លោក លឹម វុឌ្ឍី អនុប្រធានសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ខេត្តសៀមរាប បានឲ្យដឹងថា នាព្រឹកថ្ងៃទី០១ ខែមិថុនា ឆ្នាំ២០២០នេះ ក្រោមកិច្ចសហការជាមួយមន្ទីរពាណិជ្ជកម្មខេត្ត បានចុះត្រួតពិនិត្យរកភាពមិនប្រក្រតីលើផលិតផលម្ហូបអាហារនិងគ្រឿងឧបភោគបរិភោគ ដូចជាម្ហូបចំណីអាហារ និងគ្រឿងកំប៉ុងផ្សេងៗ ដែលបានដាក់តាំងលក់នៅក្នុងផ្សារសាមគ្គី ផ្សារអាស៊ី ផ្សារអង្គរម៉ាក់ឃីត និង ហ៊ុយ ម៉េង មីនីម៉ាត ហើយបន្ទាប់ពីបានត្រូតពិនិត្យនឹងធ្វើតេស្តរួចមក គឺពុំបានរកឃើញនូវសារធាតុគីមីដែលត្រូវបានគេដាក់ទៅលើចំណីអាហារដើម្បីឲ្យរក្សាទុកបានយូរ នឹងផុតកំណត់ហួសកាលបរិច្ឆេទនោះឡើយ ចំពោះម្ហូបចំណីទាំងអស់នោះ វាមានលក្ខណ:ល្អបែបធម្មជាតិ និងមានសុវត្ថិភាពថែមទៀតផង ។
លោក លឹម វុឌ្ឍី បានបញ្ជាក់ទៀតថា ទោះជាយ៉ាងនេះក្ដី ក៏មន្ត្រីជំនាញរបស់យើង នៅតែបន្តចុះត្រួតពិនិត្យរកភាពមិនប្រក្រតីលើផលិតផលម្ហូបអាហារ និងគ្រឿងឧបភោគបរិភោគ តាមទីតាំងផ្សេងៗទៀត ជាប់ជាប្រចាំដោយធ្វើការអង្កេត ត្រួតពិនិត្យ ស្រាវជ្រាវ រកភាពមិនប្រក្រតីលើផលិតផលម្ហូបអាហារ ឬក៏មិនមែនម្ហូបអាហារដែលដាក់លក់លើទីផ្សារ និងបណ្តាញលក់ដូរតាមអនឡាញ ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
