នៅព្រឹកថ្ងៃទី១៨ ខែមិថុនា ឆ្នាំ២០២០ ឯកឧត្តម ទៀ សីហា អភិបាលខេត្តសៀមរាប បានអញ្ជើញទទួល សម្ភារៈ និងស្បៀងអាហារ ឧបត្ថម្ភដោយក្រុមហ៊ុន ស៊ូមេក និងក្រុមហ៊ុន ស៊ីង ស៊ីង របស់ប្រទេសចិន ដើម្បរួមចំណែកជាមួយរដ្ឋបាលខេត្ត ក្នុងការបង្ការទប់ស្កាត់ ការរីករាលដាលនៃជំងឺកូវីដ១៩ និងជួយដល់ប្រជាពលរដ្ឋខ្វះខាតក្នុងខេត្ត។
មានប្រសាសន៍ក្នុងឱកាសនោះ ឯកឧត្តម អភិបាលខេត្ត បានថ្លែងអំណរគុណដល់ ចំពោះទឹកចិត្តសប្បុរស របស់ក្រុមហ៊ុនទាំងពីរ ដែលបានឧបត្ថម្ភជាសម្ភារៈ ក៏ដូចជាស្បៀងអាហារ ជូនដល់រដ្ឋបាលខេត្តសៀមរាប ដើម្បីជួយដល់ប្រជាពលរដ្ឋ កំពុងជួបការលំបាកអំឡុងពេលនៃវិបត្តិជំងឺកូវីដ១៩។ ទោះបី បច្ចុប្បន្នក្នុងខេត្តសៀមរាប ពុំមានករណីឆ្លង ឬអ្នកជំងឺកូវីដ១៩ក្ដី ប៉ុន្តែរដ្ឋបាលខេត្ត នៅតែបន្តយកចិត្តទុកដាក់ខ្ពស់ ក្នុងការបង្ការការពារ នៃជំងឺនេះ ស្របតាមសេចក្ដីណែនាំរបស់រាជរដ្ឋាភិបាល។
អំណោយសប្បុសធម៌ ប្រគល់ជូនរដ្ឋបាលខេត្តនៅពេលនោះ រួមមាន អង្ករ ៨តោន ទឹកបរិសុទ្ធ ៨៨កេស និងម៉ាសចំនួន ៨៨៨ម៉ាស។
សូមជម្រាបថា នាពេលកន្លងមក រដ្ឋបាលខេត្តសៀមរាប បានណែនាំដល់រដ្ឋបាលក្រុង-ស្រុកទាំង១២ ត្រូវតាមដាន អំពីជីវភាពប្រជាពលរដ្ឋខ្មែរទើបត្រឡប់ពីបរទេស ដើម្បីជួយសម្រួលការរស់នៅ និងស្បៀងអាហារ ដល់ពួកគេ អំឡុងពេលធ្វើការដាក់ឲ្យនៅដាច់ដោយឡែករយៈពេល១៤ថ្ងៃ។
អត្ថបទ និង រូបថត ៖ លោក សេង ផល្លី និង លោក ធន់ ពូថេ
