នៅថ្ងៃទី២២ ខែឧសភា ឆ្នាំ២០២០ លេខាធិការដ្ឋាន នៃប្រព័ន្ធស្បៀងបម្រុងកម្ពុជា (ប.ស.ប.ក)នៃក្រសួងសេដ្ឋកិច្ច និងហិរញ្ញវត្ថុបានរៀបចំ សិក្ខាសាលាស្តីពី “ការផ្សព្វផ្សាយ និងការផ្គត់ផ្គង់គ្រាប់ពូជបន្លែ ដោយឥតគិតថ្លៃដល់កសិករ និងកម្មករ ដែលរងផលប៉ះពាល់ពីជំងឺកូវីដ-១៩ ដើម្បីជំរុញការដាំដុះបន្លែសុវត្ថិភាព” ក្នុងគោលដៅ លើកទឹកចិត្ត និងជំរុញចលនាបង្កើនការដាំដុះក្នុងស្រុក បន្ថែមប្រាក់ចំណូល ពីលើការងារបង្កបង្កើនផលស្រូវស្រែនោះ។
លោក ង៉ាន់ ភិរុណ អភិបាលរងខេត្តសៀមរាប បង្ហាញថា នាពេលកន្លងមក កម្មវិធីរបស់ប្រព័ន្ធស្បៀងបម្រុងកម្ពុជា បានអនុវត្តន៍នៅខេត្តសៀមរាប ចំនួន២លើក ដោយ លើកទី១ នៅចុងឆ្នាំ២០១៣ ដោយបានបែងចែកពូជស្រូវ និងពូជដំណាំបន្លែដល់កសិករ ដែលរងគ្រោះ ដោយសារទឹកជំនន់នៅឆ្នាំ២០១៣ នៅតាមមូលដ្ឋានចំនួន ០៩កន្លែង រួមមាន៖ ក្រុងសៀមរាប ស្រុកក្រឡាញ់ វ៉ារិន ពួក ជីក្រែង ស្រីស្នំ សូទ្រនិគម ប្រាសាទបាគង និងស្រុកអង្គរជុំ ស្មើនឹង៤៦៦គ្រួសារ និង លើកទី២ ចាប់ពីខែមេសា ដល់ខែឧសភា ឆ្នាំ២០១៨ បានបែងចែកពូជដំណាំបន្លែដល់កសិករ ដែលមានបំណងចង់ដាំចុះដំណាំបន្លែបន្ថែម តាមមូលដ្ឋានចំនួន ០៩ ក្រុង-ស្រុក ស្មើនឹង ៧៦ឃុំ-សង្កាត់សរុបចំនួន ២៩,៤៧៦គ្រួសារ។ ស្របពេលវិបត្តិនៃជំងឺកូវីដ១៩ កំពុងរីករាលដាលនៅលើសកល និងកម្ពុជា នេះជាលើកទី៣ហើយ ដែលក្រសួងសេដ្ឋកិច្ច និងហិរញ្ញវត្ថុ បានចូលរួមជួយដល់ប្រជាពលរដ្ឋក្នុងខេត្តសៀមរាប ដែលមានបំណងដាំដុះដំណាំបន្លែ តាមឃុំ-សង្កាត់នៅទូទាំងខេត្ត។
ឯកឧត្តម បណ្ឌិត វង់ សណ្តាប់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានលេខាធិការដ្ឋានប្រព័ន្ធស្បៀងបម្រុងកម្ពុជា លើកឡើងថា ការអនុវត្តគម្រោងនេះ គឺជាទស្សនវិស័យដ៏វែងឆ្ងាយរបស់រាជរដ្ឋាភិបាល ដល់ការលើកទឹកចិត្តនិងជំរុញចលនាបង្កើនការដាំដុះក្នុងស្រុក ដើម្បីកាត់បន្ថយការនាំចូលបន្លែពីប្រទេសជាតិខាង ជាពិសេស ផ្តោតទៅលើប្រជាកសិករ កំពុងប្រឈមនឹងជីវភាពខ្វះខាត ឲ្យមានលទ្ធភាពរកប្រាក់ចំណូលគ្រួសារ តាមរយៈនៃការដាំដុះផលដំណាំ បន្ថែមពីលើការងារបង្កបង្កើនផលស្រូវស្រែ។ ទោះបី ក្រសួងសេដ្ឋកិច្ចនិងហិរញ្ញវត្ថ ពុំមែនជាស្ថាប័នជំនាញកសិកម្ម ប៉ុន្តែក្រសួងមានទំនួលខុសត្រូវ លើការចាត់ចែង និងផ្តល់លទ្ធភាព ដើម្បីឲ្យកិច្ចការទាំងនេះ មានដំណើរការល្អនៅថ្នាក់ក្រោមជាតិ ក្រោមកិច្ចសហការជាមួយអាជ្ញាធរមូលដ្ឋាន និងស្ថាប័នជំនាញកសិកម្ម។
ព័ត៌មានជាតិ ថ្មីៗ
ឯកឧត្តមបញ្ចាក់ថា នៅចំពោះមុខ សម្រាប់ខេត្តសៀមរាប គម្រោងនេះ ត្រូវបានផ្សារភ្ជាប់ជាមួយនឹងស្ថានភាពនៃវិបត្តិកូវីដ១៩ ដែលកម្មករកសិករកំពុងជួបបញ្ងាប្រឈមជីវភាពខ្វះខាត ដោយសារតែវិស័យទេសចរណ៍ត្រូវបានធ្លាក់ចុះយ៉ាងខ្លាំង។
តាមរយៈអង្គសិក្ខាសាលានេះ ឯកឧត្តមសង្ឃឹមថា អាជ្ញាធរមូលដ្ឋាន អ្នកពាក់ព័ន្ធទាំងអស់នឹងកំណត់គោលដៅបានច្បាស់លាស់ និងប្រមូលទិន្នន័យបានលឿនរហ័ស ដើម្បីគម្រោងបានចាប់ផ្តើមដំណើរការទាន់ពេលវេលា។
លេខាធិការដ្ឋាននៃប្រព័ន្ធស្បៀងបម្រុងកម្ពុជា ជំរុញកសិករ និងកម្មករ រងផលប៉ះ
លេខាធិការដ្ឋាននៃប្រព័ន្ធស្បៀងបម្រុងកម្ពុជា ជំរុញកសិករ និងកម្មករ រងផលប៉ះពាល់ដោយជំងឺកូវីដ១៩ ក្នុងខេត្តសៀមរាប ដាំដុះបន្លែសុវត្ថិភាព#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Friday, May 22, 2020
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
