នៅរសៀលថ្ងៃទី១៦ ខែមិថុនា ឆ្នាំ២០២០នេះ ឯកឧត្ដម ទៀ សីហា អភិបាលខេត្ដសៀមរាប អញ្ជើញជាអធិបតី ក្នុងពិធីប្រគល់រថយន្តបោសសម្អាតផ្លូវចំនួន៣គ្រឿង ដល់រដ្ឋបាលក្រុងសៀមរាប ដើម្បីលើកកម្ពស់បរិស្ថាន និងសោភណ្ឌភាពក្នុងក្រុង។
រថយន្តទាំង៣គ្រឿងនេះ ពីរគ្រឿង ជាជំនួយរបស់ប្រទេសចិន និង មួយគ្រឿងទៀត ជាជំនួយរបស់សហរដ្ឋអាមេរិក ដែលបានផ្ដល់ជូនតាមរយៈរដ្ឋបាលខេត្តសៀមរាប។
ថ្លែងក្នុងឱកាសនោះ ឯកឧត្ដមអភិបាលខេត្ដសៀមរាប មានប្រសាសន៍ថា ជំនួយរថយន្តបោសសម្អាតផ្លូវទាំងនេះ ពិតមានសារសំខាន់ណាស់ ក្នុងការថែរក្សាសុខុមាលភាពប្រជាពលរដ្ឋ និងចូលរួមលើកកម្ពស់សោភណ្ឌភាពទីក្រុង ក្នុងការទាក់ទាញភ្ញៀវទេសចរ។
ព័ត៌មានជាតិ ថ្មីៗ
លោក នួន ពុទ្ធារ៉ា អភិបាលក្រុងសៀមរាប លើកឡើងថា បច្ចុប្បន្នផ្លូវកៅស៊ូជាច្រើនខ្សែ ក្នុងក្រុងសៀមរាប ដែលជាគម្រោងរបស់រដ្ឋបាលខេត្ត កំពុងធ្វើការស្ថាបនា រថយន្តទាំង៣គ្រឿងនេះ មានតួនាទីយ៉ាងសំខាន់ ក្នុងការបោសសម្អាតដីនៅតាមដងផ្លូវ ដើម្បីកាត់បន្ថយដីហុយទៅលើប្រជាពលរដ្ឋនៅតាមដងផ្លូវ។
សូមជម្រាបថា រថយន្តបោសសម្អាតផ្លូវដ៏ទំនើបនេះ មានភ្ជាប់ឧបករណ៍ បាញ់ទឹក បូមដី និងបោសដី ជាពិសេសវាដំណើរការព្រមគ្នា ដើម្បីចៀសវាងដីហុយ និងពុំចាំបាច់ប្រើមនុស្សច្រើនក្នុងពេលប្រតិបត្តការសម្អាតឡើយ។
អត្ថបទ និង រូបថត ៖ បូ សាវី
កែសម្រួលអត្ថបទ ៖ សេង ផល្លី
