នៅព្រឹកថ្ងៃទី១៧ ខែមិថុនា ឆ្នាំ២០២០នេះ គណៈកម្មាធិការសាខាកាកបាទក្រហមកម្ពុជាខេត្តសៀមរាប ដឹកនាំដោយលោកជំទាវ ទាង អេង ទៀសីហា អនុប្រធានគណៈកម្មាធិការសាខាកាកបាទក្រហមកម្ពុជាខេត្ត និងជាតំណាងដ៏ខ្ពង់ខ្ពស់ឯកឧត្ត ទៀ សីហា ប្រធានគណៈកម្មាធិការសាខា និងជាអភិបាលខេត្តសៀមរាប រួមជាមួយថ្នាក់ដឹកនាំមន្ទីរ អង្គភាព និង មន្ត្រីអ្នកមុខអ្នកការក្នុងខេត្ត បានរៀបចំពិធីអបអរសាទរព្រះរាជពិធីចម្រើនព្រះជន្មវស្សា សម្តេចព្រះមហាក្សត្រី នរោត្តម មុនិនាថ សីហនុ ព្រះវរៈរាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាទីសក្ការៈដ៏ខ្ពង់ខ្ពស់បំផុត ក្នុងគម្រប់៨៤ យាងចូល ៨៥ ព្រះវស្សា នៅប្រាសាទបាលិលេយ្យ ស្ថិតក្នុងសង្កាត់នគរធំ ក្រុងសៀមរាប ខេត្តសៀមរាប ។
ក្នុងឱកាសនោះ សមាជិកសមាជិកា បានអុជទៀនធូប ថ្វាយផ្កាភ្ញី ចំពោះព្រះពុទ្ឋរូប និងបានលើកហត្ថប្រណម្យបួងសួង ដល់ព្រះរតនត្រ័យកែវទាំងបី គុណបុណ្យវត្ថុស័ក្តិសិទ្ធិទាំងអស់នៅលើលោក ជាពិសេសសូមទេព្តារក្សាព្រះមហាស្វេតច្ឆត្រ បារមីព្រះវិញ្ញាណក្ខន្ធនៃអតីតព្រះមហាក្សត្រ ព្រះមហាក្សត្រិយានីខ្មែរគ្រប់ព្រះអង្គ សូមឫទី្ធតេជៈបារមីខ្លាំងក្លាទាំងអស់ ជាពិសេសបារមី ព្រះវិញ្ញាណក្ខន្ធ អតីតព្រះករុណា ព្រះមហាវីរក្សត្រ ព្រះវររាជបិតា ព្រះបរមរតនកោដ្ឋ សូមប្រោសព្រះរាជប្រទាន ប្រោះព្រំប្រសិទ្ធពរជ័យ សិរីសួស្តី ថ្វាយសម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គប្រកបដោយព្រះបរមសុខគ្រប់ប្រការមានព្រះរាជសុខភាពល្អបរិបូរណ៍ និងព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់ត្រជុំនៃប្រជានុរាស្រ្ត ជាកូន ចៅ ចៅទួត របស់ព្រះអង្គទូទាំងប្រទេសយូរអង្វែងរៀងដរាបតទៅ ។
ជាមួយគ្នានេះដែរ សាខាកាកបាទក្រហមកម្ពុជាខេត្តសៀមរាប បានថ្វាយសារលិខិតថ្វាយព្រះពរ ដែលមានខ្លឹមសារថា៖ ក្នុងនាមថ្នាក់ដឹកនាំ មន្ត្រីរាជការគ្រប់លំដាប់ថ្នាក់ កងកម្លាំងប្រដាប់អាវុធ និងប្រជាពលរដ្ឋទូទាំងខេត្តសៀមរាប និងក្នុងនាម ទូលព្រះបង្គំផ្ទាល់ សូមព្រះបរមរាជានុញ្ញាត អភិវន្ទ លំឱនកាយ វាចាចិត្ត ក្រាបបង្គំ សម្តែង ថ្វាយ នូវព្រះសព្ទសាធុការពរជ័យ សិរីសួស្តី វិបុលសុខ និងមហាប្រសើរគ្រប់យ៉ាង ចំពោះ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត និងសូមព្រះអង្គទ្រង់ប្រកបដោយព្រះរាជសុខភាពល្អបរិបូរណ៍ព្រះកាយពលរឹងមាំខ្លាំងក្លា ព្រះបញ្ញាញាណភ្លឺថ្លា ត្រចះត្រចង់ ព្រះជន្មាយុយឺនយូរ ជាងរយព្រះវស្សា ចាកផុតពីព្រះរោគាព្យាធិនានាតរៀងទៅ។ទូលព្រះបង្គំជាខ្ញុំ សូមធ្វើអភិវន្ទកិច្ច ថ្វាយព្រះពរបវរមហាប្រសើរ និងសូមលើក ហត្ថទាំងទ្វេ ប្រណម្យបួងសួង ដល់គុណ បុណ្យ ព្រះរតនត្រ័យ កែវទាំងបី បារមី ទេវតា ថែរក្សា ប្រាង្គប្រាសាទនានា ក្នុងទឹកដីសៀមរាបអង្គរ មហិទ្ធិឫទ្ធិទេវតារក្សាព្រះមហាស្វេតច្ឆត្រ ទេវតាឆ្នាំថ្មី ឆ្នាំជូត ទោស័ក ព.ស២៥៦៤ និងវត្ថុស័ក្តិសិទ្ធិក្នុងលោកព្រមទាំងព្រះវិញ្ញាណក្ខន្ធព្រះបរមរតនៈកោដ្ឋ សូមមេត្តាប្រោះព្រំទ្រទ្រង់ គាំពារ ថ្វាយព្រះពរជ័យ សិរីមង្គល វិបុលសុខ គ្រប់ប្រការថ្វាយ សម្តេចព្រះមហាក្សត្រី ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល សូមទ្រង់សមប្រកបដោយ ពុទ្ធពរទាំងបួនប្រការ គឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ។
ព័ត៌មានជាតិ ថ្មីៗ
គួររំលឹកថា ក្នុងឱកាសនៃពិធីអបអរសាទរព្រះរាជពិធីចម្រើនព្រះជន្មសម្តេចព្រះមហាក្សត្រី នរោត្តម មុនិនាថ សីហនុ ព្រះវរៈរាជមាតាជាតិខ្មែរ គណៈកម្មាធិការកាកបាទក្រហមកម្ពុជាសាខាខេត្ត បាននាំយកនូវចង្ហាន់ ទេយ្យទាន និងបច្ច័យ ប្រគេនព្រះសង្ឃ១២អង្គតំណាង៧វត្ត , ជូនដូនជីតាជី២០នាក់ និងផ្តល់អំណោយសប្បុរសធម៌របស់សាខាកាកបាទក្រហមខេត្តដល់ប្រជាពលរដ្ឋក្រីក្របំផុតចំនួន៣០គ្រួសារផងដែរ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
