវត្តិសាស្រ្តខ្មែរជាង៤០ឆ្នាំ” នឹងត្រូវចេញផ្សាយជាភាសាអង់គ្លេស នៅក្នុងអំឡុងខែសីហា ឆ្នាំនេះ។
ឯកឧត្តម រដ្ឋមន្រ្តី ខៀវ កាញារីទ្ធ បានកោតសរសើរនិងវាយតម្លៃខ្ពស់ចំពោះ កិច្ចខិតខំ ប្រឹងប្រែង រៀបចំចងក្រងជាសៀវភៅដ៏មានតំលៃនេះឡើង ដើម្បីឲ្យប្រជាពលរដ្ឋទូទៅបាន អាន យល់ដឹងពីប្រវត្តិ របស់សម្តេចកិត្តិព្រឹទ្ធបណ្ឌិតប៊ុនរ៉ានី ហ៊ុន សែន ដែលជាភិយា ប្រមុខ ដឹកនាំប្រទេសកម្ពុជា ហើយសៀវភៅ ទាំងអស់នេះ ឯកឧត្តម នឹងចែកទៅគ្រប់អគ្គនាយកដ្ឋាន ទាំង ៥ ចំណុះក្រសួង ព័ត៌មាន ដើម្បីឲ្យមន្រ្តីរាជការ និងថ្នាក់ដឹកនាំ បានមើល និងអាន គ្រប់ៗគ្នា។
អត្ថបទ និង រូបថត ៖ ក្រសួងព័ត៌មាន
