តាមរយៈការចុះផ្សាយរបស់ ហ្វេសប៊ុកផ្លូវការរដ្ឋបាលខេត្តសៀមរាប នៅថ្ងៃទី៣១ ខែឧសភា ឆ្នាំ២០២០នេះ អាជ្ញាធរខេត្តបានស្រាវជ្រាវ និងឃាត់ខ្លួនបានមេខ្យល់ នាំប្រជាពលរដ្ឋខ្មែរ ទៅធ្វើការខុសច្បាប់នៅប្រទេសថៃ ចំនួនពីរនាក់ បន្ទាប់ពីពួកគេទាំង១៩នាក់ បម្រុងធ្វើដំណើរឆ្លងដែនខុសច្បាប់ តាមច្រកព្រំដែនអន្តរជាតិកម្ពុជា-ថៃ នៅខេត្តបន្ទាយមានជ័យ។
ក្រោមកិច្ចអន្តរាគមន៍ពីឯកឧត្តម ទៀ សីហា អភិបាលខេត្តសៀមរាប បានចាត់ លោកស្រី យូ សុភា អភិបាលរងខេត្ត និងជាប្រធានក្រុមការងារខេត្តសៀមរាបប្រចាំការ នៅច្រកអន្តរជាតិប៉ោយប៉ែត ច្រករបៀងអូរបីជាន និងច្រករបៀងម៉ាឡៃ ជាតំណាង ដើម្បីដឹកនាំ ក្រុមការងារមន្ទីរ-អង្គភាពជំនាញខេត្ត ទៅទទួលប្រជាពលរដ្ឋខ្មែរទាំង១៩ នាក់ មកធ្វើចត្តាឡីស័កនៅខេត្តសៀមរាប។
តាមរបាយការណ៍របស់លេខាធិការដ្ឋានប្រយុទ្ធប្រឆាំងអំពើជួញដូរមនុស្សខេត្តសៀមរាប បង្ហាញថា កាលពីវេលាម៉ោងប្រមាណ ១០យប់ ថ្ងៃទី២៨ ខែឧសភា ឆ្នាំ២០២០នេះ ក្នុងចំណោមប្រជាពលរដ្ឋខ្មែរចំនួន ១៩នាក់ ក្នុងនោះមានកុមារអាយុ ៦ខែម្នាក់ និងអាយុ ៣ឆ្នាំម្នាក់ មានទីលំនៅក្នុងភូមិគោកដូង ឃុំត្រីញ័រ ស្រុកពួក ខេត្តសៀមរាប ត្រូវបានមេខ្យល់លួងលោមទៅធ្វើការនៅប្រទេសថៃ។ ប៉ុន្តែដោយសារអ្នកបើកបររថយន្តឈ្នូលដឹកប្រជាពលរដ្ឋឆ្លងដែននោះ វង្វេងផ្លូវ អ្នកបើកបរបាន ទម្លាក់ពួកគេចោលនៅកណ្តាលចំការដំឡូង ស្ថិតនៅចំណុចក្លិនទា ភូមិរុន ឃុំសិង្ហ ស្រុកអូរជ្រៅ ខេត្តបន្ទាយមានជ័យ ហើយត្រូវបានអ្នកចាំការដំឡូងប្រទះឃើញ និងបានរាយការណ៍ទៅលោកមេឃុំសិង្ហ និងរដ្ឋបាលស្រុកអូរជ្រៅ ព្រមទាំងជូនពួកគាត់មកដល់ សាលាឃុំសិង្ហ នៅព្រឹកថ្ងៃទី២៩ ខែឧសភា ដើម្បីសាកសួរព័ត៌មាន។
តាមរបាយការណ៍ដដែល សមត្ថកិច្ចជំនាញខេត្ត បានស្រាវជ្រាវ រកឃើញថា ក្នុងចំណោមប្រជាពលរដ្ឋទាំង ១៩ នាក់នោះ មានពីរនាក់គឺជាមេខ្យល់ រស់នៅភូមិគោកដូង ឃុំត្រីញ័រ ស្រុកពួក ខេត្តសៀមរាប។
