កាលពីថ្ងៃទី២៤ ខែឧសភា ឆ្នាំ២០២០ អនុសាខាកាកបាទក្រហមកម្ពុជា ក្រុងសៀមរាប ចូលរួមដោយក្រុមការងារសហភាពសហព័ន្ធយុវជនកម្ពុជា ក្រុងសៀមរាប អាជ្ញាធរមូលដ្ឋាន និងកម្លាំងសឹករងក្រុង បាននាំយកអំណោយជាសម្ភារៈ គ្រឿងឧបភោគបរិភោគមួយចំនួន ចែកជូនដល់ប្រជាពលរដ្ឋចំនួន៥៣ គ្រួសារ ស្ថិតក្នុងសង្កាត់ ជ្រាវ ក្រុងសៀមរាប ដែលបានរងគ្រោះដោយសារខ្យល់កន្ត្រាក់ កាលពីល្ងាចថ្ងៃទី២២ ខែឧសភា ឆ្នាំ២០២០ និងមានជីវភាពខ្វះខាត។
លោក ហ៊ុន សម្បត្តិ នាយករដ្ឋបាលក្រុងសៀមរាប តំណាង លោក នួន ពុទ្ធារ៉ា ប្រធានគណៈកម្មាធិការអនុសាខាកាកបាទក្រហមកម្ពុជា ក្រុងសៀមរាប បញ្ជាក់ថា ក្នុងចំណោម ប្រជាពលរដ្ឋ៥៣គ្រួសារនេះ ៤៣គ្រួសាររងគ្រោះដោយសារខ្យល់កន្ត្រាក់ និង១០គ្រួសារទៀត មានកំពុងជួបបញ្ហាជីវភាពខ្វះខាត។
ក្នុងនាមលោកប្រធានគណៈកម្មាធិការអនុសាខាកាកបាទក្រហមកម្ពុជា ក្រុងសៀមរាប លោកសូមចូលរួមសោកស្ដាយចំពោះការបាត់បង់ទ្រព្យសម្បត្តិរបស់ប្រជាពលរដ្ឋក្នុងមូលដ្ឋាននេះ និងសូមចូលរួមរំលែកការលំបាកនេះ ពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងឯកឧត្តម ទៀ សីហា ប្រធានសាខាកាកបាទក្រហមកម្ពុជា ខេត្តសៀមរាប។
អំណោយសប្បុរសធម៌ដែលបានចែកជូននាពេលនោះរួមមាន៖ គ្រួសាររងគ្រោះរបើកដំបូលផ្ទះ ចំនួន៣៥គ្រួសារ ក្នុងមួយគ្រួសារទទួលបាន សង្ក័សីចំនួន ១០សន្លឹក អង្ករ១០គីឡូក្រាម ទឹកត្រី០២ដប ទឹកស៊ីអ៊ីវ ០៣ដប និង ទឹកសុទ្ឋ០១យួរ ។ ចំពោះគ្រួសារ រងគ្រោះរលំផ្ទះ ចំនួន០៨គ្រួសារ ក្នុងមួយគ្រួសារទទួលបាន ស័ង្កសី១៦សន្លឹក អង្ករ១០គីឡូក្រាម ទឹកត្រី០២ដប ទឹកស៊ីអ៊ីវ ០៣ដប និង ទឹកសុទ្ឋ០១យួរ។ ដោយឡែក គ្រួសារមានជីវភាពខ្វះខាត ១០គ្រួសារ ក្នុងមួយគ្រួសារទទួលបាន អង្ករចំនួន១០គីឡូរក្រាម ទឹកត្រីចំនួន០២ដប ទឹកស៊ីអ៊ីវ ០៣ដប និង ទឹកសុទ្ឋ០១យួរ។
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក សេង ផល្លី
