កាលពីថ្ងៃទី២៩ ខែឧសភា ឆ្នាំ២០២០ សាសនិកជន កាន់ព្រះពុទ្ធសាសនា និងព្រហ្មញ្ញសាសនា នៅកម្ពុជា និងមកពីប្រទេសឥណ្ឌា បានពិធីក្រុងពាលី បួងសួងសុំសេចក្ដីសុខសេចក្ដីចម្រើន និងគ្រោងសាងសង់មជ្ឈមណ្ឌលសាសនារួម ធំមួយក្នុងខេត្តសៀមរាបនាពេលខាងមុខ។
លោក អៀង ចំរើន តំណាងអ្នករៀបចំកម្មវិធីនេះ បានឲ្យដឹងថា ពិធីក្រុងពាលីនេះមានពិធីថ្វាយគ្រឿងសក្ការៈ និង ប្រកាសឧទ្ទិសបួងសួង ចំពោះបារមីវត្ថុសក្តិសិទ្ធ ទឹកដីនៃខេត្តសៀមរាប ក្នុងការកសាងមជ្ឈមណ្ឌលសាសនារួម សម្រាប់ឲ្យសាសនិកជនទូទៅ គោរពប្រតិបត្តិតាមនៅមាគាដ៏ល្អសម្រាប់សាសនារបស់ពួកគេ។ អ្នកតំណាងរៀបចំពិធីនេះ បន្ថែមថា គម្រោងមជ្ឈមណ្ឌល នៃសាសនាទាំងពីរនេះ គឺព្រហ្មញ្ញសាសនា និងព្រះពុទ្ធសាសនា កសាងឡើងលើផ្ទៃដី១០០ហិកតា ក្បែររម្មណីយដ្ឋានត្រាវកុដ្ឋ ស្រុកប្រាសាទបាគង ដែលមានទឹកដ៏ស័កសិទ្ធ ហូរកាត់ស្ទឹងលិង្គ ១០០០ ធ្លាក់មកពីលើភ្នំគូលែន។ លោករំពឹងថា គម្រោងមជ្ឈមណ្ឌលសាសនារួម នៅខេត្ដសៀមរាបនេះ នឹងអាចទាក់ទាញអ្នកទេសចរមក កាន់ប្រទេសកម្ពុជាកាន់តែច្រើនបន្ថែមទៀត។
បើតាមក្រុមការងារពិធីបួងសួង គម្រោងនេះ នឹងមានប្រទេសចំនួន៧ ចូលរួម ខណៈបច្ចុប្បន្នមានប្រទេស៣ គឺកម្ពុជា ឥណ្ឌា និងស្រីលង្កា។
ចំណែកតំណាងមកពីប្រទេសឥណ្ឌាជាសាសនិកនៃព្រហ្មញ្ញសាសនា បានមានប្រសាសន៏ផងដែរថា ការប្រារព្ធពិធីធ្វើឡើងលើកទី៣ហើយ ដែលលើកទី១នៅក្រុងសៀមរាប លើកទី២លើភ្នំគូលែន នឹងលើកទី៣នាពេលនេះ។ លោកស្រីបានបន្ដថា ក្រុមការងារសាសនិកនៃព្រហ្មញ្ញសាសនា នៃមជ្ឈមណ្ឌលសាសនានេះ មានគោលបំណង អប់រំផ្លូវចិត្ត ការប្រតិបត្តិសាសនា និង ការហ្វឹកហ្វឺនផ្នែកវិជ្ជាជីវ:ឯកទេសផ្សេងៗជាច្រើនទៀត៕
អត្ថបទ និង រូបភាព៖ បូ សាវី
