កាលពីរសៀលថ្ងៃទី២៤ ខែឧសភា ឆ្នាំ២០២០ ប្រជាពលរដ្ឋមានជីវភាពខ្វះខាតចំនួន ២៧គ្រួសារ ស្ថិតក្នុងសង្កាត់ចុងឃ្នាស់ ក្រុងសៀមរាប ទទួលបានអំណោយសប្បុរសធម៌ជាគ្រឿងឧបភោគបរិភោគ ពីព្រះសង្ឃ និងសប្បុរសជន ខណៈវិបត្តិនៃជំងឺកូវីដ១៩ នៅតែបន្តរីករាលដាលនៅលើសកលលោក និងកម្ពុជា។
អំណោយចែកជូនប្រជាពលរដ្ឋមានជីវភាពខ្វះខាតនាពេលនោះ មានការឧបត្ថម្ភពី ព្រះវិជ័យរង្សី ឡាច លាង ព្រះគ្រូប្រាសាទរង្សីអនុគណក្រុងសៀមរាប ព្រះគ្រូវិសារទោ ហ៊ាក់ គឹមហ៊ត់ហៅហំ ព្រះគ្រូចៅអធិការវត្តអារញ្ញសាគរ សហការជាមួយ ព្រះគ្រូវិបញ្ញាវិសុទ្ឋីរង្សីអកទ្ឋមោ ម៉ៃ ភីរុណ ព្រះចៅអធិការវត្តកោះខ្សាច់ សង្កាត់ចុងឃ្នៀស រួមជាមួយអាជ្ញាធរមូលដ្ឋានសង្កាត់ចុងឃ្នៀស។
ព្រះគ្រូចៅអធិការវត្តអារញ្ញសាគរ មានថេរដីកាថា៖ អំណោយសប្បុរសធម៌ដែលបាននាំយកមកចែកជូននានេះ ទទួលបានមកពីការបរិច្ចាគពីប្រជាពុទ្ឋបរិស័ទប្រគេនដល់ព្រះសង្ឃនាពេលកន្លងមក។ នេះមិនមែនជាលើកទី១ទេ ដែលក្រុមព្រះសង្ឃ និងសប្បុរសជននាំយកគ្រឿងឧបភោគបរិភោគចែកជូនអ្នកខ្វះខាត តាមរយៈការសហការជាមួយអាជ្ញាធរសង្កាត់ចុងឃ្នៀស ដើម្បីកំណត់ស្ថានភាពក្រីក្រពិតប្រាកដ ជាមួយគ្នានេះព្រះអង្គបានសុំការអធ្យាស្រ័យចំពោះគ្រួសារក្រីក្រជាច្រើនទៀតក្នុងមូលដ្ឋាននេះដែលមិនបានទទួល ព្រោះសម្ភារៈនិងថវិកាមានកំណត់។
ព័ត៌មានជាតិ ថ្មីៗ
តាមសេចក្តីរាយការណ៍របស់លោក អ៊ុ ណារី ចៅសង្កាត់ចុងឃ្នៀស បានឱ្យដឹងថា៖ សង្កាត់នេះមានប្រជាពលរដ្ឋប្រមាណជាង២៤០០គ្រួសារ ក្នុងនោះជាង២០០គ្រួសារ មានជីវភាពខ្វះខាត។ ក្នុងនោះប្រជាពលរដ្ឋនៅមូលដ្ឋាននេះភាគច្រើនប្រកបរបរនេសាទ និងបម្រើសេវាកម្មក្នុងវិស័យទេសចរណ៍ និងមួយចំនួនបានងាកចេញពីរបរនេសាទ ទៅ ធ្វើការការងារសំណង់នៅក្នុងក្រុង និងខ្លះទៅស៊ីឈ្នួលធ្វើស្រែចំការនិងដាំដំណាំ។ ប៉ុន្តែតាំងពីជំងឺកូវីដ១៩រាតត្បាតជាសកលមក អត់មានភ្ញៀវ សកម្មភាពសេវាកម្មទេសចរណ៍ក៍ពុំមានក៍អត់មាន អាកាសធាតុប្រែប្រួលទឹកទន្លេគោករាក់ពុំអាចអាស្រ័យផលជាមួយនឹងការនេសាទបាន បានបណ្តាលឱ្យពួកគាត់បាត់បង់មុខរបរជាបន្តបន្ទាប់និងមករស់នៅជុំគ្រួសារដោយពុំមានប្រាក់ចំណូលប្រចាំថ្ងៃឡើយ។
ប្រជាពលរដ្ឋមានជីវភាពខ្វះខាត ២៧គ្រួសារក្នុងសង្កាត់ចុងឃ្នាស់
ប្រជាពលរដ្ឋមានជីវភាពខ្វះខាត ២៧គ្រួសារក្នុងសង្កាត់ចុងឃ្នាស់ ទទួលគ្រឿងឧបភោគបរិភោគពីព្រះសង្ឃនិងសប្បុរសជន#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Monday, May 25, 2020
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