តាមចម្លើយសារភាពរបស់មេខ្យល់ទាំងពីរ ពួកគេបានស្វែងរកប្រជាពលរដ្ឋខ្មែរ ទៅធ្វើការនៅប្រទេសថៃតាមការចង់បានរបស់ថៅកែ នៅខេត្តរ៉ាក់យ៉ង ដោយសន្យា ថាមិនត្រូវការលិខិតឆ្លងដែនឡើយ ប៉ុន្តែ តម្រូវឲ្យពលករម្នាក់ៗបង់ប្រាក់ ៣ពាន់បាតជាមុន។ ក្នុងចំណោមនោះ ប្រជាពលរដ្ឋខ្មែរចំនួន ១៥នាក់ ធ្លាប់បានទៅធ្វើការខេត្ត រ៉ាក់យ៉ង ប្រទេសថៃរួចមកហើយ។
លោកស្រី យូ សុភា អភិបាលរងខេត្តសៀមរាប បានថ្លែងអំណរគុណយ៉ាងជ្រាលជ្រៅ ចំពោះអាជ្ញាធរខេត្តបន្ទាយមានជ័យ ពិសេស ឯកឧត្តមអភិបាលខេត្ត លោកអភិបាលស្រុក ក្រុមប្រឹក្សាឃុំ មេភូមិ និងប្រជាការពារភូមិទាំងអស់ក្នុងខេត្តបន្ទាយមានជ័យ ដែលជួយសង្គ្រោះប្រជាពលរដ្ឋខេត្តសៀមរាប ពីមេខ្យល់ដែលនាំចេញឆ្លងដែនដោយខុសច្បាប់ទៅប្រទេសថៃ ជាពិសេសថ្លែងអំណរគុណចំពោះកម្លាំងសមត្ថកិច្ចនិងមន្ត្រីពាក់ព័ន្ធក្នុងខេត្តសៀមរាប ដែលបានស្រាវជ្រាវរកឃើញ និង ឃាត់ខ្លួនមុខសញ្ញា នាំពលរដ្ឋខ្មែរទៅធ្វើការនៅក្រៅប្រទេសដោយខុសច្បាប់។
លោកស្រីអភិបាលរងខេត្ត ក៏បានអំពាវនាវ និង សំណូមពរដល់ប្រជាពលរដ្ឋទាំងអស់ ត្រូវអត់ធ្មត់មួយរយៈសិន ក្នុងការឆ្លងដែនទៅរកការងារធ្វើក្នុងប្រទេសថៃ ដោយត្រូវរងចាំឲ្យសភាពការណ៍នៃជំងឺកូវីដ១៩ បានស្រាកស្រាន ឬត្រូវបានបញ្ចប់ និង រង់ចាំប្រទេសថៃបញ្ចប់ការដាក់ប្រទេសក្នុងគ្រាអាសន្ន ឬមានការបញ្ជាក់ជាផ្លូវការណាមួយ រវាងប្រទេសកម្ពុជា និងប្រទេសថៃ ក្នុងការបើកដំណើរការច្រកព្រំដែនរវាងប្រទេសទាំងពីរ ពិសេសចំពោះប្រជាពលរដ្ឋ ដែលត្រូវទៅប្រទេសថៃដោយស្របច្បាប់ និងមានឯកសារត្រឹមត្រូវតាមច្បាប់កំណត់របស់ប្រទេសនីមួយៗ ៕
មេខ្យល់ចំនួន០២នាក់នៅស្រុកពួក ដែលនាំពលរដ្ឋខ្មែរទៅធ្វើការដោយខុសច្បាប់………
មេខ្យល់ចំនួន០២នាក់នៅស្រុកពួក ដែលនាំពលរដ្ឋខ្មែរទៅធ្វើការដោយខុសច្បាប់នៅប្រទេសថៃ ត្រូវបានសមត្ថកិច្ចនគរបាលខេត្តសៀមរាបឃាត់ខ្លួន#ទូរទស្សន៍ជាតិខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Sunday, May 31, 2020
