នៅព្រឹកថ្ងៃទី២៥ ខែឧសភា ឆ្នាំ២០២០ នាទីស្ដីការក្រសួងព័ត៌មាន មានរៀបចំកិច្ចប្រជុំសាមញ្ញប្រចាំសប្តាហ៍របស់ថ្នាក់ដឹកនាំ ក្រសួងព័ត៌មាន ដែលមានការចូលរួមពីឯកឧត្តម លោកជំទាវ ជា អគ្គនាយក ទាំង ៥ ឯកឧត្តម លោកជំទាវ ជា រដ្ឋលេខាធិការ អនុរដ្ឋលេខាធិការ ទទួលបន្ទុកតាម ផ្នែក និងជំនាញ នីមួយៗ បាន ជម្រាបជូន ពីវឌ្ឍនភាព ការងារសំខាន់ៗ ដែលតាមផ្នែក តាមជំនាញ នីមួយៗ សម្រេច អនុវត្តន៍ បានក្នុងរយៈពេល ពេញ មួយសប្តាហ៍ កន្លងមកនេះ និងលើកជាទិសដៅ ផែនការ សម្មភាពការងារ ដែលត្រូវបន្ត បំពេញ នៅសប្តាហ៍ ខាងមុខទៀត ឲ្យបានកាន់ តែមាន ប្រសិទ្ធិភាព និងប្រសិទ្ធិផល ល្អប្រសើរបន្ថែមទៀត។
ជាមួយគ្នានេះដែរ ឯកឧត្តម ឃឹម វុទ្ធី អគ្គនាយកទូរទស្សន៍ជាតិកម្ពុជា បានជម្រាបជូនពី គម្រោងនៃកិច្ចសហការជាមួយសហព័ន្ធកីឡាប្រដាល់កម្ពុជាក្នុងការបង្កើតឲ្យមានជាកម្មវិធី កីឡាប្រដាល់អន្តរជាតិ ផ្សាយផ្ទាល់នៅលើកញ្ចក់ទូរទស្សន៍ជាតិកម្ពុជា (ទទក) ។
ឯកឧត្តម រដ្ឋមន្រ្តី ខៀវ កាញារីទ្ធ បានសម្ដែងនូវការគាំទ្រចំពោះគម្រោងបង្កើតឲ្យមាន កម្មវិធីកីឡាប្រដាល់នៅផ្សាយនៅទូរទស្សន៍ជាតិកម្ពុជា ហើយជាមួយនេះ ឯកឧត្តម ក៏ជំរុញលើក ទឹកចិត្តឲ្យថ្នាក់ដឹកនាំ មន្រ្តីគ្រប់លំដាប់នៃអគ្គនាយកដ្ឋានទូរទស្សន៍ជាតិកម្ពុជា ក៏ដូចជា បណ្តាអគ្គនាយកដ្ឋាននានា ក្រោមឱវាទក្រសួងព័ត៌មាន ត្រូវបន្តពង្រឹងសាមគ្គីភាពផ្ទៃក្នុង ឲ្យរឹងមាំ ក៏ដូចកិច្ចសហការជាមួយអង្គភាព ស្ថាប័នដទៃទៀតបានល្អ ដើម្បីបន្តបំពេញនូវរាល់កិច្ច ការងារឲ្យសម្រេចទទួលបានលទ្ធផលថ្មីៗបន្ថែមទៀត ជាពិសេសធ្វើឲ្យវិស័យព័ត៌មាន និងសោតទស្សន៍ នៅកម្ពុជាកាន់តែរីកចម្រើនទៅមុខទៀត។
ឯកឧត្តមរដ្ឋមន្រ្តី បានជំរុញឲ្យប្រព័ន្ធផ្សព្វផ្សាយរបស់ជាតិ ត្រូវបន្តផ្សព្វផ្សាយ ឲ្យបានទូលំទូលាយ កម្មវិធី ដែលទាក់ទង និងការប្រកបមុខរបស់រកទទួលទានប្រចាំថ្ងៃរបស់ ប្រជាពលរដ្ឋ ជាពិសេសទាក់ទងវិស័យ ឧស្សាហកម្ម ដែលត្រូវបានបង្វែរមក វិស័យកសិកម្ម វិញដោយសារសកលលោកជួបវិបត្តិជំងឺកូវីត១៩ ។ ជាមួយនេះ ប្រព័ន្ធផ្សព្វផ្សាយរបស់ជាតិ ក៏ត្រូវផ្សព្វផ្សាយពីសក្តានុពលនៃវិស័យ ទេសចរណ៍ ដែលកំពុងមានការងើបឡើងវិញខ្លះៗ ហើយពិនិត្យឃើញថា មានប្រជាពលរដ្ឋ ក្នុងស្រុកបានទៅដើរលេងកំសាន្ត នៅតាមតំបន់រមណីយដ្ឋានទេសចរណ៍ តាមបណ្តាខេត្ត មានចំនួនគួរឲ្យកត់សម្គាល់។ តែទោះជាយ៉ាងណា ការផ្សព្វផ្សាយពីវិធានការ ការពារ អំពីការបង្ការទប់ស្កាត់ ការឆ្លងរីករាលសដាលនៃជំងឺកូវីដ១៩ នៅតែត្រូវបន្តមិនអាចអាក់ខានបានឡើយ។
ក្រៅពីបាន ពិភាក្សាគ្នាអំពីកិច្ចការងារសំខាន់ៗក្នុងស្រុក ដែលក្រសួងព័ត៌មាន សម្រេចអនុវត្តបានក្នុងរយៈ ពេលកន្លងមក និងលើកទិសដៅដើម្បីបន្តអនុវត្តន៍ទៅពេលខាងមុខទៀតនោះ ឯកឧត្តម លោក ជំទាវដែលមានភារកិច្ចទទួលខុសត្រូវក្នុងកិច្ចការអន្តរជាតិ ក៏បានលើកពីការងារ ដែលក្រសួងព័ត៌មាន ត្រៀមចូលរួមក្នុងការរៀបចំកិច្ចប្រជុំកពូល អាស៊ី អឺរ៉ុប ហៅកាត់ថា ASEM នាចុងឆ្នាំ២០២០។ ក្នុងនាមកម្ពុជាធ្វើជាម្ចាស់ផ្ទះ តាមការគម្រោងទុក ទោះបីជាកិច្ចប្រជុំនោះអាចត្រូវលើកពេល ទៅប្រជុំនៅឆ្នាំក្រោយដោយសារ ការបារម្ភពីជំងឺកូវីដ១៩ ក៏ដោយ តែក្រសួងព័ត៌មាននៅតែ ត្រៀមមន្រ្តីគ្រប់ផ្នែកពាក់ព័ន្ធ ដើម្បីចូលរួមរៀបចំកិច្ចប្រជុំនេះ ឲ្យទទួលបានជោគជ័យ។
ក្រៅពីការគ្រោងទុកសម្រាប់កិច្ចប្រជុំ ASEM នេះដែរ ក្រសួងព័ត៌មាន ក៏បានគ្រោងបន្តទទួលរៀបចំ វេទិកាយុទ្ធសាស្រ្តចតុកោណ ផ្លូវមួយ ខ្សែក្រវ៉ាត់មួយ ជាមួយ ប្រទេសចិន ដែលគ្រោងមានអ្នកស្រាវជ្រាវ និង ធុរជន ល្បីៗ ប្រមាណ ៧០០ នាក់ ចូលរួមក្នុងវេទិកានៅរាជធានីភ្នំពេញ ។
អត្ថបទ និង រូបថត ៖ ក្រសួងព័ត៌មាន
