គិតត្រឹមព្រឹកថ្ងៃទី២២ ខែមិថុនា ឆ្នាំ២០២០នេះ ការដ្ឋានចំណតសម្រាប់រថយន្តធុនតូចជំហានទី១ នៅខាងមុខផ្សារលើធំថ្មី សម្រេចបាន ៨០ភាគរយហើយ និងត្រៀមបញ្ចប់ក្នុងពេលដ៏ខ្លីខាងមុខ ដើម្បីសម្រួលចរាចរណ៍ជូនប្រជាពលរដ្ឋក្នុងក្រុង និងលើកកម្ពស់សោភណ្ឌភាពក្នុងក្រុងសៀមរាប។
តាមការបង្ហាញរបស់អ្នកគ្រប់គ្រងការដ្ឋាន បន្ទាប់ពីការរុះរើ និងឈូសឆាយខឿនចាស់ចោលរួច ក្រុមការងារបានរៀបចំចាក់បេតុរួចរាល់ហើយ នៅសល់តែការរៀបចំគំនូសទីតាំង សម្រាប់ចតរថយន្តតែប៉ុណ្ណោះ ដែលការងារនេះ ក្រុមការងារជំនាញរបស់រដ្ឋបាលខេត្តសៀមរាប នឹងធ្វើការត្រួតពិនិត្យ ដើម្បីសម្រេចបញ្ចប់ការងារនៅសេសសល់។
សូមជម្រាបថា សម្រាប់ទិសដៅការងារឆ្នាំ២០២០ ក្រោមការដឹកនាំរបស់ ឯកឧត្តម ទៀ សីហា អភិបាលនៃគណៈអភិបាលខេត្ត រដ្ឋបាលខេត្តសៀមរាប បានកំណត់យកការងារបើកផ្លូវ និងការសាងសង់ផ្លូវ ជាការងារអាទិភាព តាមរយៈសេចក្តីសម្រេចសន្និបាតបូកសរុបលទ្ធផលការងារប្រចាំឆ្នាំ២០១៩ និងលើកទិសដៅការងារឆ្នាំ២០២០ ។
ព័ត៌មានជាតិ ថ្មីៗ
អត្ថបទ និង រូបភាព ៖ លោក សេង ផល្លី
