នៅរាត្រីថ្ងៃទី ២៣ ខែមិថុនា ឆ្នាំ ២០២០ លោកឧត្តមសេនីយ៍ត្រី ស៊ន់ ចំណាន ស្នងការរងនៃស្នងការដ្ឋាននគរបាលខេត្តសៀមរាប បំភ្លឺចំពោះវីដេអូឃ្លីបដែលបានចោទប្រកាន់កងកម្លាំងចម្រុះថាបានចាក់សោរកង់រថយន្តប្រជាពលរដ្ឋ ដោយគ្រាន់តែចតរថយន្តនៅក្នុងបរិវេណស្ថានីយ៍ប្រេងឥន្ធនៈ ស្ថិតនៅតាមបណ្ដោយផ្លូវជាតិលេខ 6 ភូមិចុងកៅស៊ូ សង្កាត់ស្លក្រាម ក្រុងសៀមរាប ដែលករណីនេះពុំមែនជាការពិតឡើយ។
នៅក្នុងសេចក្ដីបំភ្លឺនោះលោកស្នងការរង បង្ហាញថា
កន្លងមកក្រុមរថយន្ដឈ្នួល ឬហៅថា តាក់ស៊ីមួយចំនួនតូចនេះ ពួកគាត់ពុំព្រមចូលដាក់ភ្ញៀវនៅក្នុងចំណតរថយន្តតាមសេចក្ដីសម្រេចរបស់រដ្ឋបាលខេត្តឡើយ។ តាមការស្រាវជ្រាវរបស់សមត្ថកិច្ច ពួកគាត់តែងតែយកស្ថានីយ៍ប្រេងឥន្ធនៈ ភោជនីយដ្ឋាន និងទីតាំងជួសជុលរថយន្ត ធ្វើជាចំណត ដើម្បីជាលេសក្នុងការដាក់អ្នកដំណើរនៅតាមដងផ្លូវ ដែលបង្កឲ្យមានភាពរញ៉េរញ៉ៃ និងបាត់បង់សណ្តាប់ធ្នាប់ សោភណ្ឌភាពក្រុង បន្ថែមពីនោះ មានពេលខ្លះធ្វើឲ្យបាត់សម្ភារ:របស់អ្នកដំណើរទៀតផង ។
លោកស្នងការរង បញ្ជាក់ថា បន្ទាប់ពីចេញ
សេចក្តីណែនាំរបស់រដ្ឋបាលខេត្តសៀមរាប លេខ ០០១.១៩ សណន ចុះថ្ងៃទី០២ ខែមេសា ឆ្នាំ២០១៩ ស្តីពីការធ្វើចរាចរណ៍របស់យានយន្តគ្រប់ប្រភេទ និងការរៀបចំសណ្តាប់ធ្នាប់ របៀបរៀបរយសាធារណ:និងបរិស្ថាន អនាម័យនៅក្នុងក្រុងសៀមរាប ខេត្តសៀមរាប កងកម្លាំងសមត្ថកិច្ចជំនាញ តែងតែបានចុះធ្វើការណែនាំនាំ និងអំពាវនាវដោយផ្ទាល់ ដល់ក្រុមរថយន្តតាក់ស៊ីមួយចំនួនតូចនោះ ដើម្បីចូលរួមគោរពច្បាប់ និងទទួលបានសិទ្ធស្មើគ្នា ក្នុងការប្រកបរបរទទួលទានប្រចាំថ្ងៃ។
ព័ត៌មានជាតិ ថ្មីៗ
លោក ក៏បានបញ្ជាក់ផងដែរថា ទោះបីកម្លាំងសមត្ថកិច្ចជំនាញអំពាវនាវយ៉ាងណាក្ដី ក៏ក្រុមរថយន្តតាក់ស៊ីទាំងនោះពុំស្ដាប់ និងគោរពតាមឡើយ កម្លាំងសមត្ថកិច្ចជំនាញចុះអនុវត្តន៍ច្បាប់ ដែលបង្កឱ្យមានការមិនពេញចិត្តពីសំណាក់ក្រុមតាក់ស៊ីមួយចំនួនតូចនោះ។
គួរបញ្ជាក់ថា ចំណតរថយន្តឈ្នួលគ្រប់ប្រភេទ ដែលរដ្ឋបាលខេត្តសៀមរាប បានសម្រេចទទួលស្គាល់មានចំនួន ០២ទីតាំង ទីមួយស្ថិតនៅក្នុងភូមិខ្នារ សង្កាត់ជ្រាវ ក្រុងសៀមរាប និងទី 2 ស្ថិតក្នុងភូមិកសិកម្ម សង្កាត់ស្រង៉ែ ក្រុងសៀមរាប។
