នៅព្រឹកថ្ងៃទី១៩ ខែមិថុនា ឆ្នាំ២០២០នេះ ប្រធានក្រុមការងាររាជរដ្ឋាភិបាលចុះជួយឃុំពង្រ ស្រុកកោះសូទិន ខេត្តកំពង់ចាម បាននាំយកអំណោយ របស់ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន និងលោកជំទាវ ទៅចែកជូនប្រជាពលរដ្ឋខ្វះខាតចំនួន២៤០គ្រួសារ នៅឃុំពង្រ ដើម្បីដោះស្រាយជីវភាពប្រចាំថ្ងៃ អំឡុងពេលវិបត្តិជំងឺកូវីដ១៩។
លោកជំទាវ ឈឹម ពៅ សុកាន់ឌី អគ្គនាយិកានៃអគ្គនាយកដ្ឋានវិទ្យុជាតិកម្ពុជា និងជាប្រធានក្រុមការងាររាជរដ្ឋាភិបាលចុះជួយឃុំពង្រ លើកឡើងថា ក្នុងកាលៈទេសៈដ៏លំបាក នៃជំងឺកូវីដ១៩ ប្រជាពលរដ្ឋមួយចំនួន មានការខ្វះខាតក្នុងជីវភាពប្រចាំថ្ងៃ ឬមិនអាចចេញទៅបំពេញការងារស្វែងរកប្រាក់ចំណូលបាន។ ទន្ទឹមនោះ វិធានការបង្ការ និងទប់ស្កាត់ការរីករាលដាលនៃជម្ងឺកូវីដ១៩ នៅតែជាកត្ដាចាំបាច់ចំពោះប្រជាពលរដ្ឋក្នុងប្រទេស ទោះបីប្រទេសកម្ពុជា មានភាពធូរស្រាលនៃជំងឺកូវីដ១៩នេះក៏ដោយ។ ក្នុងនោះដែរ ប្រជាពលរដ្ឋទាំងអស់ ត្រូវយល់ដឹងអំពីការដាក់ខ្លួនឲ្យនៅដាច់ដោយឡែកចំនួន១៤ថ្ងៃ ប្រសិនបើមានប្រវត្តិមកពីបរទេស ឬកន្លែងមានចម្លងជំងឺកូវី១៩ ជៀសវាងការចម្លងដល់គ្រួសារ នឹងរីករាលដាលក្នុងសហគមន៍ ។
សូមបញ្ជាក់ថា អំណោយដែលបានយកទៅចែកជូនគ្រួសារក្រីក្រទាំង២៤០គ្រួសារនោះ ក្នុង១គ្រួសារៗ ទទួលបាន អង្ករ២០គីឡូក្រាម មី១០កញ្ចប់ ម៉ាស់ និងទឹកសុទ្ធ ។ ដោយឡែក លោកជំទាវ ខៀវ ទេពរង្ស៊ី កាញារីទ្ធ ប្រធានកិត្តិយសសមាគមនារីដើម្បីសន្តិភាព និងការអភិវឌ្ឍ ក្រសួងព័ត៌មាន តំណាងឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន រួមជាមួយថ្នាក់ដឹកនាំ និងមន្រ្តីរាជការក្រសួងព័ត៌មាន បាននាំយកទៀនវស្សា បច្ច័យ និងទេយ្យទាន ទៅប្រគេនដល់វត្តចំនួន០៣ ស្ថិតក្នុងឃុំពង្រ និងឃុំមហាលាភផងដែរ។
ព័ត៌មានជាតិ ថ្មីៗ
