នៅព្រឹកថ្ងៃទី២៥ ខែឧសភា ឆ្នាំ២០២០ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន ទទួលជួប និងទទួលសៀវភៅ ជាភាសាអង់គ្លេសមានចំណងជើងថា “The Journey of Down to Earth Diplomat ” ចំនួន ៨០ក្បាល ពី ឯកឧត្តម ហោ ណាំបូរ៉ា ជាអ្នកការទូតកម្ពុជាដ៏មាន បទពិសោធន៍ម្នាក់ ដែលបានសរសេរសៀវភៅរៀបរាប់ពីបទពិសោធន៍ការងារការទូត ជាង២៥ ឆ្នាំកន្លងមកនេះ។
តាមការបញ្ជាក់របស់ ឯកឧត្តម ហោ ណាំបូរ៉ា បានឲ្យដឹងថា សៀវភៅ នេះលោកបានសរសេរចងក្រងមកអស់រយៈពេលប្រមាណ ២ ឆ្នាំដោយបានរៀបរាប់ពី បទពិសោន៍ការងារ ការទូត ដែលទទួលបានក្នុងរយៈពេលកន្លងមក ក៏ដូចជាទំនាក់ទំនង ជាមួយនឹង ការងារអាស៊ាន ដោយបង្ហាញពីលទ្ធផល ដែលកម្ពុជា សម្រេចបានកន្លងមក ។ ក្នុងសៀវភៅនេះដែរ ក៏បានរៀបរាប់ពីការរីកចម្រើនរបស់ប្រទេសកម្ពុជា ក្រោមការដឹកនាំរបស់ សម្តេចតេជោ ហ៊ុន សែននាយករដ្ឋមន្រ្តី នៃកម្ពុជាផងដែរ។
ឯកឧត្តម បានបញ្ជាក់ថា វិស័យការងារការទូត អស់រយៈពេលជាច្រើនឆ្នាំកន្លងមកនេះ បានក្លាយទៅជាសិល្បៈ ក្នុងការ រួមប្រាស្រ័យទាក់ទងជាមួយភ្ញៀវទូទៅ ការទាក់ទាញអ្នកវិនិយោគទុន សិល្បៈក្នុងការដោះស្រាយបញ្ហាជាមួយម្ចាស់ផ្ទះ ។ ដូច្នេះសៀវភៅនេះ ឯកឧត្តម ក៏នឹងធ្វើការបកប្រែជាភាសាខ្មែរ ដើម្បីឲ្យអ្នកជំនាន់ក្រោយទទួលបានបទពិសោធន៍ទាក់ទងការងារការទូតផងដែរ។
ព័ត៌មានជាតិ ថ្មីៗ
ឯកឧត្តម ហោ ណាំបូរ៉ា បានបញ្ចប់បេសកកម្មការងារការទូត នៅទីក្រុងហ្សាកាតា ប្រទេសឥណ្ឌូនេស៊ី កាលពីពេលថ្មីៗ នេះ ដោយត្រូវចូលនិវត្តន៍។ ឯកឧត្តម ជាកូនប្រុសបង្កើតរបស់ ឧបនាយករដ្ឋមន្ត្រី ហោ ណាំហុង អតីតរដ្ឋមន្ត្រី ក្រសួង ការបរទេស និងសហប្រតិបត្តិការអន្តរជាតិ។ លោកជាអគ្គលេខាធិការរង នៃរាជរដ្ឋាភិបាល។ មុននឹងតែងតាំងជាឯកអគ្គរាជទូតកម្ពុចាប្រចាំប្រទេស ឥណ្ឌូនេស៊ី ឯកឧត្តម ហោ ណាំបូរ៉ា ជាអតីត ឯកអគ្គរាជកម្ពុជា ប្រទេស អូស្ត្រាលី និង នូវែលសេឡង់ ចក្រភពអង់គ្លេស ប្រទេសដាណឺម៉ាក អៀរឡង់ ហ្វាំងឡង់ ន័រវេស ស៊ុយអែត និងអេត្យូពី ។ ឯកឧត្តម បានបញ្ជាក់ ដែរថា ក្នុងពេលដែលធ្វើទូតនៅក្រៅប្រទេស គឺ ឯកឧត្តម បានទទួលព័ត៌មានជាច្រើនពីក្រសួងព័ត៌មាន ក្នុងនោះទទួលបានពីទីភ្នាក់ងារសារព័ត៌មានកម្ពុជា AKP ។
ឯកឧត្តម រដ្ឋមន្រ្តី ខៀវ កាញារីទ្ធ បានកោតសរសើរពីលទ្ធផលការងារដ៏ល្អរបស់ ឯកឧត្តម ហោ ណាំបូរ៉ា ជាឯកអគ្គរាជទូត ប្រចាំនៅបណ្តាប្រទេស ជាច្រើន និងបានចងក្រងជាសៀវភៅ ដ៏មានសារប្រយោជន៍សម្រាប់ឲ្យនិស្សិត និងមន្រ្តីការទូតជំនាន់ក្រោយ ដកស្រង់បទពិសោធន៍ ដើម្បីសម្រេចភារកិច្ចជូនជាតិមាតុភូមិ៕
អត្ថបទ និង រូបថត ៖ ក្រសួងព័ត៌មាន
