គ្រួសាររងគ្រោះដោយខ្យល់កន្ត្រាក់ចំនួន ៦៦គ្រួសារ មកពីស្រុកស្វាយលើ និង ស្រុកសូទ្រនិគម ខេត្តសៀមរាប ទទួលអំណោយពីកាកបាទក្រហមកម្ពុជា នៅព្រឹកថ្ងៃទី២៥ ខែ ឧសភា ឆ្នាំ២០២០ នៅបរិវេណសាលាឃុំ ពពេល ស្រុកសូទ្រនិគម ខេត្តសៀមរាប។
យោងតាមរបាយការណ៍របស់អាជ្ញាធរ គ្រួសាររងគ្រោះដោយខ្យល់កន្ត្រាក់ ក្នុងស្រុកសូទ្រនិគម មាន៥៩គ្រួសារ ក្នុងនោះរលំទាំងស្រុង ១០គ្រួសារ ផ្ទះខូចខាតធ្ងន់ធ្ងរ ៤៩គ្រួសារ និងរងរបួស១នាក។ ដោយឡែក គ្រួសាររងគ្រោះដោយខ្យល់កន្ត្រាក់ ក្នុងស្រុកស្វាយលើ មាន ៧គ្រួសារ ក្នុងនោះ រលំផ្ទះទាំងស្រុង ១គ្រួសារ និង ផ្ទះខូចខាតធ្ងន់ធ្ងរ ៦គ្រួសារ។
ក្នុងឱកាសចុះសួរសុខទុក្ខនោះ មានការអញ្ជើញពីសំណាក់ ឯកឧត្តមវេជ្ជបណ្ឌិត អ៊ុយ សំអាត នាយក នាយកដ្ឋានគ្រប់គ្រងគ្រោះមហន្តរាយ នៃកាកបាទក្រហមកម្ពុជា អមដំណើរដោយលោកជំទាវ ទាង អេង ទៀ សីហា អនុប្រធានគណៈកម្មាធិការសាខាកាកបាទក្រហមខេត្ត ប្រធានអនុសាខាកាកបាទក្រហម ស្រុកសូទ្រនិគម រួមនិងអាជ្ញាធរមូលដ្ឋានផងដែរ។
ឯកឧត្តមវេជ្ជបណ្ឌិត អ៊ុយ សំអាត បាននាំយកនូវប្រសាសន៍សួរសុខទុក្ខ និងចូលរួមសោកស្ដាយ ពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចំពោះការបាត់បង់ទ្រព្យសម្បត្តិរបស់ប្រជាពលរដ្ឋក្នុងស្រុកទាំងពីរនេះ។ ទន្ទឹមនោះ ឯកឧត្តមក៏បានបានសំណូមពរ ដល់ប្រជាពលរដ្ឋរងគ្រោះទាំងអស់ ត្រូវយកចិត្តទុកដាក់តាមដានព័ត៌មានពីការប្រែប្រួលអាកាសធាតុរបស់ក្រសួងធនធានទឹកនិងឧតុនិយម និងត្រូវត្រៀមបង្ការ ចំពោះគ្រោះធម្មជាតិ ខ្យល់កន្ត្រាក់ ផ្គររន្ទះ ដែលអាចកើតឡើងជាយថាហេតុនាពេលខាងមុខបន្ថែមទៀត។
ឆ្លៀតក្នុងឱកាសនោះ ឯកឧត្តមក៏បាន ណែនាំដល់ប្រជាពលរដ្ឋទាំងអស់ មានការប្រុងប្រយ័ត្នខ្ពស់ចំពោះការឆ្លងជម្ងឺកូវីដ-១៩ និង ត្រូវស្តាប់តាមការណែនាំរបស់ក្រសួងសុខាភិបាល សំខាន់ត្រូវធ្វើអនាម័យឲ្យបានជាប្រចាំ លាងដៃនឹងទឹកសាប៊ូឲ្យបានស្អាតជាប្រចាំ ឬ អាល់កុល ជែល និង ពាក់ម៉ាស (ក្នុងទីសាធារណៈ) ឬ ប្រើក្រមា និង ក្រដាសជូតមាត់ខ្ទប់មាត់ពេលក្អក ឬកណ្តាស់ និង រក្សាគម្លាតសុវត្ថិភាព ។
សូមជម្រាបថា អំណោយមនុស្សធម៌ដែលបានផ្ដល់ជូនរួមមាន មុង១ ភួយ១ សារុង១ ក្រមា១ តង់១ មី១កេស ត្រីខ១យួរ អង្ករ៣០គីឡូក្រាម ក្នុងមួយគ្រួសារ ក្នុងនោះគ្រួសាររលំផ្ទះ ទទួលថវិកា២សែនរៀល និង គ្រួសារផ្ទះខូចខាតធ្ងន់ ថវិកា ចំនួន១សែនរៀល រួមទាំងអ្នករងរបួសផងដែរ ៕
កាកបាទក្រហមកម្ពុជា នាំយកអំណោយមនុស្សធម៌ ជូនដល់គ្រួសាររងគ្រោះ
កាកបាទក្រហមកម្ពុជា នាំយកអំណោយមនុស្សធម៌ ជូនដល់គ្រួសាររងគ្រោះដោយខ្យល់កន្ត្រាក់ ៦៦គ្រួសារ ក្នុងខេត្តសៀមរាប#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Monday, May 25, 2020
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
