នៅរសៀលថ្ងៃទី១៩ ខែមិថុនា ឆ្នាំ២០២០នេះ ឯកឧត្តម ទៀ សីហា អភិបាលខេត្តសៀមរាប បានចាត់ក្រុមការងារទទួល និងដឹកជញ្ជូនប្រជាពលរដ្ឋខ្មែរពីបរទេស និងក្រុមការងារលេខាធិការដ្ឋាននៃគណៈកម្មាធិការប្រយុទ្ធប្រឆាំងអំពើជួញដូរមនុស្ស ខេត្តសៀមរាប ទៅកាន់ស្រុកម៉ាឡៃ ខេត្តបន្ទាយមានជ័យ ដើម្បីទទួលប្រជាពលរដ្ឋខេត្តសៀមរាបចំនួន ៣១នាក់ បម្រុងលួចឆ្លងដែនខុសច្បាប់ តាមច្រករបៀង នៃស្រុកម៉ាឡៃ ខេត្តបន្ទាយមានជ័យ។
តាមឲ្យដឹងពី លោក វរសេនីយ៍ត្រី ឡុប ធី នាយប៉ុស្តិសង្កែ នៃវរសេនាតូចលេខ៨១៥ ប្រចាំទិសស្រុកម៉ាឡៃ ប្រជាពលរដ្ឋខ្មែរ ដែលកងកម្លាំងប្រចាំការតាមច្រកព្រំដែន ឃាត់ខ្លួនបានយប់ថ្ងៃទី១៨ និងទៀបភ្លឺថ្ងៃទី១៩នេះ មានចំនួនសរុប ៦៤ ក្នុងនោះ ប្រជាពលរដ្ឋមកពីខេត្តកំពង់ធំ ប៉ៃលិន បាត់ដំបង បន្ទាយមានជ័យ និងខេត្តសៀមរាប។
តាមសម្ដីប្រជាពលរដ្ឋដែលកងកម្លាំងឃាត់ខ្លួនបាន បង្ហាញថា ពួកគេមានជីវភាពខ្វះខាត ត្រូវបានមេខ្យល់លួងលោម ឲ្យទៅធ្វើការនៅប្រទេសថៃ តាមការចង់បានថៅកែនៅទីនោះ។ ក្នុងការធ្វើដំណើរ មេខ្យល់ ទទួលបានលុយថៃ ចំនួន៣៥០០បាត នៅពេលនាំពលករទៅដល់កន្លែងធ្វើការ បន្ទាប់មកលុយនោះ ថៅកែនឹងកាត់ពីពលករវិញ នៅពេលបើកប្រាក់ខែ។
មានមតិក្នុងឱកាស ទៅទទួល និងដឹកជញ្ជូនប្រជាពលរដ្ឋខ្មែរនាពេលនោះ លោក នាក់ ណេរ៉ុន អភិបាលរងខេត្ត និង ប្រធានក្រុមការងារទទួល និងដឹកជញ្ជូនប្រជាពលរដ្ឋខ្មែរ ខេត្តសៀមរាប បង្ហាញថា ខណៈនេះព្រំដែនរវាងប្រទេសកម្ពុជា និងប្រទេសថៃ នៅតែបន្តបិទនៅឡើយ ក្នុងករណីមានឆ្លងដែននេះ ជាអំពើខុសច្បាប់ ក្នុងនោះ ប្រទេសថៃ នឹងធ្វើការឃាត់ខ្លួន និងផាកពិន័យដែលធ្វើឲ្យប្រជាពលរដ្ឋខាតទាំងពេលវេលា និងថវិកា។
ក្នុងឱកាសនោះដែរ លោកស្រី យូ សុភា អភិបាលរងខេត្ត និងជាប្រធានលេខាធិការដ្ឋាន នៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប ក៏បានអំពាវនាវដល់ ប្រជាពលរដ្ឋខ្មែរទាំងអស់ មានការអត់ធ្មត់មួយរយៈសិន រង់ចាំសភាពការណ៍នៃជំងឺកូវីដ១៩ បានធូរស្រាល ឬត្រូវបានបញ្ចប់ និងត្រូវរងចាំការប្រកាសជាផ្លូវការណាមួយ ក្នុងការបើកឲ្យដំណើរការឡើងវិញនៃច្រកព្រំដែនរវាងប្រទេសទាំងពីរ។
គួររំលឹកថា កាលពីថ្ងៃទី០៣ ខែមិថុនា ឆ្នាំ២០២០ ចៅក្រមស៊ើបសួរ នៃសាលាដំបូងខេត្តសៀមរាប បានចេញដីកាបង្គាប់ឲ្យឃុំខ្លួនបណ្ដោះអាសន្នមនុស្ស ០២នាក់ បន្ទាប់ពីពួកគេ បាននាំប្រជាពលរដ្ឋក្នុងខេត្តសៀមរាប ចំនួន០៩នាក់ទៅធ្វើការនៅប្រទេសថៃដោយខុសច្បាប់។
អត្ថបទ និង រូបភាព ៖ លោក សេង ផល្លី និងលោក ខេង ឧត្ដម
